ໃນວັນທີ 3 ກັນຍາຜ່ານມາ ກອງທັບປະຊາຊົນລາວໄດ້ຮັບກຽດເປັນເຈົ້າພາບຈັດກອງ​ປະ​ຊຸມ​ຫົວໜ້າສືບຂ່າວທະຫານອາຊຽນຄັ້ງທີ 21 (AMIM) ທີ່ນະຄອນຫຼວງວຽງຈັນສປປ ລາວໂດຍການເປັນປະທານຂອງທ່ານ ພົນຈັດຕະວາ ບົວວັນ ອາດຖະໜາໄຊ ຫົວໜ້າກົມ 213 ກອງທັບປະຊາຊົນລາວ, ມີບັນດາຫົວໜ້າສືບຂ່າວທະຫານຂອງກອງທັບບັນດາປະເທດອາຊຽນ, ຕີມໍແລັດສະເຕໃນນາມເປັນປະເທດສັງເກດການເຂົ້າຮ່ວມ.

ທ່ານ ພົນຈັດຕະວາ ບົວວັນ ອາດຖະໜາໄຊໄດ້ກ່າວຕ້ອນຮັບບັນດາຫົວໜ້າສືບຂ່າວທະຫານອາຊຽນ ພ້ອມດ້ວຍຄະນະຜູ້ແທນຈາກບັນດາປະເທດສະມາຊິກອາຊຽນ ແລະ ຕີມໍແລັດສະເຕພ້ອມທັງສະແດງຄວາມຊົມເຊີຍຕໍ່ຜົນສຳເລັດໃນການເປັນປະທານຂອງກອງທັບອິນໂດເນເຊຍໃນການເປັນປະທານກອງປະຊຸມຫົວໜ້າສືບຂ່າວທະຫານອາຊຽນຄັ້ງທີ 20 ໃນປີ 2023 ທີ່ຜ່ານມາ.

ອາຊີຕາວັນອອກສ່ຽງໃຕ້ແມ່ນໜຶ່ງໃນເຂດຍຸດທະສາດທີ່ສໍາຄັນທາງດ້ານພູມສາດການເມືອງ, ການທະຫານ ແລະ ເສດຖະກິດ-ສັງຄົມໃນພາກພື້ນ. ປັດຈຸບັນພາກພື້ນ ແລະ ໃນໂລກຍັງສືບຕໍ່ປະເຊີນໜ້າກັບໄພຂົ່ມຂູ່ ແລະ ສິ່ງທ້າທາຍຕໍ່ຄວາມໝັ້ນຄົງທັງແບບເກົ່າ ແລະ ໃໝ່ສົ່ງຜົນກະທົບທາງກົງ ແລະ ທາງອ້ອມ ຕໍ່ສັນຕິພາບ, ສະຖຽນລະພາບທາງດ້ານການເມືອງ, ຄວາມໝັັ້ນຄົງ ແລະ ການພັດທະນາຂອງພາກພື້ນ. ສະນັ້ນ, ອາຊຽນພວກເຮົາຈະຕ້ອງໄດ້ສືບຕໍ່ຮ່ວມມືໃນການຮັບມືກັບສິ່ງທ້າທາຍດັ່ງກ່າວ. ກອງປະຊຸມຄັ້ງນີ້ຍັງເປັນໂອກາດດີສໍາລັບອາຊຽນພວກເຮົາ ເພື່ອແລກປ່ຽນທັດສະນະກ່ຽວກັບການເສີມສ້າງການຮ່ວມມືຂອງຂະແໜງການສືີບຂ່າວທະຫານອາຊຽນ ເພື່ອປະກອບສ່ວນເຂົ້າໃນການພົວພັນຮ່ວມມືດ້ານປ້ອງກັນຊາດຂອງອາຊຽນ ແລະ ເພື່ອປົກປັກຮັກສາສັນຕິພາບ, ຄວາມໝັ້ນຄົງ ແລະ ຄວາມເຂັ້ມແຂງຂອງພາກພື້ນຊຶ່ງສອດຄ່ອງກັບເນື້ອໃນຈິດໃຈລວມຂອງຄໍາຂວັນກອງປະຊຸມຜູ້ບັນຊາການທະຫານສູງສຸດອາຊຽນ, ກອງປະຊຸມລັດຖະມົນຕີປ້ອງກັນປະເທດອາຊຽນ ແລະ ບັນດາກອງປະຊຸມປີ່ນອ້ອມໃນປີນີ້ທີ່ວ່າ: “ຮ່ວມມືກັນເພື່ອສັນຕິພາບ, ຄວາມໝັ້ນຄົງ ແລະ ຄວາມເຂັ້ມແຂງຂອງອາຊຽນ”ພ້ອມກັນນີ້, ໃນກອງປະຊຸມໄດ້ປືກສາຫາລື ແລະ ຮັບຮອງຮ່າງຖະແຫຼງການຮ່ວມກອງປະຊຸມຜູ້ບັນຊາການທະຫານສູງສຸດອາຊຽນຄັ້ງທີ 21 ຊຶ່ງເປັນເອກະສານໜຶ່ງທີ່ສໍາຄັນ ແລະ ເປັນພື້ນຖານໃຫ້ແກ່ການສົ່ງເສີມການຮ່ວມມືຂອງທະຫານອາຊຽນ.

ຂ່າວ-ພາບ: ໄພນາລິນ