ໃນວັນທີ່ 3 ຕຸລາ ຜ່ານມານີ້, ທ່ານ ອ່ອນຈັນ ມະນີວັນ ຫົວໜ້າອົງການໄອຍະການປະຊາຊົນພາກເໜືອ ພ້ອມດ້ວຍຄະນະ ໄດ້ເຄື່ອນໄຫວຢ້ຽມຢາມ ແລະ ເຮັດວຽກຢູ່ ອົງການໄອຍະການປະຊາຊົນແຂວງອຸດົມໄຊ, ໂດຍມີທ່ານ ນາງ ສົມຫວັງ ໄຊຍະຕິ ຫົວໜ້າອົງການໄອຍະການປະຊາຊົນແຂວງອຸດົມໄຊ ພ້ອມດ້ວຍຄະນະ ແລະ ໄອຍະການປະຊາຊົນເຂດ ຕະຫຼອດຮອດພະນັກງານຫຼັກແຫຼ່ງພາຍໃນ ອົງການໄອຍະການປະຊາຊົນແຂວງອຸດົມໄຊຮ່ວມນຳ. 
ທ່ານ ນາງ ສົມຫວັງ ໄຊຍະຕິ ໄດ້ລາຍງານການຈັດຕັ້ງປະຕິບັດວຽກງານ ດ້ານດີຜົນງານ, ດ້ານອ່ອນຂໍ້ຄົງຄ້າງ ແລະ ທິດທາງແຜນການໃນຕໍ່ໜ້າ ຂອງອົງການໄອຍະການປະຊາຊົນແຂວງອຸດົມໄຊ. ໂອກາດນີ້, ທ່ານ ອ່ອນຈັນ ມະນີວັນ ໄດ້ມີຄໍາເຫັນຊີ້ນໍາໃຫ້ຄະນະນໍາ, ອົງການໄອຍະການປະຊາຊົນແຂວງອຸດົມໄຊ ຕ້ອງເອົາໃຈໃສ່ສຶກສາອົບຮົມການເມືອງ-ແນວຄິດ, ຍົກສູງຄວາມເປັນແບບຢ່າງນໍາໜ້າທີ່ດີຂອງພະນັກງານນໍາພາ, ພັດທະນາຄວາມຮູ້, ຄວາມສາມາດທາງດ້ານວິຊາສະເພາະ, ເພີ່ມທະວີຄວາມສາມັກຄີພາຍໃນໃຫ້ເປັນປຶກແຜ່ນ, ເອົາໃຈໃສ່ຄົ້ນຄວ້າຈັດຕັ້ງຜັນຂະຫຍາຍເນື້ອໃນມະຕິ ສະບັບເລກທີ 112 ຂອງກົມການເມືອງສູນກາງພັກ ວ່າດ້ວຍການຍົກສູງຄຸນນະພາບການດຳເນີນຄະດີຕາມຂະບວນການຍຸຕິທຳ ເຂົ້າສູ່ຂະບວນການວຽກງານຕົວຈິງໃນຄວາມຮັບຜິດຊອບຂອງຕົນ, ປະສານສົມທົບແໜ້ນກັບອົງການສືບສວນ-ສອບສວນຂອງເຈົ້າໜ້າທີ່ ປກສ  ແລະ ພາກສ່ວນກ່ຽວຂ້ອງ ເພື່ອປຶກສາຫາລື ແລະ ແກ້ໄຂບັນຫາທີ່ເກີດຂຶ້ນໃນຄວາມຮັບຜິດຊອບ, ເອົາໃຈໃສ່ຕິດຕາມ, ກວດກາການນຳໃຊ້ມາດຕະການສະກັດກັ້ນໃຫ້ຖືກຕ້ອງ, ສຸມໃສ່ແກ້ໄຂສະພາບການກັກຂັງຜູ້ຖືກຫາເກີນກໍານົດ, ສູ້ຊົນຈັດຕັ້ງຜັນຂະຫຍາຍຜົນສໍາເລັດຂອງກອງປະຊຸມວຽກງານຕິດຕາມກວດກາທົ່ວໄປຄັ້ງທີ 1 ເຂົ້າສູ່ວຽກງານຕົວຈິງເປັນຕົ້ນແມ່ນການເພີ່ມທະວີວຽກງານຕິດຕາມກວດກາ ການປະຕິບັດຄໍາຕັດສິນຂອງສານ ແລະ ນິຕິກຳຂອງບັນດາບ້ານທີ່ຂຶ້ນກັບຂອບເຂດຕົນຮັບຜິດຊອບເພື່ອໃຫ້ສອດຄ່ອງຕາມກົດໝາຍ;  ເອົາໃຈໃສ່ຄົ້ນຄວ້າປັບປຸງແບບແຜນວິທີເຮັດວຽກໃຫ້ສອດຄ່ອງກັບວຽກງານໃນໄລຍະໃໝ່ ບົນພື້ນຖານປະຕິບັດຕາມຫຼັກການລວມສູນປະຊາທິປະໄຕ, ມີການປຶກສາຫາລື ເປັນໝູ່ຄະນະ, ຂັ້ນລຸ່ມຂຶ້ນກັບຂັ້ນເທິງ, ບຸກຄົນຂຶ້ນກັບການຈັດຕັ້ງ ແລະ ມີການມອບໝາຍໜ້າທີ່ໃຫ້ບຸກຄົນຮັບຜິດຊອບຢ່າງຊັດເຈນ, ເພີ່ມທະວີເຮັດວຽກງານກວດກາພັກ, ເອົາໃຈໃສ່ບູລະນະກົງຈັກການຈັດຕັ້ງ ແລະ ບໍາລຸງສ້າງພະນັກງານ ເພື່ອສືບທອດປ່ຽນແທນໃຫ້ເປັນລະບົບ, ແນ່ໃສ່ເຮັດໃຫ້ວຽກງານໄອຍະການປະຊາຊົນຢູ່ຂັ້ນຮາກຖານ ມີຄວາມເຂັ້ມແຂງໃນທຸກໆດ້ານ.
(ຂ່າວ: ແສງອາທິດ)