ວິທະຍຸກະຈາຍສຽງຫວຽດນາມລາຍງານວ່າ: ໃນວັນທີ 12 ກັນຍາ ຜ່ານມາທ່ານ ຟ້າມມິງຈິງ ນາຍົກລັດຖະມົນຕີ ຫວຽດນາມ ໄດ້ກວດກາສະພາບຝົນຕົກນ້ຳຖ້ວມ ແລະ ແກ້ໄຂຜົນຮ້າຍຢ້ອນຫຼັງຢູ່ແຂວງ ອຽນບາຍ.
ຂ່າວລະບຸວ່າ: ທ່ານນາຍົກລັດຖະມົນຕີ ຫວຽດນາມ ໄດ້ແບ່ງເບົາ, ລະດົມກຳລັງໃຈປະຊາຊົນຜ່ານຜ່າຄວາມຫຍຸ້ງຍາກ, ກັບຄືນສູ່ຊີວິດການເປັນຢູ່ປົກກະຕິໂດຍໄວ, ຮຽກຮ້ອງບັນດາກຳລັງພະຍາຍາມສຸມແຫຼ່ງກຳລັງຊ່ວຍເຫຼືອພໍ່ແມ່ປະຊາຊົນ, ພ້ອມກັບປະຊາຊົນແກ້ໄຂຜົນຮ້າຍຢ້ອນຫຼັງຈາກໄພນ້ຳຖ້ວມ. ທ່ານຍັງໄດ້ໄປຢ້ຽມຢາມໂຮງຮຽນອະນຸບານຮວາລານ ແລະ ໂຮງຮຽນອະນຸບານແອັງເຢືອງ ທີ່ນະຄອນອຽນບາຍ ຊຶ່ງເປັນບ່ອນຫຼົບໄພຂອງປະຊາຊົນ 170 ກວ່າຄົນ ໃນຫຼາຍວັນຜ່ານມາ.
ຫຼັງຈາກນັ້ນ, ທ່ານ ຟ້າມມິງຈິງ ກໍໄດ້ເຂົ້າຮ່ວມກອງປະຊຸມດ່ວນກັບການນຳກະຊວງ, ຂະແໜງການ ແລະ ແຂວງອຽນບາຍ ຢູ່ສຳນັກງານຄະນະກຳມະການປະຊາຊົນແຂວງ ແລະ ໃນວັນດຽວກັນ, ວຽກງານກູ້ໄພກູ້ຊີບປະຊາຊົນຢູ່ເຂດຖືກໄພນ້ຳຖ້ວມກໍໄດ້ສືບຕໍ່ດຳເນີນການ.