ເມື່ອບໍ່ດົນມານີ້ ຢູ່ທີ່ຫ້ອງປະຊຸມເບີ 1 ຂອງເມືອງ ໄຊຈໍາພອນ ແຂວງສະຫວັນນະເຂດ ໄດ້ຈັດກອງປະຊຸມປະເມີນເມືອງເປັນຫົວໜ່ວຍເຂັ້ມແຂງຮອບດ້ານ, ບ້ານເປັນຫົວໜ່ວຍພັດທະນາ ປີ 2024, ໂດຍພາຍໃຕ້ການເປັນປະທານຂອງ ທ່ານ ກອງສີ ໄຊຍະວົງ ຮອງເຈົ້າເມືອງ ໄຊຈໍາພອນ ຜູ້ຊີ້ນໍາວຽກງານຂົງເຂດວັດທະນະທໍາ-ສັງຄົມ, ມີບັນດາຄະນະປະຈໍາພັກເມືອງ, ກໍາມະການພັກເມືອງ, ຫົວໜ້າຫ້ອງການ, ຮອງຫົວໜ້າຫ້ອງການອ້ອມຂ້າງເມືອງ, 2 ກໍາລັງ ປກຊ-ປກສ ເຂົ້າຮ່ວມ.
ໃນກອງປະຊຸມ, ທ່ານ ໄມປັນ ໄຊສົມບັດ ຮອງຫົວໜ້າຫ້ອງການພາຍໃນເມືອງໄດ້ຂຶ້ນຜ່ານບົດລາຍງານຫຍໍ້ການຈັດຕັ້ງປະຕິບັດການປະເມີນເມືອງເປັນຫົວໜ່ວຍເຂັ້ມແຂງຮອບດ້ານ ແລະ ສ້າງບ້ານເປັນຫົວໜ່ວຍພັດທະນາ ປະຈໍາປີ 2023 ຊຶ່ງໄລຍະໃນປີ 2023 ຜ່ານມາການປະເມີນເມືອງເປັນຫົວໜ່ວຍເຂັ້ມແຂງຮອບດ້ານມີທັງໜົດ 5 ດ້ານຄື: ດ້ານກໍ່ສ້າງພະນັກງານ, ດ້ານການປົກຄອງ, ຄຸ້ມຄອງບໍລິຫານ, ດ້ານເສດຖະກິດ-ການເງີນ ຊັບພະຍາກອນທໍາມະຊາດ ແລະ ສີງແວດລ້ອມ, ດ້ານວັດທະນະທໍາ-ສັງຄົມ ແລະ ດ້ານປ້ອງກັນຊາດ-ປ້ອງກັນຄວາມສະຫງົບ, ມີ 47 ຕົວຊີ້ບອກ ຊຶ່ງບັນລຸ 26 ຕົວຊີ້ບອກເທົ່າກັບ 55,31%, ຍັງບໍ່ບັນລຸ 21 ຕົວຊີ້ບອກເທົ່າກັບ 44,68%. ນອກນັ້ນ ຍັງໄດ້ຜ່ານບັນດາມາດຖານເງື່ອນໄຂໃນການປະເມີນບ້ານ ແລະ ເມືອງປະຈໍາປີ 2024 ຕໍ່ກອງປະຊຸມເພື່ອຈະໄດ້ໃຫ້ບັນດາທ່ານ ທີ່ເຂົ້າຮ່ວມກອງປະຊຸມໄດ້ຮັບຮູ້ ແລະ ຈະໄດ້ມີຄໍາຄິດຄໍາເຫັນໃສ່ຮ່າງປະເມີນເມືອງ ແລະ ບ້ານປະຈໍາປີ 2024 ໃຫ້ມີເນື້ອໃນສົມບູນ ແລະ ຊັດເຈນລະອຽດຂຶ້ນຕື່ມ.
ທ່ານ ຮອງເຈົ້າເມືອງ ໄດ້ຮຽກຮ້ອງໃຫ້ບັນດາທ່ານການນໍາຂອງເມືອງ, ຫົວໜ້າຫ້ອງການ ແລະ  ຄະນະຮັບຜິຊອບຈົ່ງເພີ່ມທະວີເອົາໃສ່ ນໍາພາ-ຊີ້ນໍາບັນດາຂະແໜງການພາກສ່ວນທີ່ກ່ຽວຂ້ອງລົງຈັດຕັ້ງປະຕິບັດ, ຊຸກຍູ້ ແລະ ແກ້ໄຂບັນດາໜ້າວຽກທີ່ຍັງຄ້າງຄາຢູ່ແຕ່ລະບ້ານໃຫ້ສໍາເລັດ ພ້ອມທັງປະເມີນຜົນສໍາເລັດບັນດາໜ້າວຽກຢູ່ແຕ່ລະບ້ານທີ່ກ່ຽວພັນກັບຫ້ອງການ ແລ້ວສົ່ງໃຫ້ກັບຫ້ອງການທີ່ຮັບຜິດຊອບເພື່ອສັງລວມໃຫ້ທ່ວງກັບເວລາທີ່ໄດ້ກັບນົດໄວ້.
(ຂ່າວ-ພາບ ແກ້ວອຸດອນ)