ວິທະຍຸກະຈາຍສຽງຫວຽດນາມລາຍງານວ່າ: ກອງປະຊຸມສື່ມວນຊົນກຸ່ມບັນດາພື້ນຖານເສດຖະກິດຫາກໍພົ້ນເດັ່ນຂຶ້ນ (BRICS)ຄັ້ງທີ 7 ໄດ້ຈັດຂຶ້ນໃນວັນທີ 14  ກັນຍາ ຜ່ານມາ ຢູ່ ນະຄອນຫຼວງມົສກູປະເທດຣັດເຊຍ. ດ້ວຍຫົວຂໍ້ “ບົດບາດຂອງສື່ມວນຊົນໃນໂລກຫຼາຍຂົ້ວ”, ເຂົ້າຮ່ວມກອງປະຊຸມມີຜູ້ຕາງ       ໜ້າຈາກບັນດາກະຊວງ, ຂະແໜງການຂອງຣັດເຊຍ, ບັນດາເຈົ້າໜ້າທີ່ຂັ້ນສູງ, ການນຳບັນດາອົງການສື່ມວນຊົນແຖວໜ້າຂອງບັນດາປະເທດ BRICS ແລະ ບັນດາປະເທດທີ່ໃຫ້ຄວາມສົນໃຈເຖິງການເປີດກວ້າງການຮ່ວມມືກັບກຸ່ມນີ້. ໃນວາລະເປີດກອງປະຊຸມ, ທ່ານ ເຊີເກ ລັຟລອຟ ລັດຖະມົນຕີການຕ່າງປະເທດ ຣັດເຊຍ ເນັ້ນໜັກເຖິງບົດບາດສຳຄັນຂອງສື່ມວນຊົນໃນການຊຸກຍູ້ການພົວພັນແລກປ່ຽນລະຫວ່າງບັນດາປະເທດ, ສ້າງບັນຍາກາດມິດຕະພາບ, ຄວາມໄວ້ເນື້ອເຊື່ອໃຈ ແລະ ຄວາມເຂົ້າໃຈຊຶ່ງກັນ ແລະ ກັນລະຫວ່າງບັນດາຊົນຊາດ.
ໃນຂອບເຂດກອງປະຊຸມ, ໄດ້ດຳເນີນວາລະກອງປະຊຸມຄົບຄະນະຂອງປະຊາຄົມສື່ມວນຊົນ BRICS ໃນການປັບປຸງສະຖຽນລະພາບ ແລະ ການຮ່ວມມືໃນໂລກຫຼາຍຂົ້ວ. ໃນວັນທີ 15 ກັນຍາ ນີ້ໄດ້ດຳເນີນກອງປະຊຸມຄົບຄະນະສື່ມວນຊົນ BRICS: ການຫັນປ່ຽນເຕັກໂນໂລຊີບົນເສັ້ນທາງໃໝ່. ກອງປະຊຸມຄັ້ງນີ້ຈະສິ້ນສຸດດ້ວຍການອອກຖະແຫຼງການຮ່ວມ.