ຂ່າວຕ່າງປະເທດລາຍງານໃນທ້າຍອາທິດຜ່ານມາວ່າ: ກຳ​ປູ​ເຈຍ​ແລະ​ມາ​ເລ​ເຊຍ​ໄດ້​ເປີດນຳໃຊ້ລະບົບ​ການ​​ຊໍາ​ລະ​ເງິນຂ້າມຊາຍແດນ​ຜ່ານQR code.

ທ່ານ ເຈຍ ສະເຣຍ ຜູ້ວ່າການທະນາຄານກາງກໍາປູເຈຍ (NBC)ກ່າວໃນງານການເປີດນຳໃຊ້ລະບົບດັ່ງກ່າວ ທີ່ນະຄອນຫຼວງພະນົມເປັນ ວ່າ:ພົນລະເມືອງຂອງທັງສອງປະເທດຈະສາມາດຊໍາລະເງິນຂ້າມຊາຍແດນຜ່ານແອັບພລິເຄຊັນBakongຫຼື Maybank M2U KH ຂອງກຳປູເຈຍ ແລະDuitNow QR ຂອງPaynetເຄືອຂ່າຍການຊຳລະເງິນໃນມາເລເຊຍ.

ການເຊື່ອມຕໍ່ໄລຍະທຳອິດຈະອຳນວຍຄວາມສະດວກໃຫ້ນັກທ່ອງທ່ຽວກຳປູເຈຍສາມາດຊຳລະເງິນໄດ້ຢ່າງມີປະສິດທິພາບ ແລະ ປອດໄພຍິ່ງຂຶ້ນ ໂດຍນຳໃຊ້ແອັບ Bakongຫຼື M2U KH ເພື່ອສະແກນ ແລະ ຊຳລະເງິນທີ່ຮ້ານຄ້າຫຼາຍກວ່າ 2ລ້ານແຫ່ງທີ່ສະແດງສັນຍາລັກDuitNow QR ຂອງPaynet ຊຶ່ງເປັນລະບົບການຊຳລະເງິນຜ່ານQR codeລະດັບປະເທດຂອງມາເລເຊຍ ໂດຍໃຊ້ສະກຸນເງິນ​ຣຽວ ຂອງກໍາ​ປູ​ເຈຍ​ເປັນ​ສະ​ກຸນ​ເງິນ​ພື້ນ​ຖານ​ສໍາ​ລັບ​ການ​ເຮັດ​ທຸ​ລະ​ກໍາ​.

ສໍາລັບໄລຍະເວລາຕໍ່ໄປ ພົນລະເມືອງໃນປະເທດມາເລເຊຍຈະສາມາດໃຊ້ແອັບພລິເຄຊັນ ຂອງທະນາຄານການຄ້າທີ່ເຂົ້າຮ່ວມເພື່ອສະແກນລະຫັດ KHQR Codesຢູ່ຕາມຮ້ານຄ້າຕ່າງໆໃນກຳປູເຈຍ.

ທ່ານ ເຈຍ ສະເຣຍເຊື່ອ​ໝັ້ນ​ວ່າ​ລະບົບ​ໃໝ່​ນີ້ຈະ​ມີ​ບົດບາດ​ສຳຄັນ​ໃນ​ການ​ຊຸກຍູ້​ການທ່ອງທ່ຽວ, ກະ​ຕຸ້ນ​ກິດ​ຈະ​ກໍາ​ການ​ຄ້າ​ ແລະ ພັດທະນາການເຂົ້າເຖິງບໍລິການທາງດ້ານການເງິນຂອງທັງສອງປະເທດ. ອີກທັງຖືເປັນບາດກ້າວທີ່ສໍາຄັນໃນການຊຳລະເງິນໃນຮ້ານຂາຍຍ່ອຍທີ່ໄວ, ມີປະສິດທິພາບ, ປອດໄພ ແລະ ເຊື່ອມຕໍ່ໃນທົ່ວພາກພື້ນອາຊຽນ.

ນອກ​ຈາກ​ມາ​ເລ​ເຊຍແລ້ວ, ກຳປູ​ເຈຍ​ຍັງ​ໄດ້​ເປີດ​ໂຄງການ​ຊຳລະ​ເງິນຂ້າມຊາຍແດນຜ່ານQR codeທະວິພາຄີ​ກັບ​ຫຼາຍ​ປະ​ເທດ​ຄູ່​ຮ່ວມ​ມື​ເຊັ່ນ: ​ໄທ, ຫວຽດນາມ, ລາວ, ຈີນ​ແລະ​ ສ ເກົາ​ຫຼີ​.