ຂ່າວຕ່າງປະເທດລາຍງານ ໃນວັນທີ 2 ກັນຍາ ຜ່ານມາວ່າ: ທ່ານ ຄຸນຄິມ ລັດຖະມົນຕີອາວຸໂສ ແລະ ຮອງປະທານຄະນະກຳມະການຈັດການໄພພິບັດແຫ່ງຊາດກຳປູເຈຍ ເປີດເຜີຍວ່າ: ກຳປູເຈຍ ອອກແຜນການປະຕິບັດງານລະດັບຊາດ ດ້ານການຫຼຸດຜ່ອນຄວາມສ່ຽງຈາກໄພພິບັດ (2024-2028) ຊຶ່ງເນັ້ນຫຼຸດຜົນກະທົບຈາກໄພພິບັດຕໍ່ປະຊາຊົນ, ເສດຖະກິດ ແລະ ສັງຄົມ.

ທ່ານ ຄຸນຄິມ ກ່າວວ່າ: ແຜນການນີ້ຖືກອອກແບບມາຮັບມືກັບໄພພິບັດທີ່ເກີດຈາກນໍ້າຖ້ວມ, ພາ ຍຸ, ໄພແຫ້ງແລ້ງ, ໄຟໄໝ້ ແລະ ການພັງຖະຫຼົ່ມຂອງສິ່ງປຸກສ້າງ ຖືເປັນແຜນງານສ້າງຊຸມຊົນທີ່ປອດໄພ ແລະ ແຂງແກ່ງສຳລັບການພັດທະນາລະດັບຊາດທີ່ຍືນຍົງ. ໂດຍມີເປົ້າໝາຍຮ່ວມຫຼຸດຜ່ອນການເສຍຊີວິດ, ຄວາມເສຍຫາຍທາງເສດຖະກິດ ແລະ ຄວາມເສຍຫາຍຂອງໂຄງສ້າງພື້ນຖານ.

ແຜນການດຳເນີນງານນີ້ກຳນົດເປົ້າໝາຍຍຸດທະສາດ 4 ຂໍ້ ແລະ ໂຄງການດຳເນີນງານອີກ 18 ໂຄງການ, ໂດຍຄອບຄຸມການກຽມຄວາມພ້ອມຮັບມືກັບໄພພິບັດ ຫຼື ແຜນການຮັບມືສຸກເສີນ, ການກະກຽມຄວາມພ້ອມກູ້ໄພພິບັດ ແລະ ອຸປະກອນປ້ອງກັນ ຕະຫຼອດຈົນການເກັບກຳຂໍ້ມູນຂອງປະຊາຊົນກ່ຽວກັບອັນຕະລາຍຈາກໄພພິບັດ.

ອີກຢ່າງໜຶ່ງ, ກໍາປູເຈຍ ເປັນໜຶ່ງໃນກຸ່ມປະເທດທີ່ສ່ຽງໄພພິບັດຫຼາຍທີ່ສຸດໃນພາກພື້ນອາຊີຕາເວັນອອກສ່ຽງໃຕ້ ເນື່ອງຈາກຜົນກະທົບຈາກນໍ້າຖ້ວມ ແລະ ໄພແຫ້ງແລ້ງຕາມລະດູການ ໂດຍໄພພິບັດທາງທຳມະຊາດເຮັດໃຫ້ປະຊາຊົນໃນກໍາປູເຈຍເສຍຊີວິດ 103 ຄົນ ໃນປີ 2023 ຊຶ່ງເສຍຊີວິດຈາກຖືກຟ້າຜ່າ 84 ຄົນ,ນໍ້າຖ້ວມ 10 ລາຍ ແລະ ຈາກພາຍຸ 9 ຄົນ.