ໃນວັນທີ 3 ຕຸລາຜ່ານມາ, ທ່ານ ພົງສະຫວັນ ສິດທະວົງ ເຈົ້າແຂວງ ໄຊຍະບູລີ ໄດ້ລົງຢ້ຽມຢາມ ໂຄງການຂຸດຄົ້ນ ແລະ ປຸງແຕ່ງແຮ່ຄໍາ ຂອງບໍລິສັດ ເອັມພີຈີ ມາຍນີ້ງ ຈໍາກັດ, ໂດຍມີຕາງໜ້າບໍລິສັດ, ຜູ້ຮັບຜິດຊອບໂຮງງານ ແລະ ວິຊາການຈາກພະແນກ ພະລັງງານ ແລະ ບໍ່ແຮ່ແຂວງ ໃຫ້ການຕ້ອນຮັບ ພ້ອມທັງໄດ້ນໍາພາລົງເບິ່ງໜ້າວຽກຕົວຈິງຢູ່ໂຮງງານ.
 ໂຄງການດັ່ງກ່າວ, ຕັ້ງຢູ່ເຂດບ້ານ ປາງຄໍາ ເມືອງ ປາກລາຍ, ມີເນື້ອທີ່ສໍາປະທານທັງໝົດ 32,24 ກິໂລຕາແມັດ, ໃນນີ້ ເຂດທີ່ອານຸຍາດຂຸດຄົ້ນແມ່ນ 2 ກິໂລຕາແມັດ, ມີພະນັກງານທັງໝົດ 50 ຄົນ, ຍິງ 4 ຄົນ. ໃນນັ້ນ, ຄົນຈີນ 20 ຄົນ ຍິງ 1 ຄົນ, ໂຄງການແມ່ນໄດ້ເລີ່ມຂຸດຄົ້ນ ແລະ ເຈາະອຸມົງເພື່ອຊອກຫາສາຍແຮ່ ຈໍານວນ 4 ຮູ, ສາມາດເຈາະໄດ້ທັງໝົດ 470 ແມັດ, ການເຈາະອຸມົງແມ່ນໄດ້ໃຊ້ທາດລະເບີດ ແລະ ແກັບໄຟຟ້າ, ການເຮັດວຽກແມ່ນ 24 ຊົ່ວໂມງ ໂດຍແບ່ງອອກເປັນ 4 ກາດ ເພື່ອຂົນເອົາແຮ່ທາດອອກຈາກອຸມົງ ແລະ ນໍາສົ່ງປ້ອນເຂົ້າໂຮງງານປຸງແຕ່ງເພື່ອແຍກແຮ່ທາດ. ປັດຈຸບັນ ແມ່ນໄດ້ຢຸດເຊົາໃນການຂຸດເຈາະອຸມົງຊົ່ວຄາວເນື່ອງຈາກວ່າຂາດອຸປະກອນບາງຢ່າງໃນການຂຸດເຈາະ.
(ຂ່າວ-ພາບ: ອຸ່ນເຮືອນ ໂພທິລັກ)