ຂ່າວສານຫວຽດນາມລາຍງານວ່າ: ອັດຕາເງິນເຟີ້ຂອງເຢຍລະມັນໃນເດືອນສິງຫາຫຼຸດລົງໃນລະດັບຕໍ່າສຸດໃນຮອບຫຼາຍກວ່າ 3 ປີ. ຂໍ້ມູນນີ້ອາດຈະຊ່ວຍໃຫ້ທະນາຄານກາງເອີຣົບ (ECB) ຕັດຫຼຸດອັດຕາດອກເບ້ຍໄດ້ຢ່າງງ່າຍດາຍໃນອາທິດນີ້, ອີງຕາມການຄາດຄະເນຂອງຜູ້ຊ່ຽວຊານ.
ຂ່າວລະບຸວ່າ: ອັດຕາເງິນເຟີ້ໃນ ເຢຍລະມັນ ຫຼຸດລົງເຖິງ 2% ໃນເດືອນສິງຫາ 2024 ຊຶ່ງເປັນລະດັບຕໍ່າສຸດນັບຕັ້ງແຕ່ເດືອນມິຖຸນາ 2021 ຍ້ອນລາຄາພະລັງງານຫຼຸດລົງ, ໃນຂະນະທີ່ອັດຕາເງິນເຟີ້ໃນເດືອນກໍລະກົດ 2024 ເພີ່ມຂຶ້ນ 2,6% ເມື່ອທຽບໃສ່ໄລຍະດຽວກັນຂອງປີກາຍ.
ອັດຕາເງິນເຟີ້ພື້ນຖານ ຊຶ່ງບໍ່ລວມລາຄາອາຫານ ແລະ ພະລັງງານທີ່ເໜັງຕີງ, ຫຼຸດລົງເລັກນ້ອຍເຖິງ 2,8% ໃນເດືອນສິງຫາ 2024 ຈາກ 2,9% ໃນເດືອນກ່ອນນີ້.
ໃນເດືອນສິງຫາ 2024, ລາຄາພະລັງງານໃນ ເຢຍລະມັນ ຫຼຸດລົງ 5,1% ເມື່ອທຽບກັບໄລຍະດຽວກັນຂອງປີກາຍ, ໃນຂະນະທີ່ລາຄາອາຫານເພີ່ມຂຶ້ນຢ່າງໄວວາເປັນເດືອນທີ 5 ຕິດຕໍ່ກັນ.
ຂໍ້ມູນຈາກອົງການສະຖິຕິ ເຢຍລະມັນ ສະແດງໃຫ້ເຫັນວ່າລາຄາອາຫານໃນເດືອນສິງຫາ 2024 ເພີ່ມຂຶ້ນ 1,5% ເມື່ອທຽບໃສ່ໄລຍະດຽວກັນຂອງປີກາຍ. ລາຄາການບໍລິການໃນເດືອນສິງຫາ 2024 ເພີ່ມຂຶ້ນຢ່າງຫຼວງຫຼາຍເມື່ອທຽບໃສ່ອັດຕາເງິນເຟີ້ທົ່ວໄປ, ເພີ່ມຂຶ້ນ 3,9% ເມື່ອທຽບໃສ່ໄລຍະດຽວກັນຂອງປີກາຍ.