(ສພຊ). ໃນທ້າຍອາທິດຜ່ານມາ, ທ່ານ ນາງ ອໍາໄພວອນ ລ້ອມບຸນແພງ ເລຂາທິການສະພາແຫ່ງຊາດ ພ້ອມດ້ວຍຄະນະ ໄດ້ນໍາເອົາເຄື່ອງຊ່ວຍເຫຼືອທີ່ສະພາແຫ່ງຊາດ (ສພຊ) ລະດົມຂົນຂວາຍ ແລະ ຂໍການອຸປະຖຳຈາກພາກສ່ວນຕ່າງໆ ໄປມອບໃຫ້ແກ່ປະຊາຊົນຜູ້ທີ່ປະສົບໄພພິບັດນ້ຳຖ້ວມຢູ່ເມືອງຊຳເໜືອແຂວງຫົວພັນ ເພື່ອເປັນການແບ່ງເບົາ ແລະ ບັນເທົາທຸກ ກ່າວຮັບໂດຍທ່ານ ຄຳແພງ ໄຊສົມແພງ ເຈົ້າແຂວງຫົວພັນ ຊຶ່ງມີທ່ານ ຄຳແພງ ວິລະພັນ ປະທານກຳມາທິການກົດໝາຍ, ທ່ານ ນາງ ມະນີວັນ ເຢຍປາວເຮີ ຮອງປະທານກຳມາທິການວັດທະນະທຳ-ສັງຄົມ ຕາງໜ້າກອງທຶນຊ່ວຍເຫຼືອສັງຄົມຂອງສະພາແຫ່ງຊາດ, ທ່ານ ຄອນປະພັນ ເລືອງສີຈັນທອງ ປະທານສະພາປະຊາຊົນແຂວງຫົວພັນ ແລະ ພາກສ່ວນທີ່ກ່ຽວຂ້ອງ ເຂົ້າຮ່ວມເປັນສັກຂີພິຍານ.

ເຄື່ອງຊ່ວຍເຫຼືອທີ່ນຳມາມອບຄັ້ງນີ້ລວມມີເງິນສົດ100 ລ້ານກີບ ທີ່ໄດ້ຮັບຈາກຄະນະທີ່ປຶກສາສະຫະພັນກິລາໝາກແລ້, ຊຸດຝຶກອົບຮົມຄອບຄົວການນໍາຊຸດທີ 1 ແລະ ທີມງານສາຍບຸນ 50 ລ້ານກີບ; ຄອບຄົວທ່ານ ຈະເລີນ ເຢຍປາວເຮີ ຮອງປະທານສະພາແຫ່ງຊາດ 30 ລ້ານກີບ; ຄະນະເລຂາທິການສະພາແຫ່ງຊາດ 7 ລ້ານກີບ; ຄອບຄົວທ່ານ ຄຳແພງ ວິລະພັນ 5 ລ້ານ; ບໍລິສັດ ຍອດນິຍົມການຄ້າ ຈໍາກັດຜູ້ດຽວ (ຈໍາໜ່າຍແອມີເດຍ Medea) 5 ລ້ານກີບ;ຄອບຄົວທ່ານ ນາງ ວັນນະລິນ ສຸລິວົງສັກ 3 ລ້ານກີບ. ເຄື່ອງອຸປະໂພກ-ບໍລິໂພກທີ່ໄດ້ຮັບຈາກສະພາແຫ່ງຊາດ ປະກອບມີ: ສາດ 500 ຜືນ, ຜ້າຫົ່ມ 500 ຜືນ, ໝອນນອນ 500 ໜ່ວຍ, ມຸ້ງ 500 ດາງ ລວມມູນຄ່າ 167.5 ລ້ານກີບ; ເຄື່ອງຈາກກອງທຶນຊ່ວຍເຫຼືອສັງຄົມຂອງສະພາແຫ່ງຊາດ ປະກອບມີ: ເຂົ້າໜ້ຽວ 800 ເປົາ (10 ໂຕນ), ເຂົ້າສຳເລັດຮູບ 20 ແກັດ, ຜ້າຫົ່ມ 10 ຜືນ, ສາດ 10 ຜືນ, ມຸ້ງ 10 ດາງ ລວມມູນຄ່າ 144,015,000 ກີບ; ເຄື່ອງຈາກກະຊວງແຮງງານ ແລະ ສະຫວັດດີການສັງຄົມ ປະກອບມີ: ຖົງຢັ່ງຊີບ 400 ຖົງ, ສະບູ 162 ກ້ອນ, ປາກະປ໋ອງ 1 ແກັດ (10 ແພັກ), ຢາຖູແຂ້ວ, ຢາສະຜົມ 1 ແກັດ, ເຄື່ອງນຸ່ງມືສອງຈຳນວນໜຶ່ງລວມມູນຄ່າ 78,890,000 ກີບ; ເຄື່ອງຈາກສະມາຄົມທຸລະກິດຢາ ແລະ ຜະລິດຕະພັນການແພດ ປະກອບມີ: ຢາປົວພະຍາດ 17 ແກັດ ລວມມູນຄ່າ 48.4 ລ້ານກີບ; ເຄື່ອງຈາກມູນນິທິພົງສະຫວັນ ປະກອບມີ: ເຂົ້າສານ 10 ກະສອບ, ໝີ່, ປາກະປ໋ອງ, ເຄື່ອງນຸ່ງມືສອງແລະ ອຶ່ນໆ ມູນຄ່າ 20 ລ້ານກີບ; ເຄື່ອງຈາກຄຳຫຼ້າການຄ້າດອນໜູນ, ໂຮງແຮມ ລາວເທວ, ບໍລິສັດຄິງ ຂາອອກ-ຂາເຂົ້າ ບໍລິການສິນຄ້າຜ່ານແດນຈຳກັດ ແລະ ກູ້ໄພນະຄອນຫຼວງ 1624 ປະກອບມີ: ຜ້າຫົ່ມ 300 ຜືນ, ໝອນນອນ 200 ໜ່ວຍ, ສາດ 200 ຜືນ ແລະ ອຶ່ນໆ ລວມມູນຄ່າ 47.69 ລ້ານກີບ ຊຶ່ງມູນຄ່າລວມທັງໝົດໃນການຊ່ວຍຄັ້ງນີ້ 606,495,000 ກີບ.

ຈາກນັ້ນ, ຄະນະຍັງໄດ້ເດີນທາງໄປເບິ່ງຕົວຈິງບ່ອນທີ່ຖືກນຳ້ຖ້ວມ ແລະ ມອບເຄື່ອງຊ່ວຍເຫຼືອໃຫ້ພໍ່ແມ່ປະຊາຊົນຜູ້ປະສົບໄພຢູ່ບ້ານນາລິວ ແລະ ບ້ານມີສຸກ ເມືອງຊຳເໜືອ ຊຶ່ງເປັນ 2 ບ້ານທີ່ຖືກຜົນກະທົບໜັກ.

ຂ່າວ-ພາບ: ກົງທະນູຄຳ ພິພັດເສລີ