ວັນທີ 15 ກັນຍາ ນີ້ທີ່ສະໜາມບິນສາກົນວັດໄຕນະຄອນຫຼວງວຽງຈັນສປປ ລາວໄດ້ມີພິທີມອບ-ຮັບ ເຄື່ອງຊ່ວຍເຫຼືອບັນເທົາທຸກສຸກເສີນໄພພິບັດນໍ້າຖ້ວມຈາກລັດຖະບານ ແຫ່ງ ສາທາລະນະລັດ ອິນເດຍ ມອບໃຫ້ແກ່ ສປປ ລາວ, ໂດຍຕາງໜ້າລັດຖະບານແຫ່ງ ສປປ ລາວ ຮັບໂດຍ ທ່ານ ລີປາວ ຢ່າງຮອງລັດຖະມົນຕີກະຊວງແຮງງານ ແລະ ສະຫວັດດີການສັງຄົມ (ຮສສ) ແລະ ຕາງໜ້າລັດຖະບານ ແຫ່ງ ສອິນເດຍ ມອບໂດຍ ທ່ານ ປຣາຊານ ອາກຣາວາລ (Prashant Agrawal) ເອກອັກຄະລັດຖະທູດ ແຫ່ງ ສອິນເດຍ ປະຈໍາ ສປປ ລາວ, ມີພາກສ່ວນກ່ຽວຂ້ອງຂອງທັງສອງຝ່າຍເຂົ້າຮ່ວມເປັນສັກຂິພິຍານ.
ເຄື່ອງຊ່ວຍເຫຼືອທີ່ ສ ອິນເດຍ ນໍາມາມອບໃນຄັ້ງນີ້ ແມ່ນເຄື່ອງຊ່ວຍເຫຼືອດ້ານມະນຸດສະທໍາ ເພື່ອນໍາໃຊ້ເຂົ້າໃນການຊ່ວຍເຫຼືອສຸກເສີນແກ່ຜູ້ປະສົບໄພພິບັດຕ່າງໆຊຶ່ງຈະເປັນການປະກອບສ່ວນອັນສໍາຄັນໜຶ່ງໃຫ້ແກ່ ສປປ ລາວ ໃນການກຽມຄວາມພ້ອມເພື່ອສາມາດຮັບມືກັບໄພພິບັດສຸກເສີນໄດ້ຢ່າງວ່ອງໄວ ແລະ ມີປະສິດທິພາບຍິ່ງຂຶ້ນ ໃນການຊ່ວຍເຫຼືອຊຸມຊົນ ກໍຄືປະຊາຊົນທີ່ໄດ້ຮັບຜົນກະທົບຈາກໄພພິບັດ ແລະ ເຫດການສຸກເສີນຕ່າງໆ, ໂດຍສະເພາະກໍແມ່ນຜູ້ທີ່ໄດ້ຮັບຜົນກະທົບຈາກໄພນໍາຖ້ວມທີ່ກໍາລັງເກີດຂຶ້ນຢູ່ຫຼາຍຂົງເຂດຂອງ ສປປ ລາວ.
ເຄື່ອງຊ່ວຍເຫຼືອຄັ້ງນີ້ປະກອບມີ: ເມັດຄລໍຣິນ (chlorine) ຈໍານວນ 10 ລ້ານເມັດ, ຜົງຟອກຂາວ ຈໍານວນ 1000 kg, ນໍ້າຢາຂ້າເຊື້ອໂຣກ ຈໍານວນ 1.000 ລິດ, ເຄື່ອງກອງນໍ້າ ຈໍານວນ 2.000 ເຄື່ອງ, ເຄື່ອງປັ່ນໄຟຂະໜາດ 30 KVA ຈໍານວນ 1 ເຄື່ອງ, ຊຸດອະນາໄມ ຈໍານວນ 1.000 ຊຸດ, ເຄື່ອງໃຊ້ພາຍໃນຄົວເຮືອນ ຈໍານວນ 1.000 ຊຸດ, ຖົງນອນ ຈໍານວນ 1.000 ຊຸດ, ມຸ້ງ ຈໍານວນ 2.500 ດາງ ແລະ ຢາກັນຍຸງ ຈໍານວນໜຶ່ງ ລວມມູນຄ່າປະມານ 100.000 ໂດລາ (ປະມານ 2,2 ຕື້ກີບ).
ຂ່າວ-ພາບ ຮສສ