ສະພາການຄ້າຈີນປະຈໍາ ສປປ ລາວໄດ້ມອບເງິນ 1,400,000,000 ກີບໃຫ້ກະຊວງແຮງງານ ແລະ ສະຫວັດດີການສັງຄົມ (ຮສສ) ເພື່ອນໍາໄປຊ່ວຍເຫຼືອຜູ້ປະສົບໄພນໍ້າຖ້ວມຢູ່ ສປປ ລາວພິທີໄດ້ຈັດຂຶ້ນໃນວັນທີ 3 ຕຸລານີ້ທີ່ກະຊວງ ຮສສ, ຕາງໜ້າກ່າວມອບໂດຍທ່ານ ມ້າ ຢູ່ ຫຼົງ ປະທານປະຕິບັດວຽກງານ ແລະ ເລຂາທິການສະພາການຄ້າຈີນປະຈໍາ ສປປ ລາວ,ກ່າວຮັບໂດຍທ່ານນາງ ໃບຄຳ ຂັດທິຍະ ລັດຖະມົນຕີກະຊວງ ຮສສ ທັງເປັນຮອງປະທານຄະນະກຳມະການຄຸ້ມຄອງໄພພິບັດຂັ້ນສູນກາງ.
    ໂອກາດນີ້, ທ່ານນາງ ໃບຄຳ ຂັດທິຍະ ໄດ້ກ່າວສະແດງຄວາມຂອບໃຈຕໍ່ທ່ານ ມ້າ ຢູ່ ຫຼົງ ພ້ອມດ້ວຍຄະນະທີ່ໄດ້ນໍາເອົາເງິນຈໍານວນດັ່ງກ່າວມາມອບໃຫ້ຄະນະກຳມະການຄຸ້ມຄອງໄພພິບັດຂັ້ນສູນກາງ ກໍຄືປະຊາຊົນທີ່ໄດ້ຮັບຜົນກະທົບຈາກໄພພິບັດນໍ້າຖ້ວມໃນຄັ້ງນີ້ພ້ອມທັງລາຍງານສະພາບໄພພິບັດນໍ້າຖ້ວມໃນຂອບເຂດທົ່ວປະເທດໃຫ້ທາງສະພາການຄ້າຈີນປະຈໍາ ສປປ ລາວຮັບຊາບ, ການມອບເງິນໃນຄັ້ງນີ້ເພື່ອຊ່ວຍເຫຼືອດ້ານມະນຸດສະທໍາ ກໍຄືປະຊາຊົນຜູ້ທີ່ໄດ້ຜົນກະທົບຈາກໄພພິບັດນໍ້າຖ້ວມໃນຂອບເຂດທົ່ວປະເທດ ພ້ອມທັງໃຫ້ຄໍາໝັ້ນສັນຍາວ່າຈະນໍາເອົາເງິນຈໍານວນດັ່ງກ່າວໄປໝູນໃຊ້ເຂົ້າໃນວຽກງານຊ່ວຍເຫຼືອຜູ້ປະສົບໄພນໍ້າຖ້ວມໃຫ້ເກີດປະໂຫຍດສູງສຸດແລະ ຂໍອວຍພອນໃຫ້ສະພາການຄ້າຈີນປະຈໍາ ສປປ ລາວ ຈົ່ງປະສົບຜົນສຳເລັດໃນການດຳເນີນທຸລະກິດຢູ່ ສປປ ລາວ.
ຂ່າວ-ພາບ: ບຸນອູ້ມ