ຂ່າວຕ່າງປະເທດລາຍງານ ໃນວັນທີ 29 ກັນຍາ ຜ່ານມາ, ສຳນັກງານຕຳຫຼວດແຫ່ງຊາດເນປານ ລາຍງານວ່າ:ເຫດການດິນເຈື່ອນ ແລະ ນໍ້າຖ້ວມ ທີ່ເກີດຈາກຝົນຕົກໜັກຢ່າງຕໍ່ເນື່ອງໃນລະດູລົມມໍລະສຸມ ນັບຕັ້ງແຕ່ກາງຄືນວັນທີ 27 ກັນຍາເປັນຕົ້ນມາ ໄດ້ເຮັດໃຫ້ມີຜູ້ເສຍຊີວິດ 104 ຄົນ, ບາດເຈັບ 74 ຄົນ ແລະ ສູນຫາຍ 64 ຄົນ.
ລາຍງານລະບຸວ່າ: ເຂດຮ່ອມພູກັດມັນດຸ ມີຜູ້ເສຍຊີວິດ 48 ຄົນ, ບາດເຈັບ 15 ຄົນແລະ ສູນຫາຍ21 ຄົນ, ໂດຍຈໍານວນຜູ້ໄດ້ຮັບບາດເຈັບ ແລະ ເສຍຊີວິດ ຈາກໄພພິບັດຄັ້ງນີ້ອາດຈະເພີ່ມຂຶ້ນ. ຂະນະທີ່ການຟື້ນຟູການສັນຈອນຕາມເສັ້ນທາງຫຼວງສາຍຫຼັກເກືອບທັງໝົດທີ່ຖືກນ້ຳຖ້ວມແລະດິນເຈື່ອນທັບຕ້ອງໃຊ້ເວລາຢ່າງໜ້ອຍສາມຫາສີ່ມື້.
ກົມຕຳຫຼວດທ້ອງຖິ່ນເມືອງດາດິງ ເປີດເຜີຍວ່າ:ມີການກູ້ສົບຜູ້ເສຍຊີວິດຈາກລົດ 2 ຄັນ ຊຶ່ງຖືກດິນເຈື່ອນທັບຢູ່ທາງຫຼວງຕຣິກູວັນ ທີ່ເຊື່ອມຕໍ່ກັບນະຄອນຫຼວງກັດມັນດຸ ໃນວັນທີ 28 ກັນຍາ ຜ່ານມາ ແລະ ກຳລັງມີການກູ້ລົດເມທີ່ຖືກດິນເຈື່ອນທັບອີກຄັນໜຶ່ງ.
ກະຊວງສຶກສາທິການ, ວິທະຍາສາດ ແລະເຕັກໂນໂລຊີຂອງເນປານໄດ້ຮຽກຮ້ອງໃຫ້ອຳນາດການປົກຄອງທ້ອງຖິ່ນປິດໂຮງຮຽນເປັນເວລາ 3 ວັນນັບແຕ່ວັນທີ 29 ກັນຍາເປັນຕົ້ນໄປ ແລະໄດ້ມີມະຕິເລື່ອນການສອບເສັງທັງໝົດໃນລະດັບມະຫາວິທະຍາໄລ ຊຶ່ງມີກຳນົດສອບເສັງເຖິງວັນທີ 1 ຕຸລານີ້.