ໃນໂອກາດເຂົ້າຮ່ວມກອງປະຊຸມສຸດຍອດຝຣັງໂກໂຟນີ ຄັ້ງທີ 19 ທີ່ນະຄອນຫຼວງປາຣີ ສ ຝຣັ່ງ ລະຫວ່າງວັນທີ 4-5 ຕຸລາ ຜ່ານມາ, ທ່ານ ທອງລຸນ ສີສຸລິດ ປະທານປະເທດ ແຫ່ງ ສປປ ລາວ ພ້ອມຄະນະ ຍັງໄດ້ພົບປະສອງຝ່າຍກັບ ທ່ານ ໂຕ ເລີມ ປະທານປະເທດ ແຫ່ງ ສສ ຫວຽດນາມ ແລະ ຄະນະ.
ໂອກາດນີ້, ສອງປະທານປະເທດ ໄດ້ສະແດງຄວາມດີໃຈທີ່ໄດ້ພົບປະກັນ ໃນໂອກາດທີ່ເດີນທາງເຂົ້າຮ່ວມກອງປະຊຸມສຸດຍອດຝຣັງໂກໂຟນີ ຄັ້ງທີ 19 ຢູ່ນະຄອນຫຼວງປາຣີ ປະເທດຝຣັ່ງ ແລະ ໄດ້ຕີລາຄາສູງຕໍ່ໝາກຜົນແຫ່ງການຢ້ຽມຢາມທາງລັດຖະກິດ ທີ່ ສສ ຫວຽດນາມ ຂອງ ທ່ານ ທອງລຸນ ສີສຸລິດ ເລຂາທິການໃຫຍ່ ປະທານປະເທດ ແຫ່ງ ສປປ ລາວ ກໍຄື ການພົບປະປະຈຳປີລະຫວ່າງສອງກົມການເມືອງຂອງສອງປະເທດທີ່ຈັດຂຶ້ນໃນວັນທີ 10-13 ກັນຍາ ຜ່ານມາ. ພ້ອມນີ້, ສອງປະທານປະເທດລາວ-ຫວຽດນາມ ຍັງໄດ້ຕີລາຄາສູງຕໍ່ການເສີມຂະຫຍາຍ ສາຍພົວພັນມິດຕະພາບທີ່ຍິ່ງໃຫຍ່ ແລະຄວາມສາມັກຄີພິເສດ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ; ໄດ້ເຫັນດີເປັນເອກະພາບ ມອບໃຫ້ລັດຖະບານ ກໍຄື ບັນດາກະຊວງ, ຂະແໜງການ, ທ້ອງຖິ່ນທີ່ກ່ຽວຂ້ອງຂອງລາວ ແລະ ຫວຽດນາມ ນໍາໄປຈັດຕັ້ງປະຕິບັດ ໝາກຜົນຂອງການຢ້ຽມຢາມລັດຖະກິດ ແລະ ເນື້ອໃນຈິດໃຈທີ່ສອງກົມການເມືອງໄດ້ຕົກລົງເປັນເອກະພາບກັນ ໂດຍສະເພາະແມ່ນການຜັນຂະຫຍາຍບັນດາໂຄງການທີ່ສໍາຄັນ ທີ່ໄດ້ຮັບຮອງເອົາແລ້ວນັ້ນໃຫ້ປະກົດຜົນເປັນຈິງ.
ໂອກາດນີ້, ທ່ານປະທານປະເທດ ແຫ່ງ ສປປ ລາວ ໄດ້ຕາງໜ້າພັກ, ລັດ, ສະພາແຫ່ງຊາດ, ກອງທັບ ແລະ ປະຊາຊົນລາວ ໂດຍສະເພາະຜູ້ທີ່ຖືກເຄາະຮ້າຍ ແລະ ໄດ້ຮັບຜົນກະທົບຈາກໄພນໍ້າຖ້ວມ ສະແດງຄວາມຂອບໃຈ ແລະ ຮູ້ບຸນຄຸນມາຍັງພັກ, ລັດ, ສະພາແຫ່ງຊາດ, ກອງທັບ ແລະ ປະຊາຊົນ ຫວຽດນາມ ໂດຍສະເພາະທ່ານປະທານປະເທດ ແຫ່ງ ສສ ຫວຽດນາມ ທີ່ໄດ້ສົ່ງໂທລະເລກສະແດງຄວາມເຫັນໃຈມາຍັງ ສປປ ລາວ. ພິເສດ, ໄດ້ໃຫ້ການຊ່ວຍເຫຼືອ ເພື່ອຟື້ນຟູຊີວິດການເປັນຢູ່ຂອງປະຊາຊົນ ທີ່ໄດ້ຮັບຜົນກະທົບໃຫ້ກັບຄືນມາສູ່ສະພາບປົກກະຕິໂດຍໄວ.
                               ແຫຼ່ງຂ່າວ:ຂປລ