ທ່ານ ວັນໄຊ ພອງສະຫວັນ ເຈົ້າແຂວງຄຳມ່ວນ ໄດ້ຕ້ອນຮັບການເຂົ້າພົບປະຂອງທ່ານ ພັອ ຈິ້ງ ແທັງ ບິ່ງ ຫົວໜ້າການທະຫານ ກອງບັນຊາການທະຫານຊາຍແດນ ແຂວງກວາງບິ່ງ ສສ ຫວຽດນາມ ພ້ອມຄະນະ ໃນວັນທີ 25 ສິງຫາຜ່ານມາ ຢູ່ທີ່ຫ້ອງວ່າການແຂວງຄໍາມ່ວນ ພ້ອມທັງໄດ້ລາຍງານສະພາບການພົວພັນຮ່ວມມື ລະຫວ່າງ ກອງບັນຊາການທະຫານແຂວງຄຳມ່ວນ ກັບ ກອງບັນຊາການທະຫານຊາຍແດນ ແຂວງກວາງບິ່ງ ໃນໄລຍະ 6 ເດືອນຕົ້ນປິ 2024 ຊຶ່ງສອງກໍາລັງປະກອບອາວຸດ ຄໍາມ່ວນ-ກວາງບິ່ງ ຮັກສາໄດ້ຄວາມສະຫງົບຕາມຊາຍແດນ ເຮັດໃຫ້ຊາຍແດນເປັນຊາຍແດນສັນຕິພາບ, ມິດຕະພາບ ແລະ ພັດທະນາ. ປະຊາຊົນ ປະຊາຊົນໄດ້ມີການຕື່ນຕົວປະຕິບັດຕາມສົນທີສັນຍາລະຫວ່າງສອງຝ່າຍ, ຮ່ວມກັນປາບປາມອາດສະຍາກຳຕ່າງໆ, ກວດກາລາດຕະເວນຊາຍແດນຮ່ວມກັນ ແລະ ອື່ນໆ. ໃນຕໍ່ໜ້າ ທະຫານຊາຍແດນແຂວງກວາງບິ່ງ ຈະໄດ້ສືບຕໍ່ປະສານສົມທົບ ກັບ ສອງກຳລັງ ປກຊ-ປກສ ແຂວງຄຳມ່ວນ ເພື່ອປຶກສາຫາລືຮ່ວມກັນປ້ອງກັນຄວາມສະຫງົບ ແລະ ເພິ່ມທະວີວຽກງານປ້ອງກັນຊາຍແດນໃຫ້ມີຄວາມເຂັ້ມແຂງ.

ໂອກາດນີ້, ທ່ານເຈົ້າແຂວງຄໍາມ່ວນ ກໍໄດ້ສະແດງຄວາມຂອບໃຈ ທີ່ຄະນະທະຫານຊາຍແດນ ແຂວງກວາງບິ່ງ ໄດ້ມາຢ້ຽມຢາມ ແລະ ເຮັດວຽກຢູ່ແຂວງຄໍາມ່ວນໃນຄັ້ງນີ້ ແລະ ຍ້ອງຍໍຊົມເຊີຍຕໍ່ທະຫານຊາຍແດນແຂວງກວາງບິ່ງ ທີ່ໄດ້ປະສານສົມທົບກັນກັບທະຫານແຂວງຄໍາມ່ວນ ໃນການພົວພັນ, ຮ່ວມມື, ແລກປ່ຽນຂໍ້ມູນຂ່າວສານ, ຮ່ວມກັນລາດຕະເວນຊາຍແດນ, ຈໍາກັດການຄ້າຂາຍເຖື່ອນຕາມຊາຍແດນ ໂດຍສະເພາະແມ່ນການປະຕິບັດຕາມບົດບັນທຶກການຮ່ວມມືລະຫວ່າງສອງຝ່າຍ ເຮັດໃຫ້ວຽກງານແຕ່ລະດ້ານມີຄວາມຕັ້ງໜ້າ ພ້ອມນີ້ ກໍສະໜີໃຫ້ສືບຕໍ່ເສີມຂະຫຍາຍ ການພົວພັນຮ່ວມມືທັງສອງຝ່າຍໃຫ້ມີຜົນສໍາເລັດໃຫຍ່ຫຼວງຂຶ້ນກວ່າເກົ່າ.

(ຂ່າວ-ພາບ: ກອງຄໍາ)