ພິທີ ມອບ-ຮັບ ໂຄງການກໍ່ສ້າງຫ້ອງການ ກອງບັນຊາການທະຫານ ເມືອງທ່າແຂກ ແຂວງຄຳມ່ວນ ລະຫວ່າງ ບໍລິສັດ ວົງວາລີນ ກໍ່ສ້າງເຄຫາສະຖານ ຈຳກັດ ໃນນາມຜູ້ຮັບເໝົາກໍ່ສ້າງ ແລະ ກອງບັນຊາການທະຫານເມືອງທ່າແຂກ ໃນນາມເຈົ້າຂອງໂຄງການ ໄດ້ຈັດຂຶ້ນໃນວັນທີ 1 ຕຸລານີ້ ໂດຍມີທ່ານ ສີຫງວນ ອິນທະລາດ ຮອງເຈົ້າເມືອງທ່າແຂກ, ທ່ານ ພັທ ສຸລິຍົງ ພວງພັກດີ ຫົວໜ້າກອງບັນຊາການທະຫານເມືອງທ່າແຂກ, ທ່ານ ນາງ ສີພັນດອນ ຫຼວງຄໍາທີ ຜູ້ອຳນວຍການບໍລິສັດ ວົງວາລີນ ກໍ່ສ້າງເຄຫາສະຖານ ຈຳກັດ, ມີພາກສ່ວນທີ່ກ່ຽວຂ້ອງ ແລະ ແຂກຖືກເຊີນເຂົ້າຮ່ວມ.

ໂຄງການກໍ່ສ້າງຫ້ອງການ ກອງບັນຊາການທະຫານເມືອງທ່າແຂກ ເປັນໂຄງການສືບຕໍ່ດຳເນີນການກໍ່ສ້າງບັນດາໜ້າວຽກທີ່ຍັງຄົງຄ້າງ ຈາກບໍລິສັດຜູ້ຮັບເໝົາກ່ອນໜ້ານີ້ ຊຶ່ງເປັນອາຄານ 2 ຊັ້ນ, ມີຂະໜາດ 32x18 ແມັດ, ເປັນອາຄານຖາວອນ, ປະກອບມີຫ້ອງເຮັດວຽກ, ຫ້ອງປະຊຸມ, ຫ້ອງນໍ້າ, ຕິດຕັ້ງລະບົບໄຟຟ້າ, ນໍ້າປະປາ ແລະ ອື່ນໆ. ໂດຍໄດ້ເລີ່ມລົງມືກໍ່ສ້າງໃນເດືອນ ຕຸລາ 2023 ແລະ ສໍາເລັດໃນເດືອນ ກັນຍາ 2024 ລວມມູນຄ່າທັງໝົດ 1,707,974,800 ກີບ, ການກໍ່ສ້າງແມ່ນໄດ້ປະຕິບັດຕາມແຜນຜັງ ແລະ ບົດແນະນຳເຕັກນິກທຸກຂັ້ນຕອນ ໂດຍມີວິຊາການຝ່າຍບໍລິສັດ ສົມທົບກັບ ເຈົ້າຂອງໂຄງການ ແລະ ຂະແໜງການກ່ຽວຂ້ອງ ລົງມາຕິດຕາມກວດກາການກໍ່ສ້າງຢ່າງເປັນປົກກະຕິ.

(ຂ່າວ-ພາບ: ກອງຄໍາ)