ອົງຄະນະພັກກະຊວງອຸດສາຫະກໍາແລະການຄ້າ(ອຄ)ໄດ້ຈັດພິທີປາຖະກະຖາວັນເກີດປະທານສຸພານຸວົງຄົບຮອບ115ປີ, ວັນສົນທິສັນຍາມິດຕະພາບ-ການຮ່ວມມືຄົບຮອບ 47 ປີແລະການສ້າງສາຍພົວພັນການທູດ-ລາວຫວຽດນາມຄົບຮອບ 62ປີ ຂຶ້ນທີ່ກະຊວງ ອຄ ໂດຍການເປັນປະທານຂອງ ສະຫາຍ ນາງ ຈັນສຸກ ແສງພະຈັນ ຮອງເລຂາຄະນະບໍລິຫານງານພັກ ຮອງລັດຖະມົນຕີກະຊວງ ອຄ; ມີບັນດາສະຫາຍ ຄະນະນໍາກະຊວງ, ໜ່ວຍພັກຮາກຖານ ທີ່ຂຶ້ນກັບອົງຄະນະພັກກະຊວງ ເຂົ້າຮ່ວມ.

ໃນໂອກາດດັ່ງກ່າວສະຫາຍນາງຈັນສຸກແສງພະຈັນ ໄດ້ກ່າວປາຖະກະຖາ ວັນເກີດປະທານສຸພານຸວົງຄົບຮອບ115ປີ (13 ກໍລະກົດ 1909–13 ກໍລະກົດ 2024) ໂດຍໄດ້ຍົກໃຫ້ຮູ້ເຖິງຊີວິດ ແລະ ການເຄື່ອນໄຫວປະຕິວັດຂອງປະທານ ສຸພານຸວົງ ຜູ້ນໍາສູງສຸດຂອງພັກ ແລະ ລັດ ຄົນໜຶ່ງທີ່ຕິດພັນກັບຂະບວນການປະຕິວັດ, ເປັນຜູ້ທີ່ປະທານ ໄກສອນ ພົມວິຫານ ກໍໄດ້ເວົ້າເຖິງວ່າ “ຊື່ສຽງຮຽງນາມຂອງສະຫາຍ ໄດ້ພົ້ນເດັ່ນຂຶ້ນໃນຖານະທີ່ເປັນນັກຮົບຮັກຊາດຮຸ່ນທໍາອິດ ທີ່ໄດ້ເອົາຊີວິດຂອງຕົນ ຜູກພັນກັບການປະຕິວັດຕະຫຼອດມາ ໂດຍບໍ່ງໍ້ງ່ຽງ ຕໍ່ຄວາມລໍາບາກ, ຄວາມເສຍສະຫຼະໃດໆ ກະທັ້ງເຖິງບໍ່ຫວາດຫວັ່ນ ຕໍ່ກັບການຈັບກຸມຄຸມຂັງຂອງສັດຕູ, ຍາມໃດກໍຕໍ່ສູ້ ເພື່ອອຸດົມຄະຕິປະຕິວັດອັນສູງສົ່ງ, ເພື່ອຄວາມເປັນເອກະລາດ ແລະ ຄວາມວັດທະນາຖາວອນຂອງປະເທດຊາດ, ເພື່ອອິດສະຫຼະພາບ ແລະ ຄວາມຢູ່ດີກິນດີຂອງປະຊາຊົນ”, ປະທານ ສຸພານຸວົງ ໄດ້ເຂົ້າຮ່ວມກັບໝູ່ຄະນະນໍາຂອງພັກ ເລີ່ມຕັ້ງແຕ່ຊຸມປີຕົ້ນຂອງການປະຕິວັດ, ເຂົ້າຮ່ວມກໍ່ສ້າງຮາກຖານປະຕິວັດ ແລະ ຖານທີ່ໝັ້ນຕໍ່ຕ້ານທີ່ກ້າແກ່ນຕະຫຼອດມາໃນສອງສະໄໝຕໍ່ຕ້ານ ອັນຍາວນານຂອງປະຊາຊົນເຮົາ. ພ້ອມນີ້, ກໍຍັງໃຫ້ຮູ້ເຖິງຜົນງານ ແລະ ຄຸນງາມຄວາມດີຂອງປະທານ ສຸພານຸວົງ ແລະ ເນັ້ນໃຫ້ຮໍ່າຮຽນເອົາແບບຢ່າງຄຸນງາມຄວາມດີຂອງປະທານ ສຸພານຸວົງ ອີກດ້ວຍ.

ຈາກນັ້ນ, ສະຫາຍ ພຸດທະວັນ ນັນທະວົງ ຄະນະປະຈໍາພັກກະຊວງ ຫົວໜ້າກົມກວດກາກະຊວງ ອຄ ກໍໄດ້ປະຕິບັດໜ້າທີ່ທີ່ຮັບມອບໝາຍໃນການກ່າວເຜີຍແຜ່ເຊື່ອມຊຶມກ່ຽວກັບສາຍພົວພັນລາວ-ຫວຽດນາມ ກໍຄືວັນເຊັນສົນທິສັນຍາມິດຕະພາບແລະການຮ່ວມມືລາວ-ຫວຽດນາມຄົບຮອບ47ປີ (18 ກໍລະກົດ 1977 – 18 ກໍລະກົດ 2024) ແລະ ວັນສ້າງຕັ້ງສາຍພົວພັນການທູດລາວ-ຫວຽດນາມ ຄົບຮອບ 62 ປີ (5 ກັນຍາ 1962 – 5 ກັນຍາ 2024).

ໃນຕອນທ້າຍກອງປະຊຸມ, ສະຫາຍນາງຈັນສຸກແສງພະຈັນ ຍັງໄດ້ຮຽກຮ້ອງໃຫ້ບັນດາເລຂາຄະນະພັກແຕ່ລະຂັ້ນຄົ້ນຄວ້າແລະຈັດເຊື່ອມຊຶມຕື່ມພາຍໃນກົມກອງຂອງຕົນໃຫ້ເອົາໃຈໃສ່ການໂຄສະນາສ້າງຄວາມເຂົ້າໃຈຕໍ່ສັງຄົມຮັບຮູ້ໃນຕະຫຼອດຊີວິດການເຄື່ອນໄຫວຂອງປະທານສຸພານຸວົງ. ພ້ອມດຽວກັນນີ້, ກໍເນັ້ນໃຫ້ສືບຕໍ່ເສີມຂະຫຍາຍສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດແລະການຮ່ວມມືຮອບດ້ານລາວ-ຫວຽດນາມ ເປັນຕົ້ນແມ່ນໃຫ້ເຂົ້າສູ່ລວງເລິກ, ສູ້ຊົນເຮັດໃຫ້ການພົວພັນຮ່ວມມືດ້ານເສດຖະກິດ-ການຄ້າສົມຄູ່ກັບຜົນສໍາເລັດໃນການພົວພັນດ້ານການເມືອງແລະຄວາມໝັ້ນຄົງ,ເພີ່ມທະວີການໂຄສະນາສຶກສາອົບຮົມພະນັກງານ, ນັກຮົບ, ລັດຖະກອນແລະປະຊາຊົນບັນດາເຜົ່າ, ເປັນຕົ້ນຄົນຮຸ່ນໜຸ່ມໃຫ້ມີຄວາມຮັບຮູ້-ເຂົ້າໃຈກ່ຽວກັບມູນເຊື້ອສາມັກຄີພິເສດ, ການຮ່ວມມືຮອບດ້ານລະຫວ່າງລາວ-ຫວຽດນາມ, ດັ່ງຄໍາສັ່ງສອນຂອງປະທານສຸພານຸວົງທີ່ວ່າ:ທະນຸຖະໜອມມິດຕະພາບນັ້ນຄືກັນກັບເກືອຮັກສາຄວາມເຄັມ, ໝາກເພັດຮັກສາຄວາມຮ້ອນ, ຕາບໃດຍັງມີຟ້າແລະດິນ, ຕາບນັ້ນກໍຍັງມີຄວາມສາມັກຄີລາວ-ຫວຽດນາມ”.

(ຂ່າວ-ພາບ: ສຸກສະຫວັນ)