ສະພາແຫ່ງຊາດໄດ້ຈັດກອງປະຊຸມສຳມະນາກ່ຽວກັບການກະກຽມເປັນປະທານກອງປະຊຸມສະມັດຊາໃຫຍ່ລັດຖະສະພາລະຫວ່າງຊາດອາຊຽນ (AIPA) ຄັ້ງທີ 45 ໃຫ້ແກ່ການນໍາຂອງສະພາແຫ່ງຊາດລາວ ຂຶ້ນລະຫວ່າງວັນທີ 27-28 ສິງຫາ ນີ້ ທີ່ສະພາແຫ່ງຊາດ, ໂດຍເປັນປະທານຂອງທ່ານນາງ ສູນທອນ ໄຊຍະຈັກ ຮອງປະທານສະພາແຫ່ງຊາດ ຜູ້ຊີ້ນໍາວຽກງານການຕ່າງປະເທດ, ທ່ານນາງ ຊິຕິ ໂຣໄຊເມຣິຢັນຕີ ດາໂຕະ ຮາຈິ ອັບດຸນ ຣາມັນ (Siti Rozaimeriyanty Dato Haji Abdul Rahman) ເລຂາທິການໃຫຍ່ໄອປາ, ບັນດາທ່ານ ຄະນະປະຈຳສະພາແຫ່ງຊາດ, ຊ່ຽວຊານທີ່ມາຈາກປະເທດ ຫວຽດນາມ, ໄທ, ຟິລິບປິນ, ອິນໂດເນເຊຍ ແລະ ຂະແໜງການກ່ຽວຂ້ອງເຂົ້າຮ່ວມ.

ທ່ານນາງ ສູນທອນ ໄຊຍະຈັກ ກ່າວວ່າ: ໃນລະຫວ່າງວັນທີ 17-23 ຕຸລາ 2024 ທີ່ຈະມາເຖິງນີ້ ສະພາແຫ່ງຊາດ ສປປ ລາວ ຈະເປັນເຈົ້າພາບຈັດກອງ AIPA ຄັ້ງທີ 45 ແລະ ກອງປະຊຸມພົບປະລະຫວ່າງຜູ້ນໍາອາຊຽນ ກັບຜູ້ນໍາໄອປາ ໃນວັນທີ 8-10 ຕຸລາ 2024 ທີ່ນະຄອນຫຼວງວຽງຈັນ, ເວລາຫຍັບໃກ້ເຂົ້າມາເລື້ອຍໆ ດັ່ງນັ້ນ ໃນນາມເຈົ້າພາບຕ້ອງໄດ້ຂຸ້ນຂ້ຽວຮ່ວມແຮງຮ່ວມໃຈກັນ ກະກຽມຄວາມພ້ອມຮອບດ້ານເປັນຕົ້ນ: ແມ່ນການກຽມທັກສະໃນການເປັນປະທານກອງປະຊຸມ ທັກສະໃນການປຶກສາຫາລື ແລະ ການຕັດສິນບັນຫາໃນຖານະເປັນປະທານກອງປະຊຸມໃຫ້ມີຄວາມເປັນກາງການກະກຽມເນື້ອໃນຕ່າງໆ, ບົດອະທິບາຍ ດ້ານວຽກງານບໍລິຫານ, ພິທີການ, ການສື່ສານ, ດ້ານພະລາທິການ ແລະ ໂລຈິສຕິກຕ່າງໆ ໃຫ້ແກ່ການຈັດກອງປະຊຸມລະດັບສາກົນດັ່ງກ່າວ. ໂດຍເຫັນໄດ້ຄວາມຈຳເປັນຂອງກອງປະຊຸມໄອປາ, ຄະນະຮັບຜິດຊອບກອງປະຊຸມພ້ອມກຳມາທິການການຕ່າງປະເທດຈຶ່ງໄດ້ຈັດກອງປະຊຸມຄັ້ງນີ້ຂຶ້ນ.

ໃນກອງປະຊຸມຈະເນັ້ນໃສ່ບັນຫາສໍາຄັນເຊັ່ນ: ແລກປ່ຽນປະສົບການກ່ຽວກັບການທູດລັດຖະສະພາໃນລະດັບ ພາກພື້ນ ແລະ ສາກົນ, ມີວິທີການເພື່ອເຮັດໃຫ້ກອງປະຊຸມບັນລຸຜົນສໍາເລັດ ສະເໜີກ່ຽວກັບໜ້າວຽກທີ່ສໍາຄັນ ຂອງກອງປະຊຸມໃຫຍ່ໄອປາຄັ້ງທີ 45, ວາລະ, ລະບຽບ ແລະ ຂັ້ນຕອນ, ການປະຕິບັດຕົວຈິງ, ຄວາມເຂົ້າໃຈກ່ຽວກັບການຮ່າງມະຕິ ແລະ ການນໍາສະເໜີມະຕິໃນກອງປະຊຸມໄອປາ, ລົງເລິກດ້ານເນື້ອໃນ ແລະ ບັນຫາລະອຽດອ່ອນ, ການເປັນປະທານກອງປະຊຸມຄະນະບໍລິຫານງານ ແລະ ກອງປະຊຸມຄະນະກຳມາທິການປະຈໍາຕ່າງໆ ຂອງໄອປາ, ປະສົບການ, ການປະຕິບັດທີ່ດີ ແລະ ທັກສະທີ່ຈໍາເປັນ, ການເຊື່ອມໂຍງບົດບາດຍິງ-ຊາຍ ເຂົ້າໃນການທູດລັດຖະສະພາ (ໂດຍສະເພາະໃນກອງປະຊຸມ AIPA) ປຶກສາຫາລືກ່ຽວກັບການສະໜັບສະໜູນບາດກ້າວຕໍ່ໄປ ຂອງການກະກຽມກອງປະຊຸມໃຫຍ່ໄອປາ ຄັ້ງທີ 45 ແລະ ອື່ນໆ.

(ຂ່າວ-ພາບ: ແສງຈັນ)