ໃນເວລາ 16:00ໂມງຂອງວັນທີ 23 ສິງຫາ ຜ່ານມານີ້, ຂະບວນຕູ້ລົດໄຟແຊ່ເຢັນທີ່ໄດ້ບັນທຸກຜັກ ແລະໝາກໄມ້ສົດ 400 ກວ່າໂຕນໄດ້ເດີນທາງອອກຈາກນະຄອນຢຸ້ຍຊີແຂວງຢຸນນານຈີນ ໄປສູ່ນະຄອນຫຼວງວຽງຈັນຂອງປະເທດລາວໂດຍຜ່ານທາງລົດໄຟຈີນ-ລາວ, ຫຼັງຈາກນັ້ນ, ໄດ້ປ່ຽນຖ່າຍຂົນສົ່ງໄປຕາມທາງຫຼວງອີກ 3 ວັນ, ຜັກແລະໝາກໄມ້ເຫຼົ່ານີ້ໄດ້ຖືກປ້ອນເຂົ້າຕະຫຼາດຜັກແລະໝາກໄມ້ສົດໃນນະຄອນຫຼວງບາງກອກປະເທດໄທຊຶ່ງເປັນຂີດໝາຍສະແດງໃຫ້ເຫັນວ່າ: ການຂົນສົ່ງຜັກ ແລະໝາກໄມ້ແຊ່ເຢັນຕາມທາງລົດໄຟສາກົນຈີນ-ລາວໄດ້ກ້າວເຂົ້າສູ່ສະພາບປົກກະຕິແລ້ວ. ການຂົນສົ່ງແບບນີ້ຈະສາມາດຮັກສາຄວາມສົດແລະຄຸນນະພາບຂອງຜັກ ແລະໝາກໄມ້ ຊຶ່ງໄດ້ສ່ອງແສງໃຫ້ເຫັນເຖິງທາງລົດໄຟຈີນ-ລາວມີປະສິດທິພາບສູງ ແລະມີຄວາມສະດວກສະບາຍໃນການຂົນສົ່ງສິນຄ້າສາກົນ.
ນັບແຕ່ໄດ້ເປີດບໍລິການເປັນຕົ້ນມາ, ທາງລົດໄຟຈີນ-ລາວໄດ້ມີບົດບາດອັນພົ້ນເດັ່ນຫຼາຍໃນການຂົນສົ່ງຜັກແລະໝາກໄມ້ສົດ. ນັບແຕ່ຕົ້ນປີເປັນຕົ້ນມາ, ທາງລົດໄຟຈີນ-ລາວໄດ້ຂົນສົ່ງໝາກໄມ້ທັງໝົດຫຼາຍກວ່າ 1 ແສນໂຕນ, ເພີ່ມຂຶ້ນປະມານ 120% ເມື່ອທຽບໃສ່ໄລຍະດຽວກັນຂອງປີກາຍ.
ເບື້ອງຫຼັງຂອງຜົນງານດັ່ງກ່າວແມ່ນທາງລົດໄຟຈີນ-ລາວໄດ້ຍົກຄວາມສາມາດດ້ານການຂົນສົ່ງຂອງຕົນໃຫ້ສູງຂຶ້ນເລື້ອຍໆ ແລະໄດ້ສ້າງລະບົບຈໍລະຈອນສິນຄ້າທີ່ນັບມື້ນັບສົມບູນຂຶ້ນ. ເພື່ອຮັບໃຊ້ການຂົນສົ່ງສິນຄ້າສາກົນໃຫ້ດີກວ່ເກົ່າ, ພາກສ່ວນທາງລົດໄຟໄດ້ປັບປຸງລະບົບຮາດແວແລະຊັອຟແວຕາມດ່ານທາງລົດໄຟບໍ່ຫານໃຫ້ສູງຂຶ້ນຢ່າງຮອບດ້ານຊຶ່ງໄດ້ເພີ່ມເສັ້ນທາງລົດໄຟສຳລັບການກວດກາຫຼາຍສາຍແລະຍົກລະດັບອຸປະກອນໃຫ້ສູງຂຶ້ນ ເພື່ອຮັບປະກັນວຽກງານກວດກາລົດຂົນສົ່ງຫຼາຍຮ້ອຍຄັນຕໍ່ມື້. ມາດຕະການເຫຼົ່ານີ້ໄດ້ຍົກຄວາມສາມາດນຳເຂົ້າແລະສົ່ງອອກສິນຄ້າຢູ່ດ່ານບໍ່ຫານໃຫ້ສູງຂຶ້ນຢ່າງຫຼວງຫຼາຍຊຶ່ງໄດ້ເປັນສິ່ງຄ້ຳປະກັນທີ່ແຂງແຮງໃຫ້ແກ່ການຂົນສົ່ງສິນຄ້າປະເພດຜັກແລະໝາກໄມ້.
ນອກນີ້, ພາກສ່ວນທາງລົດໄຟຍັງໄດ້ປະສານສົມທົບກັບພາກສ່ວນດ່ານແລະພາກສ່ວນກວດກາຊາຍແດນໃຫ້ດີກວ່ເກົ່າ, ໄດ້ຫຼຸດເວລາແຈ້ງຜ່ານດ່ານລົງຮອດ 5 ຊົ່ວໂມງຊຶ່ງຈະເຮັດໃຫ້ຜັກແລະໝາກໄມ້ສົດສາມາດເຂົ້າເຖິງຕະຫຼາດໄດ້ໄວກວ່າເກົ່າ.
ສິ່ງທີ່ໜ້າສົນໃຈນັ້ນກໍຄື: ໂດຍແນໃສ່ໝາກໄມ້ຕ່າງໆ ເຊັ່ນ: ໝາກຖົ່ວລຽນແລະໝາກມັງຄຸດທີ່ຕ້ອງການຂົນສົ່ງພາຍໃນເວລາສັ້ນ, ພາກສ່ວນທາງລົດໄຟໄດ້ປະຕິບັດມາດຕະການພິເສດທີ່ຈັດສັນໃຫ້ຂົນສົ່ງກ່ອນແລະອອກເດີນທາງກ່ອນ ພ້ອມທັງເສີມຂະຫຍາຍບົດບາດຂອງຂະບວນລົດໄຟຂົນສົ່ງສິນຄ້າສາກົນ “ສາຍດ່ວນແມ່ນ້ຳລ້ານຊ້າງ-ແມ່ນ້ຳຂອງ” ຢ່າງເຕັມທີ່ ເພື່ອຮັບປະກັນໃຫ້ໝາກໄມ້ທີ່ແຊບຫວານສົດຊື່ນເຫຼົ່ານີ້ສາມາດປ້ອນເຂົ້າຕະຫຼາດໃຫ້ໄດ້ໄວກວ່າເກົ່າ. ໝາກໄມ້ສົດທີ່ມາຈາກລາວ, ໄທແລະປະເທດອື່ນໆໃນອາຊີຕາເວັນອອກສ່ຽງໃຕ້ໄດ້ເຂົ້າສູ່ຕະຫຼາດຈີນໄດ້ໄວກວ່າເກົ່າໂດຍຜ່ານທາງລົດໄຟຈີນ-ລາວ, ຍອດມູນຄ່ານຳເຂົ້າໝາກໄມ້ໄດ້ກວມ 40% ຂຶ້ນໄປຂອງຍອດມູນຄ່ານຳເຂົ້າຕາມທາງລົດໄຟຈີນ-ລາວ.
ການຂົນສົ່ງສິນຄ້າຕາມທາງລົດໄຟຈີນ-ລາວໄດ້ພັດທະນາຢ່າງວ່ອງໄວ ບໍ່ພຽງແຕ່ໄດ້ຊຸກຍູ້ການໄປມາຫາສູ່ດ້ານເສດຖະກິດການຄ້າລະຫວ່າງຈີນແລະລາວເທົ່ານັ້ນ, ຫາກຍັງໄດ້ສ້າງໂອກາດພັດທະນາທີ່ບໍ່ເຄີຍມີມາກ່ອນໃຫ້ແກ່ການຄ້າຜັກແລະ ໝາກໄມ້ສົດຕ່າງໆ ລະຫວ່າງສອງປະເທດກໍຄືລະຫວ່າງຈີນແລະບັນດາປະເທດໃນອາຊີຕາເວັນອອກສ່ຽງໃຕ້ ຊຶ່ງໄດ້ກາຍເປັນເສັ້ນທາງຂົນສົ່ງຄຳສຳລັບການຂົນສົ່ງຜັກແລະໝາກໄມ້ສົດ. ຄຽງຄູ່ກັບປະລິມານການຂົນສົ່ງສິນຄ້າແລະລະບົບຈໍລະຈອນສິນຄ້າຕາມທາງລົດໄຟຈີນ-ລາວໄດ້ຮັບການປັບປຸງໃຫ້ດີຂຶ້ນຢ່າງຕໍ່ເນື່ອງ, ທາງລົດໄຟຈີນ-ລາວຈະເສີມຂະຫຍາຍບົດບາດທີ່ເປັນຊ່ອງທາງການຈໍລະຈອນສິນຄ້າສາກົນທີ່ມີຄວາມປອດໄພ, ມີປະສິດທິພາບສູງແລະສະດວກວ່ອງໄວຊຶ່ງຈະປະກອບສ່ວນຫຼາຍກວ່າເກົ່າເຂົ້າໃນການພັດທະນາການຄ້າສິນຄ້າສົດລະຫວ່າງຈີນແລະບັນດາປະເທດອາຊີຕາເວັນອອກສ່ຽງໃຕ້ໃຫ້ຈະເລີນຮຸ່ງເຮືອງຂຶ້ນຢ່າງບໍ່ຢຸດຢັ້ງ.
ໂດຍ: ຊີອາໄອ
