ຂ່າວສານຫວຽດນາມລາຍງານວ່າ: ທ່ານ ໂຣເບີໂຕ ໂບກາ ຜູ້ອຳນວຍການສູນພະລັງງານ ແລະ ວັດສະດຸ ແລະ ຍັງເປັນສະມາຊິກຄະນະບໍລິຫານງານເວທີປາໄສເສດຖະກິດໂລກ (WEF) ໃຫ້ຄຳເຫັນວ່າ: ແຫຼ່ງພະລັງງານອັນໃຫຍ່ຫຼວງຂອງຕາເວັນອອກກາງ ສາມາດຊ່ວຍພາກພື້ນນີ້ມີບົດບາດສຳຄັນໃນລະບົບປັນຍາປະດິດ (AI), ຍ້ອນວ່າເຕັກໂນໂລຊີດັ່ງກ່າວແມ່ນອີງໃສ່ສູນຂໍ້ມູນຂະໜາດໃຫຍ່ທີ່ຕ້ອງການພະລັງງານຢ່າງຫຼວງຫຼາຍ.
ຂ່າວລະບຸວ່າ: ໃນການໃຫ້ສໍາພາດກັບໜັງສືພິມ "The National News" ຂອງ ສະຫະລັດ ອາຣັບເອມີເຣດ (UAE) ຢູ່ນອກກອງປະຊຸມອຸປະກອນໂລກ (WUC) ທີ່ຈັດຂຶ້ນຢູ່ ນະຄອນຫຼວງອາບູດາບີ ໃນວັນທີ 16 ກັນຍາ ຜ່ານມາ, ທ່ານ ໂຣເບີໂຕ ໂບກາ ກ່າວວ່າ: ປະເທດຕາເວັນອອກກາງໄດ້ຮັບການເອື້ອອໍານວຍຈາກທຳມະຊາດ ປະກອບດ້ວຍຊັບພະຍາກອນນ້ຳມັນ ແລະ ແສງແດດທີ່ອຸດົມສົມບູນ, ໃນຂະນະທີ່ຫຼາຍປະເທດໃນພາກພື້ນພວມສຸມໃສ່ໃນດ້ານພະລັງງານນິວເຄລຍ, ໂດຍສະເພາະ UAE, ດັ່ງນັ້ນມີຫຼາຍທາງເລືອກໃນການສະໜອງພະລັງງານທີ່ຈໍາເປັນສໍາລັບສູນຂໍ້ມູນ.
ອົງການພະລັງງານສາກົນ (IEA) ຄາດຄະເນວ່າ: ການຊົມໃຊ້ໄຟຟ້າທັງໝົດຂອງສູນຂໍ້ມູນອາດຈະເພີ່ມຂຶ້ນເປັນ 1.000 ເທລະວັດ/ຊົ່ວໂມງ ໃນປີ 2026, ເພີ່ມຂຶ້ນຈາກ 460 ເທລະວັດ/ຊົ່ວໂມງໃນປີ 2022.
ໃນບົດລາຍງານທີ່ເຜີຍແຜ່ໃນເດືອນກໍລະກົດ 2024, IEA ກ່າວວ່າ: ຄວາມຕ້ອງການໄຟຟ້າທົ່ວໂລກຄາດວ່າຈະເພີ່ມຂຶ້ນປະມານ 4% ໃນປີ 2024 ຊຶ່ງເປັນການເພີ່ມຂຶ້ນສູງສຸດນັບແຕ່ປີ 2007.