ວິທະຍຸກະຈາຍສຽງຫວຽດນາມລາຍງານວ່າ: ໃນວັນທີ 25 ສິງຫາ ຜ່ານມາຢູ່ນະຄອນດ່າລາດແຂວງເລິມດົງ, ທ່ານ ຟ້າມມິງຈິງ ນາຍົກລັດຖະມົນຕີ ຫວຽດນາມ ໄດ້ເປັນປະທານກອງປະຊຸມຮັບປະກັນຄວາມໝັ້ນຄົງ, ຄວາມເປັນລະບຽບຮຽບຮ້ອຍຮັບໃຊ້ການພັດທະນາເສດຖະກິດ - ສັງຄົມ ບັນດາແຂວງເຂດໄຕງວຽນ

ຂ່າວລະບຸວ່າ: ທ່ານ ຟ້າມມິງຈິງ ກ່າວຄຳເຫັນໃນກອງປະຊຸມວ່າ: ໄຕງວຽນ ແມ່ນສະຖານທີ່ຍຸດທະສາດສຳຄັນພິເສດກ່ຽວກັບເສດຖະກິດ, ການເມືອງ, ຄວາມໝັ້ນຄົງ, ການປ້ອງກັນຊາດ ແລະ ສິ່ງແວດລ້ອມຊີວະພາບຂອງປະເທດຊາດ. ດັ່ງນັ້ນ, ເພື່ອສ້າງພື້ນຖານຢ່າງໝັ້ນແກ່ນພັດທະນາໄຕງວຽນສົມກັບບົດບາດ, ຄວາມສາມາດບົ່ມຊ້ອນ, ທ່າໄດ້ປຽບ, ປັບປຸງ ສີສັນວັດທະນະທຳ, ຍົກສູງຊີວິດດ້ານວັດຖຸ ແລະ ຈິດໃຈຂອງປະຊາຊົນ, ທ່ານ ຟ້າມມິງຈິງ ຮຽກຮ້ອງໃຫ້ບັນດາຄະນະ, ກະຊວງ, ຂະແໜງການ, ທ້ອງຖິ່ນຕ້ອງຮັບປະກັນຄວາມໝັ້ນຄົງ, ຄວາມເປັນລະບຽບຮຽບຮ້ອຍ ແມ່ນໜ້າທີ່ສຳຄັນ, ຮີບດ່ວນ, ເປັນປະຈຳ, ຍາວນານ ແລະ ແມ່ນຄວາມຮັບຜິດຊອບຂອງທົ່ວລະບົບການເມືອງ, ປະຊາຊົນໝົດທຸກຄົນ.

ທ່ານ ຟ້າມມິງຈິງ ເນັ້ນໜັກວ່າ: ຢາກຮັກສາຄວາມໝັ້ນຄົງ, ຄວາມເປັນລະບຽບຮຽບຮ້ອຍຢ່າງໝັ້ນແກ່ນ ປະຊາຊົນຕ້ອງມີຊີວິດທີ່ອີ່ມໜຳສຳລານ, ສົມບູນພູມສຸກ; ສິ່ງສຳຄັນຂອງການປົກປັກຮັກສາຄວາມໝັ້ນຄົງ, ຄວາມເປັນລະບຽບຮຽບຮ້ອຍແມ່ນຊີວິດດ້ານວັດຖຸ ແລະ ຈິດໃຈຂອງປະຊາຊົນໄດ້ຮັບການປັບປຸງຢ່າງບໍ່ຢຸດຢັ້ງ, ບໍ່ປະໃຫ້ຜູ້ໃດຖືກຕົກຢູ່ທາງຫຼັກ; ກຳລັງແຮງຂອງການປ້ອງກັນຄວາມສະຫງົບ, ຄວາມເປັນລະບຽບຮຽບຮ້ອຍແມ່ນກຳລັງຂອງປະຊາຊົນ.