ຂ່າວຕ່າງປະເທດລາຍງານໃນວັນທີ 28 ສິງຫາ ຜ່ານມາວ່າ: ທ່ານໂຣເຈີ ແກມບາ ລັດຖະມົນຕີກະຊວງສາທາລະນະສຸກຂອງສາທາລະນະລັດປະຊາທິປະໄຕ ກົງໂກ ຫຼື ດີອາກົງໂກ ລາຍງານສະຖານະການການແຜ່ລະບາດຂອງພະຍາດໂລກໝາກສຸກລີງ ຫຼື (Mpox)ໃນດີອາກົງໂກ ວ່າ: ພົບຄົນເຈັບທີ່ສົງໄສວ່າຕິດເຊື້ອພະຍາດ 17.801 ຄົນ ໃນຈໍານວນນີ້ມີຜູ້ເສຍຊີວິດ 610 ຄົນ.

ທ່ານ ແກມບາ ຮຽກຮ້ອງໃຫ້ປະຊາຊົນປະຕິບັດຕາມມາດຕະການປ້ອງກັນຕ່າງໆ ໂດຍສະເພາະໃນໄລຍະທີ່ຈະມີການເປີດພາກຮຽນໃໝ່ໃນຕົ້ນເດືອນນີ້ ແລະໃຫ້ຮີບຮ້ອນໄປສັກວັກຊິນທັນທີເມື່ອມີວັກຊິນໃຫ້ບໍລິການ.

ຖະແຫຼງການຈາກສຳນັກງານໃຫຍ່ຜູ້ລີ້ໄພແຫ່ງສະຫະປະຊາຊາດ (UNHCR) ເມື່ອວັນ ທີ 27 ສິງຫາ ຜ່ານມາ ລະບຸວ່າ: ມີລາຍງານຄົນເຈັບທີ່ສົງໄສວ່າອາດຈະຕິດພະຍາດໃນແຂວງຕ່າງໆ ທີ່ໄດ້ຮັບຜົນກະທົບຈາກຄວາມຂັດແຍ່ງ ຊຶ່ງເປັນບ່ອນຢູ່ອາໄສຂອງຜູ້ພັດຖິ່ນພາຍໃນປະເທດຈຳນວນທັງໝົດ 7,3 ລ້ານຄົນ.

ໃນວັນທີ 26 ສິງຫາ ຜ່ານມາ, ອົງການອະນາໄມໂລກ (WHO) ປະກາດແຜນຍຸດທະສາດການກຽມຄວາມພ້ອມຮັບມືເພື່ອຄວບຄຸມການແຜ່ລະບາດຂອງພະຍາດໝາກສຸກລີງ ຈາກມະນຸດສູ່ມະນຸດ ຜ່ານຄວາມພະຍາຍາມໃນການປະສານງານລະດັບຊາດ, ລະດັບພາກພື້ນ ແລະ ລະດັບໂລກ.

ທ່ານ ທີໂດຣ ອັດຮານອມ ກີບຣີເຍຊຸສ ຜູ້ອຳນວຍການໃຫຍ່ອົງການ WHO ກ່າວວ່າ: ການລະບາດຂອງພະຍາດໝາກສຸກລີງ ໃນ ດີອາກົງໂກ ແລະກຸ່ມປະເທດໃກ້ຄຽງນັ້ນແມ່ນສາມາດຄວບຄຸມ ແລະຢຸດຢັ້ງໄດ້.