ຂ່າວຕ່າງປະເທດລາຍງານໃນວັນທີ 28 ສິງຫາ ຜ່ານມາວ່າ:ສຳນັກງານອຸຕຸນິຍົມວິທະຍາຍີ່ປຸ່ນ (JMA) ປະກາດເຕືອນໄພສຸກເສີນກ່ຽວກັບພາຍຸ ແລະ ຄື້ນສູງໃນແຂວງຄາໂກຊິມາທາງທິດຕາເວັນຕົກສ່ຽງໃຕ້ຂອງຍີ່ປຸ່ນ, ໂດຍຮຽກຮ້ອງໃຫ້ມີການແຈ້ງເຕືອນໄພລະດັບສູງແກ່ປະຊາຊົນໃນພື້ນທີ່, ຂະນະທີ່ພາຍຸໄຕ້ຝຸ່ນຊານຊານ (Shanshan) ກຳລັງເຂົ້າໃກ້ທາງທິດຕາເວັນຕົກສ່ຽງໃຕ້ຂອງຍີ່ປຸ່ນ.

JMA ຖະແຫຼງວ່າ: ໄດ້ມີການປະກາດເຕືອນໄພລະດັບສູງສຸດ ເນື່ອງຈາກພາຍຸແບບທີ່ບໍ່ເຄີຍມີມາກ່ອນ ແລະ ຄາດວ່າຈະມີຝົນຕົກຫຼາຍທີ່ສຸດ ພ້ອມລະບຸເຖິງຄວາມເປັນໄປໄດ້ທີ່ຈະປະກາດເຕືອນໄພສຸກເສີນ ກ່ຽວກັບຝົນຕົກໜັກໃນແຂວງຄາໂກຊິມາ ແລະ ແຂວງມິຢາຊາກິ.

ໃນວັນທີ 28 ສິງຫາຜ່ານມາ ພາຍຸໄຕ້ຝຸ່ນ ຊານຊານ ຊຶ່ງເປັນພາຍຸໄຕ້ຝຸ່ນໜ່ວຍທີ 10 ຂອງປີນີ້ ຢູ່ຫ່າງຈາກເກາະຍາກຸຊິມະ ໄປທາງທິດໃຕ້- ທິດຕາເວັນຕົກສ່ຽງໃຕ້ ປະມານ 90 ກິໂລແມັດ ໃນແຂວງຄາໂກຊິມາ ແລະກຳລັງເຄື່ອນຕົວໄປທາງທິດເໜືອຢ່າງຊ້າໆ ໂດຍກົດອາກາດທີ່ຈຸດສູນກາງ 935 ເຮກໂຕປາສການ ແລະ ມີຄວາມໄວລົມສູງສຸດ 180 ກິໂລແມັດຕໍ່ຊົ່ວໂມງ ຮອບຈຸດສູນກາງ.

ທັງນີ້, ຖະແຫຼງການຂອງJMA ດັ່ງກ່າວ ຍັງຮຽກຮ້ອງໃຫ້ມີການດຳເນີນມາດຕະການເຝົ້າລະວັງຢ່າງເຂັ້ມງວດ ສໍາລັບເຫດພາຍຸລົມແຮງ, ດິນເຈື່ອນ ແລະ ແມ່ນ້ຳລົ້ນຝັ່ງ.