ວິທະຍຸກະຈາຍສຽງຫວຽດນາມລາຍງານວ່າ: ໂດຍໄດ້ຮັບຄຳເຊື້ອເຊີນຂອງທ່ານເຈິ່ນແທັງເໝິນປະທານສະພາແຫ່ງຊາດ ຫວຽດນາມ, ໃນວັນທີ 24 ສິງຫາ ຜ່ານມາທ່ານນາງ ຊູ ລາຍ ປະທານສະພາສູງ ອົສຕຣາລີ ໄດ້ເລີ່ມຕົ້ນການຢ້ຽມຢາມຫວຽດນາມ ຢ່າງເປັນທາງການໃນລະຫວ່າງວັນທີ 24 – 30 ສິງຫາ ນີ້.

ຂ່າວລະບຸວ່າ: ກ່ອນການຢ້ຽມຢາມ, ທ່ານນາງ ເລທູຮ່າ ຮອງຫົວໜ້າກຳມາທິການການຕ່າງປະເທດ ຫວຽດນາມ ເນັ້ນໜັກວ່າ: ການຢ້ຽມຢາມຂອງທ່ານນາງ ຊູ ລາຍ ປະທານສະພາສູງ ອົສຕຣາລີ ມີຄວາມໝາຍສຳຄັນ, ປະກອບສ່ວນຍົກລະດັບ, ເຮັດໃຫ້ການພົວພັນລະຫວ່າງສອງອົງການນິຕິບັນຍັດເຂົ້າສູ່ລວງເລິກ ແລະ ແທດຈິງກວ່າເກົ່າອີກ, ນຳການພົວພັນນີ້ກາຍເປັນເສົາຄ້ຳສຳຄັນ ໃນການພົວພັນຄູ່ຮ່ວມມືຍຸດທະສາດ ຮອບດ້ານ ຫວຽດນາມ - ອົສຕຣາລີ. ສ່ວນຝ່າຍອົສຕຣາລີ, ຖືວ່າ ການຢ້ຽມຢາມຄັ້ງນີ້ສະແດງໃຫ້ເຫັນວ່າ ອົສຕຣາລີ ມີຄວາມເອົາໃຈໃສ່, ຖືເປັນສຳຄັນການພົວພັນຂອງອົສຕຣາລີຕໍ່ ຫວຽດນາມ, ຢັ້ງຢືນຄວາມປາຖະໜາຢາກຍູ້ແຮງການພົວພັນລະຫວ່າງສະພາແຫ່ງຊາດ ຫວຽດນາມ ກັບລັດຖະສະພາອົສຕຣາລີ ດ້ວຍການເຄື່ອນໄຫວຫັນຂໍ້ຕົກລົງການຮ່ວມມືລະຫວ່າງສອງອົງການນິຕິບັນຍັດສອງປະເທດເປັນລະອຽດໃນໄລຍະຈະມາເຖິງ ດ້ວຍເນື້ອໃນໃໝ່ທີ່ເລິກເຊິ່ງກວ້າງຂວາງ, ຕາມທິດນັບມື້ນັບແທ້ຈິງ ແລະ ມີປະສິດທິຜົນ.

ໃນການຢ້ຽມຢາມຄັ້ງນີ້, ທ່ານນາງ ຊູ ລາຍຈະມີການເຈລະຈາຢ່າງເປັນທາງການກັບທ່ານເຈິ່ນແທັງເໝິນປະທານສະພາແຫ່ງຊາດ, ພົບປະກັບທ່ານຟ້າມມິງຈິງນາຍົກລັດຖະມົນຕີ ຫວຽດນາມ, ເຂົ້າຢ້ຽມຂ່ຳນັບທ່ານໂຕເລິມ ເລຂາທິການໃຫຍ່ປະທານປະເທດ; ເຂົ້າຮ່ວມເວທີປາໄສ ຫວຽດນາມ - ອົສຕຣາລີ, ດ້ວຍຫົວຂໍ້ “ເພີ່ມທະວີການເຊື່ອມຕໍ່ດ້ານເສດຖະກິດ, ແບ່ງປັນວິໄສທັດວັດທະນາຖາວອນ.