ວິທະຍຸກະຈາຍສຽງຫວຽດນາມລາຍງານ ໃນວັນທີ 2 ກັນຍາ ຜ່ານມາວ່າ: ບົດຂຽນໃນສື່ເອເລັກໂຕນິກ Times of India ທີ່ລົງໃນວັນທີ 1 ກັນຍາ ຜ່ານມາ ໄດ້ສັງລວມສະຖານທີ່ທ່ອງທ່ຽວ 5 ແຫ່ງຢູ່ອາຊີຕາເວັນອອກສ່ຽງໃຕ້ ໂດຍນັກທ່ອງທ່ຽວ ອິນເດຍ ເປັນຜູ້ຄັດເລືອກ. ໃນນັ້ນ, ຫວຽດນາມ ແມ່ນຖືກຄັດເລືອກຢູ່ໃນແຖວໜ້າ.
ຂ່າວລະບຸວ່າ: ຕາມບົດຂຽນ, ຫວຽດນາມ ໄດ້ເຮັດໃຫ້ນັກທ່ອງທ່ຽວມີການທົດລອງຕົວຈິງຫຼາຍຢ່າງຈາກບັນດາຖະໜົນທີ່ຄຶກຄື້ນຂອງຮ່າໂນ້ຍ, ນະຄອນ ໂຮ່ຈິມິນ ແລະຄວາມງາມດັ່ງໃນຝັນຂອງນະຄອນ ຍາຈາງ, ຄວາມອ່ອນໂຍນຂອງເມືອງເກົ່າເຫວ້ ຕະຫຼອດຮອດຄວາມສະຫງົບງຽບຂອງອ່າວຮະລອງ, ອາຫານການກິນທີ່ຂາຍຕາມແຄມທາງ ທັງແຊບ ແລະ ໜ້າກິນ,ລາຄາເປັນກັນເອງ. ບ່ອນພັກອາໄສກໍມີຫຼາຍຮູບຫຼາຍແບບຈາກເຮືອນພັກລາຄາຖືກ ຕະຫຼອດຮອດເຮືອນຮັບແຂກລາຄາທຳມະດາ ແລະ ໂຮງແຮມຊຶ່ງໄດ້ຊ່ວຍໃຫ້ນັກທ່ອງທ່ຽວ ສາມາດຊອກຫາສະຖານທີ່ເໝາະສົມກັບງົບປະມານຂອງຕົນເອງໄດ້ຢ່າງງ່າຍດາຍ. ບົດຂຽນ ກໍໄດ້ຢັ້ງຢືນວ່າ: ຍານພາຫະນະຈໍລະຈອນຢູ່ ຫວຽດນາມ ຊ່ວຍຫຼຸດຄ່າໃຊ້ຈ່າຍສຳລັບການໄປ - ມາໃຫ້ແກ່ນັກທ່ອງທ່ຽວ.
ໃນບັນຊີລາຍຊື່ສະຖານທີ່ທ່ອງທ່ຽວ 5 ແຫ່ງ ຢູ່ອາຊີຕາເວັນອອກສ່ຽງໃຕ້ ໂດຍນັກທ່ອງທ່ຽວອິນເດຍ ຄັດເລືອກ ຊຶ່ງTime of India ໄດ້ເອົາລົງນັ້ນ ຖັດຈາກ ຫວຽດນາມ ແມ່ນ ກຳປູເຈຍ, ລາວ, ມຽນມາ ແລະ ໄທ.
