ຂ່າວສານຊີອາໄອລາຍງານ ໃນວັນທີ 15 ກັນຍາ ຜ່ານມາວ່າ: ພາຍຸໄຕ້ຝຸ່ນຢາກິໄດ້ພັດຜ່ານລາວ, ມຽນມາ, ຫວຽດນາມ ແລະ ໄທໃນທ້າຍອາທິດແລ້ວນີ້ໄດ້ເຮັດໃຫ້ມີຝົນຕົກໜັກ, ພາໃຫ້ເກີດໄພນໍ້າຖ້ວມ ແລະ ດິນພູເຈື່ອນ ຊຶ່ງເຮັດໃຫ້ມີຜູ້ເສຍຊີວິດ, ບາດເຈັບຈຳນວນຫຼາຍ ແລະ ມີຜົນເສຍຫາຍທາງເສດຖະກິດຈຳນວນຫຼວງຫຼາຍ.
    ນັບມາຮອດຕອນເຊົ້າວັນທີ 15 ກັນຍາ ຜ່ານມານີ້, ພາຍຸໄຕ້ຝຸ່ນຢາກິໄດ້ເຮັດໃຫ້ຫວຽດນາມມີຜູ້ເສຍຊີວິດ 281 ຄົນ ແລະ 67 ຄົນຫາຍສາບສູນ. ສ່ວນຢູ່ມຽນມາ ມີຜູ້ເສຍຊີວິດເພີ່ມຂຶ້ນຮອດ 74 ຄົນ ແລະ ຍັງມີ 89 ຄົນຫາຍສາບສູນ, ຈຳນວນປະຊາຊົນປະສົບໄພເກືອບ 240.000 ຄົນ. ປັດຈຸບັນ,  ເຂດປະສົບໄພນ້ຳຖ້ວມສ່ວນໃຫຍ່ຢູ່ມຽນມາຍັງມີສະພາບໜັກໜ່ວງ,  ລະບົບການສື່ສານ ແລະ ການຄົມມະນາຄົມຖືກຕັດຂາດ.