ກອງປະຊຸມແລກປ່ຽນບົດຮຽນວຽກງານສຶກສາທິການ ແລະ ກິລາລະຫວ່າງພະແນກສຶກສາທິການ ແລະ ກິລາ ແຂວງໄຊສົມບູນ ສປປ ລາວ ແລະ ວິທະຍາໄລເຊີນລາ ແຂວງເຊີນລາ ສສ ຫວຽດນາມໄດ້ຈັດຂຶ້ນໃນວັນທີ29ສິງຫາຜ່ານມານີ້ທີ່ຫ້ອງປະຊຸມພະແນກສຶກສາທິການ ແລະ ກິລາແຂວງໄຊສົມບູນ ນໍາໂດຍທ່ານ ຢົງຢີລີເຍ່ຍວືຫົວໜ້າພະແນກສຶກສາທິການ ແລະ ກິລາ ແຂວງໄຊສົມບູນ, ຕາງໜ້າຝ່າຍວິທະຍາໄລເຊີນລາ ນຳພາໂດຍ ທ່ານຫວງຽນວັນມີງຮອງຜູ້ອຳນວຍການໂຮງຮຽນວິທະຍາໄລເຊີນລາ ພ້ອມດ້ວຍຄະນະ ຕະຫຼອດພາກສ່ວນທີ່ກ່ຽວຂ້ອງ ທັງສອງຝ່າຍ ເຂົ້າຮ່ວມ.

ໂອກາດດັ່ງກ່າວ, ທ່ານຢົງຢີ ລີເຍ່ຍວືໄດ້ລາຍງານໂດຍຫຍໍ້ກ່ຽວກັບສະພາບການສຶກສາ ແລະ ກິລາຢູ່ ແຂວງໄຊສົມບູນ ໃຫ້ທ່ານ ຮອງຜູ້ອຳນວຍການໂຮງຮຽນວິທະຍາໄລເຊີນລາ ພ້ອມຄະນະ ໄດ້ຮັບຊາບວ່າ: ແຂວງໄຊສົມບູນ ມີໂຮງຮຽນແຕ່ຊັ້ນອະນຸບານຮອດຊັ້ນມັດທະຍົມສຶກສາຕອນປາຍ157 ແຫ່ງ. ສໍາລັບທຶນຮຽນຕໍ່ຕ່າງປະເທດໄລຍະຜ່ານມາແຕ່ປີ 2017-2024ແຂວງໄຊສົມບູນໄດ້ຮັບການຊ່ວຍເຫຼືອທຶນການສຶກສາຈາກ ແຂວງເຊີນລາ ຮຽນຕໍ່ໃນລະດັບຊັ້ນສູງ 81 ທຶນ, ຊັ້ນປະລິນຍາຕີ 76 ທຶນ, ສໍາລັບທຶນຮຽນຕໍ່ຫຼືທຶນຍົກລະດັບພະນັກງານພາຍໃນແຂວງ ແມ່ນຄະນະຈັດຕັ້ງ ແຂວງໄຊສົມບູນ ເປັນພາກສ່ວນຈັດສັນຕາມຕົວເລກທີ່ໄດ້ຮັບ.

ການຈັດກອງປະຊຸມທັງສອງຝ່າຍ ຄັ້ງນີ້ ກໍເພື່ອເປັນການປຶກສາຫາລືແລກປ່ຽນບົດຮຽນເຊິ່ງກັນ ແລະ ກັນລະຫວ່າງ ແຂວງໄຊສົມບູນ ແລະ ວິທະຍາໄລເຊີນລາ ແຂວງເຊີນລາ ສສຫວຽດນາມ ເພື່ອວາງແຜນການກະກຽມຄວາມພ້ອມ ໃຫ້ແກ່ການສົ່ງນັກຮຽນ, ນັກສຶກສາ, ພະນັກງານ-ລັດຖະກອນທີ່ຈະໄປສຶກສາຕໍ່ແລະຍົກລະດັບຄວາມຮູ້ຄວາມສາມາດຢູ່ວິທະຍາໄລເຊີນລາໃຫ້ມີຄວາມພ້ອມໃນທຸກດ້ານໃນຕໍ່ໜ້າ. ທັງໝົດນັ້ນ ໄດ້ສະແດງໃຫ້ເຫັນເຖິງຄວາມສາມັກຄີ, ຮັກແພງ, ໄມຕີຈິດທີ່ດີທີ່ສອງພັກ-ສອງລັດເຮົາມີຕໍ່ກັນມາແຕ່ດົນນານ ແລະ ຈະສືບຕໍ່ມູນເຊື່ອດັ່ງກ່າວ ໃຫ້ເກີດດອກອອກຜົນ ແລະ ງອກງາມຂຶ້ນຢ່າງບໍ່ຢຸດຢັ້ງ.

(ຂ່າວ: ນ. ຄຳໝັ້ນ ພຽງພິລາ)