ກອງປະຊຸມປິ່ນອ້ອມກ່ອນຈະເຂົ້າສູ່ກອງປະຊຸມສຸດຍອດການນໍາແມ່ຍິງອາຊຽນ ຄັ້ງທີ 3 ພາຍໃຕ້ຫົວຂໍ້: “ສົ່ງເສີມວຽກງານເສດຖະກິດການດູແລເບິ່ງແຍງ ແລະ ຄວາມເຂັ້ມແຂງ ເພື່ອກ້າວສູ່ປະຊາຄົມອາຊຽນ ຫຼັງປີ 2025"ໄດ້ຈັດຂຶ້ນໃນວັນທີ 22 ສິງຫານີ້ທີ່ໂຮງແຮມຄຣາວພລາຊານະຄອນຫຼວງວຽງຈັນສປປ ລາວ, ໂດຍການເປັນປະທານຂອງທ່ານ ນາງ ອາລີ ວົງໜໍ່ບຸນທຳປະທານຄະນະບໍລິຫານງານສູນກາງສະຫະພັນແມ່ຍິງລາວ, ທ່ານ ນາງ ບິນຕັງ ປຸສປາໂຢກາລັດຖະມົນຕີ ການສ້າງຄວາມເຂັ້ມແຂງ ແລະ ປົກປ້ອງແມ່ຍິງ ແລະ ເດັກ ປະເທດອິນໂດເນເຊຍປະທານກອງປະຊຸມລັດຖະມົນຕີອາຊຽນ ຮັບຜິດຊອບ ວຽກງານແມ່ຍິງ, ທ່ານ ເອກກະພາບ ພັນທະວົງຮອງເລຂາທິການໃຫຍ່ອາຊຽນຜູ້ຊີ້ນໍາວຽກງານເສົາຄໍ້າ ປະຊາຄົມວັດທະນະທໍາ-ສັງຄົມອາຊຽນ, ມີບັນດາທ່ານຜູ້ຕາງໜ້າ ກອງເລຂາອາຊຽນ, ຄະນະກຳມະການແມ່ຍິງອາຊຽນ (ACW), ຄະນະກຳມາທິການອາຊຽນ ເພື່ອສົ່ງເສີມ ແລະ ປົກປ້ອງສິດທິຂອງແມ່ຍິງ ແລະ ເດັກ (ACWC) ຈາກບັນດາປະເທດສະມາຊິກອາຊຽນພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.
ທ່ານ ນາງ ອາລີ ວົງໜໍ່ບຸນທຳໄດ້ກ່າວວ່າ: ກອງປະຊຸມປິ່ນອ້ອມໃນມື້ນີ້, ຜູ້ເຂົ້າຮ່ວມໄດ້ຮ່ວມກັນປຶກສາຫາລື ຫົວຂໍ້ທີ່ສໍາຄັນ ທີ່ແມ່ຍິງກໍາລັງປະເຊີນໜ້າຢູ່ໃນພາກພື້ນ ເພື່ອບັນລຸຄວາມສະເໝີພາບຍິງ-ຊາຍ ແລະ ບໍ່ປະໃຜໄວ້ເບື້ອງຫຼັງ ເປັນຕົ້ນບັນຫາຄວາມຮຸນແຮງ, ການສ້າງຄວາມເຂັ້ມແຂງໃຫ້ແມ່ຍິງ ທາງດ້ານເສດຖະກິດເພື່ອຫຼຸດຜ່ອນຄວາມທຸກຍາກ, ການປັບຕົວຕໍ່ການປ່ຽນແປງດິນຟ້າອາກາດ ແລະ ໄພພິບັດ. ບັນຫາເຫຼົ່ານີ້ຍັງສືບຕໍ່ເປັນບັນຫາຂົ່ມຂູ່ ແລະ ມີຜົນກະທົບຕໍ່ແມ່ຍິງ ແລະ ເດັກໃນພາກພື້ນອາຊຽນເພື່ອແກ້ໄຂບັນຫາດັ່ງກ່າວທີ່ປະຊາຄົມອາຊຽນ ມີຄວາມຈຳເປັນຕ້ອງວາງຍຸດທະສາດ, ຮ່ວມກັນກັບຄູ່ຮ່ວມພັດທະນາ ໃນການເຊື່ອມສານວຽກປ້ອງກັນການໃຊ້ຄວາມຮຸນແຮງຕໍ່ແມ່ຍິງ-ເດັກ ແລະ ວຽກທີ່ກ່ຽວຂ້ອງກັບເສດຖະກິດການດູແລເບິ່ງແຍງເຂົ້າໃນຍຸດທະສາດລະດັບຊາດ ແລະ ພາກພື້ນ.
ສປປ ລາວ ໄດ້ເອົາໃຈໃສ່ຕໍ່ການສົ່ງເສີມຄວາມສະເໝີພາບຍິງ-ຊາຍ, ການພັດທະນາ ແລະ ປົກປ້ອງສິດຜົນປະໂຫຍດຂອງແມ່ຍິງ. ໃນນັ້ນ, ໄດ້ໃຫ້ຄວາມສໍາຄັນຕໍ່ວຽກງານຕ້ານການໃຊ້ຄວາມຮຸນແຮງຕໍ່ແມ່ຍິງ ແລະ ເດັກ, ມີນິຕິກຳ, ແຜນດໍາເນີນງານແຫ່ງຊາດກ່ຽວກັບການປ້ອງກັນ ແລະ ລຶບລ້າງຄວາມຮຸນແຮງຕໍ່ແມ່ຍິງ ແລະ ຄວາມຮຸນແຮງຕໍ່ເດັກ (2021-2025) ແລະ ໄດ້ສ້າງມາດຕະຖານການດໍາເນີນງານ ສໍາລັບການບໍລິການດ້ານສຸຂະພາບ, ການບໍລິການດ້ານສັງຄົມ, ການບໍລິການ ດ້ານຂະບວນການຍຸຕິທໍາ ແລະ ການປະສານງານ-ສົ່ງຕໍ່ ເພື່ອເປັນບ່ອນອີງສໍາລັບບຸກຄົນ, ນິຕິບຸກຄົນ ແລະ ການຈັດຕັ້ງ ທີ່ເຮັດໜ້າທີ່ປົກປ້ອງ, ຊ່ວຍເຫຼືອ ແລະ ສົ່ງຕໍ່ຜູ້ຖືກເຄາະຮ້າຍຈາກການໃຊ້ຄວາມຮຸນແຮງ ຕໍ່ແມ່ຍິງ ແລະ ເດັກ ຢູ່ ສປປ ລາວແລະມີຄວາມພາກພູມໃຈທີ່ຈະໄດ້ແລກປ່ຽນບົດຮຽນໃນການພັດທະນາ ແລະ ການຈັດຕັ້ງປະຕິບັດ “ມາດຕະຖານການດໍາເນີນງານ-SOPS" ເພື່ອໃຫ້ການປົກປ້ອງຊ່ວຍເຫຼືອແກ່ຜູ້ຖືກເຄາະຮ້າຍຈາກການໃຊ້ຄວາມຮຸນແຮງທາງເພດ ແລະ ບັນຫາອື່ນໆ.ກອງປະຊຸມໃນມື້ນີ້, ຍັງໄດ້ສະເໜີ“ຂໍ້ແນະນໍາ ຂອງອາຊຽນກ່ຽວກັບການພັດທະນາມາດຕະຖານການດໍາເນີນງານແຫ່ງຊາດ (SOPs) ສໍາລັບການ ປະສານງານເພື່ອຕອບໂຕ້ຄວາມຮຸນແຮງຕໍ່ແມ່ຍິງ ແລະ ເດັກຍິງ ລວມທັງກຸ່ມຜູ້ດ້ອຍໂອກາດ”.
ໃນຕອນທ້າຍກອງປະຊຸມໃນຄັ້ງນີ້, ຜູ້ແທນໄດ້ສືບຕໍ່ເຂົ້າຮ່ວມປະກອບຄໍາຄິດຄໍາເຫັນ ແລະ ແລກປ່ຽນບົດຮຽນທີ່ເຕັມໄປດ້ວຍເນື້ອໃນອັນອຸດົມສົມບູນ, ສ້າງສັນ ແລະ ມີແຜນບຸລິມະສິດຍາວນານ ໃນການແກ້ໄຂ ບັນຫາທີ່ກ່ຽວຂ້ອງກັບເສດຖະກິດການດູແລເບິ່ງແຍງ ທີ່ບໍ່ໄດ້ຮັບຄ່າຈ້າງ ແລະ ວຽກງານພາຍໃນຄົວເຮືອນ, ປະກອບສ່ວນເຂົ້າໃນການສົ່ງເສີມຄວາມສະເໝີພາບຍິງ-ຊາຍ ແລະ ຄວາມເຂັ້ມແຂງໃຫ້ແມ່ຍິງ ພ້ອມທັງການພັດທະນາມາດຕະຖານການດໍາເນີນງານແຫ່ງຊາດ (SOPs) ສໍາລັບການປະສານງານ ເພື່ອຕອບໂຕ້ຄວາມຮຸນແຮງຕໍ່ແມ່ຍິງ ແລະ ເດັກຍິງ ລວມທັງກຸ່ມດ້ອຍໂອກາດ ຂອງປະເທດຕົນ ເພື່ອກ້າວໄປສູ່ປະຊາຄົມອາຊຽນ ທີ່ເຂັ້ມແຂງ.
(ຂ່າວ: ບຸນອູ້ມ, ພາບ: ວັນເພັງ)
