ຂ່າວຕ່າງປະເທດລາຍງານໃນວັນທີ 25 ສິງຫາ ຜ່ານມາວ່າ: ນໍ້າຖ້ວມໃນບັງກລາເທດ ສົ່ງຜົນໃຫ້ມີຜູ້ເສຍຊີວິດໃນ 7 ເຂດທ້ອງຖິ່ນ ຢ່າງໜ້ອຍ 18 ລາຍແລ້ວ.

ສູນປະສານງານຮັບມືກັບໄພພິບັດແຫ່ງຊາດ ສັງກັດກະຊວງຄຸ້ມຄອງ ແລະ ບັນເທົາທຸກໄພພິບັດຂອງປະເທດບັງກລາເທດ ລະບຸວ່າ:ມີປະຊາຊົນໄດ້ຮັບຜົນກະທົບຈາກນໍ້າຖ້ວມໃນ 11 ເຂດ ຈາກທັງໝົດ 64 ເຂດ ຂອງປະເທດ ເກືອບ 5 ລ້ານຄົນ.

ອຳນາດການປົກຄອງທ້ອງຖິ່ນຍັງຕ້ອງເຮັດວຽກຢ່າງໜັກເພື່ອຈັດສົ່ງສິ່ງຂອງໃນຫຼາຍເຂດທາງພາກຕາເວັນອອກສ່ຽງໃຕ້ ແລະພາກເໜືອ. ຂະນະທີ່ຖະໜົນຫົນທາງຖືກນໍ້າຖ້ວມ ຊຶ່ງມີສາເຫດມາຈາກຝົນຕົກໜັກຕາມລະດູການ ແລະ ມວນນໍ້າປ່າຈາກພູເຂົາຕາມຊາຍແດນຕິດກັບອິນເດຍ

ນອກຈາກນັ້ນ, ເຫດການນໍ້າຖ້ວມຍັງສ້າງຄວາມເສຍຫາຍແກ່ບ້ານເຮືອນ ແລະພືດຜົນເປັນວົງກວ້າງທົ່ວພາກເໜືອ ແລະ ຕາເວັນອອກສ່ຽງໃຕ້ ຂອງບັງກລາເທດ ອີກດ້ວຍ.