ໃນໂອກາດທີ່ເຄື່ອນໄຫວຢ້ຽມຢາມ ແລະ ເຮັດວຽກ ຢູ່ທີ່ແຂວງເຊກອງ ໃນລະຫວ່າງ ວັນທີ 7-8 ກັນຍາ ຜ່ານມາ ຂອງສອງຄະ​ນະ​ກຳ​ມະ​ການຮ່ວ​ມມືລາວ-ຫວຽດ​ນາມ ແລະ ຫວຽດນາມ-ລາວ. ໃນວັນທີ 7 ກັນຍາ 2024,ທ່ານ ເພັດ ພົມພິພັກ ລັດຖະມົນຕີກະຊວງແຜນການ ແລະ ການລົງທຶນ ປະ​ທານຄະ​ນະ​ກຳ​ມະ​ການຮ່ວ​ມມືລາວ-ຫວຽດ​ນາມ ແລະ ທ່ານ ຫງວຽນຈີ້ຢຸ້ງລັດ​ຖະ​ມົນ​ຕີ​ກະ​ຊວງ​ແຜນ​ການແລະການ​ລົງ​ທຶນ ຫວຽດນາມປະ​ທານຄະ​ນະ​ກຳ​ມະ​ການຮ່ວ​ມມືຫວຽດ​ນາມ-ລາວ ພ້ອມດ້ວຍຄະຜູ້ແທນ ທັງ​ສອງ​ຝ່າຍໄດ້ລົງຊຸກຍູ້ຕິດຕາມ ຄວາມຄືບໜ້າໃນການຈັດຕັ້ງປະຕິບັດໂຄງການຜະລິດຖ່ານຫີນເພື່ອຂາຍ ແລະ ໂຄງການໂຮງໄຟຟ້າພະລັງງານຄວາມຮ້ອນຖ່ານຫີນ ຂອງບໍລິສັດ ພະລັງງານໄຟຟ້າເຊກອງ ຈຳກັດ ຢູ່ທີ່ເມືອງກະ​ລຶມ ແຂວງເຊກອງ.

ໂຄງການຜະລິດຖ່ານຫີນເພື່ອຂາຍມີເນື້ອທີ່ທັງໝົດ (ປີ 2024)562,32 ຕາລາງກິໂລແມັດ ແບ່ງອອກເປັນເນື້ອທີ່ຂຸດຄົ້ນ 135,37 ຕາລາງກິໂລແມັດ, ເນື້ອທີ່ສຶກສາບົດວິພາກເສດຖະກິດ 110,51 ຕາລາງກິໂລແມັດ, ເນື້ອທີ່ສົ່ງຄືນ 140 ຕາລາງກິໂລແມັດ, ເນື້ອທີ່ຊອກຄົ້ນສໍາຫຼວດ 196,44 ຕາລາງກິໂລແມັດ, ພາຍຫຼັງສົ່ງຄືນໃຫ້ລັດຖະບານບາງສ່ວນແລ້ວ ໃນປີ 2025 ຈະເຫຼືອເນື້ອທີ່ທັງໝົດ 442,32 ຕາລາງກິໂລແມັດ.

ປັດຈຸບັນ, ການຊອກຄົ້ນ-ສຳຫຼວດແຮ່ຖ່ານຫີນ ໄດ້ສຳເລັດໄປແລ້ວ 20.280 ເຮັກຕາ ເທົ່າກັບ 46% ຂອງເນື້ອທີ່ສຳປະທານທັງໝົດ ແລະ ມີແຜນສືບຕໍ່ການຊອກຄົ້ນ-ສຳຫຼວດໃຫ້ສຳເລັດທັງໝົດໃນອະນາຄົດ ເພື່ອຊອກຫາແຫຼ່ງສະສົມຖ່ານຫີນແຫ່ງໃໝ່ເພີ່ມຕື່ມ,ໂຄງການໂຮງໄຟຟ້າພະລັງງານຄວາມຮ້ອນຖ່ານຫີນ ຕັ້ງຢູ່ແຄມແມ່ນໍ້າເຊກອງ ໃກ້ກັບເມືອງກະລຶມເກົ່າ ແຂວງເຊກອງ,​ ໂຄງການປະກອບດ້ວຍອົງປະກອບຫຼັກ 3 ສ່ວນຄື: ໂຮງງານໄຟຟ້າຖ່ານຫີນ ແບບ Supercritical,ບໍ່ຖ່ານຫີນ Anthracite ແບບເປີດ, ກົນຈັກ ແລະ ສິ່ງອໍານວຍຄວາມສະດວກຕ່າງໆ ແລະ ບໍ່ຫີນປູນ, ສາຍສົ່ງໄຟຟ້າແຮງສູງແບບວົງຈອນຄູ່ ຂະໜາດ 500kvໄລຍະທາງ 254kmເຊື່ອມຕໍ່ໂຮງງານໄຟຟ້າກັບຊາຍແດນລາວ-ກຳປູເຈຍ ຢູ່ສະຖານີໄຟຟ້າບ້ານຫາດ ແຂວງຈຳປາສັກ.

ນອກນັ້ນ, ທັງສອງຄະນະ ກໍໄດ້ໄປຢ້ຽມຢາມໂຄງການຂຸດຄົ້ນ ແລະ ປຸງແຕ່ງແຮ່ບົກຊິດ ແລະ ກໍ່ສ້າງໂຮງງານອາລູມີນຽມ ຂອງບໍລິສັດຫວຽດເຟືອງ ຢູ່ທີ່ ເມືອງດາກຈຶງ ແຂວງເຊກອງ. ໂຄງການດັ່ງກ່າວ ໄດ້ເລີ່ມຈັດຕັ້ງປະຕິບັດໂຄງການ ແຕ່ປີ 2022ແລະ ຂະໜາດຂອງໂຄງການຄາດຄະເນກຳລັງການຜະລິດ 1.000.000 ໂຕນຕໍ່ປີ, ປັດຈຸບັນໂຄງການກຳລັງກໍ່ສ້າງອ່າງເກັບນໍ້າ ຊຶ່ງຈະສຳເລັດໃນປີ 2025 ແລະ ສືບຕໍ່ກໍ່ສ້າງໂຮງງານອາລູມີນຽມ ໂດຍຄາດຄະເນໃນການກໍ່ສ້າງໂຮງງານໃຫ້ສໍາເລັດ ແລະ ເລີ່ມການຜະລິດອາລູມີນ​ຽມ ໃນປີ 2027. ໃນການລົງທຶນດັ່ງກ່າວຖືວ່າເປັນການສ້າງພື້ນຖານອຸດສາຫະກຳປຸງແຕ່ງແຮ່ບົກຊິດຂອງ ສປປ ລາວ ຊຶ່ງແຂວງເຊກອງ ແລະ ແຂວງອັດຕະປື ມີການສະກັດຂອງແຮ່ດັ່ງກ່າວເປັນຈຳນວນຫຼາຍທີ່ຈະເປັນພື້ນຖານສຳຄັນຂອງການພັດທະນາແຮ່ທາດອື່ນໆ ໃຫ້ເປັນອຸດສາຫະກຳໃນຕໍ່ໜ້າ.