ວັນທີ 7 ຕຸລາຜ່ານມາ ທີ່ຫ້ອງປະຊຸມພະແນກການເງິນແຂວງສະຫາຍ ພູທະນູເພັດ ໄຊສົມບັດ ຮອງເລຂາພັກແຂວງວຽງຈັນ ໄດ້ພົບປະໂອ້ລົມພະນັກງານຫຼັກແຫຼ່ງຂົງເຂດການເງິນແຂວງແຂວງວຽງຈັນໂດຍມີ ສະຫາຍ ວອນ ວໍລະສານ ຫົວໜ້າພະແນກການເງິນແຂວງວຽງຈັນ, ມີບັນດາພະນັກງານຫຼັກແຫຼງເຂົ້າຮ່ວມ.

ໂອກາດດັ່ງກ່າວ, ສະຫາຍ ວອນ ວໍລະສານ ໄດ້ລາຍງານກ່ຽວກັບການຈັດຕັ້ງປະຕິບັດບັນດາວຽກງານຂົງເຂດການເງິນທົ່ວແຂວງວ່າ: ຜ່ານການຈັດຕັ້ງປະຕິບັດແຜນງົບປະມານແຫ່ງລັດ 9 ເດືອນ ປີ 2024 ຊຶ່ງມີຕົວເລກຄາດໝາຍສູ້ຊົນທາງດ້ານລາຍຮັບ-ລາຍຈ່າຍ ແຜນລາຍຮັບປະຈຳປີ 2024 ຂອງແຂວງວຽງຈັນມີທັງໝົດ 333.93 ຕື້ກີບ. ໃນນີ້, ມີພູດສູນກາງ 76.10 ຕື້ກີບ; ພູດທ້ອງຖິ່ນ 257.83 ຕື້ກີບ; ການເກັບລາຍຮັບປັດຈຸບັນສາມາດເກັບລາຍຮັບໄດ້ທັງໝົດ 338.40 ຕື້ກວ່າກີບ ເທົ່າກັບ 101.34% ຂອງຂອງແຜນການປີ. ໃນນີ້, ມີ:ພູດສູນກາງປະຕິບັດໄດ້ 83.94 ຕືິກີບ ເທົ່າກັບ 110.31% ຂອງແຜນການປີ; ພູດທ້ອງຖິ່ນປະຕິບັດໄດ້ 254.46 ຕື້ກີບ ເທົ່າກັບ98.69% ຂອງແຜນການປີ. ສໍາລັບດ້ານລາຍຈ່າຍ ປະຕິບັດໄດ້ທັງໝົດ 587.29 ຕື້ກີບ ເທົ່າກັບ 83.19% ຂອງແຜນການປີ, ຊຶ່ງໄດ້ຮັບປະກັນການປະຕິບັດລາຍຈ່າຍບໍລິຫານກົງຈັກພັກ-ລັດ ຂອງແຂວງ ເປັນຕົ້ນ ການເບີກຈ່າຍເງິນເດືອນ, ເງິນອຸດໝູນ ໃຫ້ພະນັກງານ-ລັດຖະກອນເປັນບູລິມະສິດທັນຕາມເວລາ.

ໃນໂອກາດນີ້, ສະຫາຍ ຮອງເລຂາພັກແຂວງ ໄດ້ສະແດງຄວາມຍ້ອງຍໍຊົມເຊີຍເຖິງໝາກຜົນທີ່ທາງຂົງເຂດການເງິນສາມາດຈັດຕັ້ງປະຕິບັດໄດ້ໃນໄລຍະຜ່ານມາ ແລະ ໄດ້ເນັ້ນໃຫ້ການນໍາໃນຂົງເຂດການເງິນ ຕ້ອງໄດ້ເອົາໃຈໃສ່ສຶກສາອົບຮົມການເມືອງ-ແນວຄິດ ໃຫ້ຖັນແຖວສະມາຊິກພັກ-ພະນັກ ໃຫ້ເປັນປົກກະຕິ ດ້ວຍຫຼາຍຮູບແບບ, ຫຼາຍວິທີ ໃຫ້ແທດເໝາະກັບສະພາບຄວາມເປັນຈິງໃນແຕ່ລະໄລຍະ ໂດຍຖືເອົາການດຳເນີນຊີວິດການເມືອງພາຍໃນພັກ ໃນແຕ່ລະເດືອນ ເປັນການສຳຫຼວດກວດກາຕີລາຄາຄຸນທາດການເມືອງ, ຖືເອົາການຕຳນິສົ່ງຂ່າວເຊິ່ງກັນ ແລະ ກັນ ເປັນບ່ອນແກ້ໄຂຈຸດອ່ອນຂໍ້ຄົງຄ້າງ ເພື່ອສ້າງທັດສະນະຫຼັກໝັ້ນການເມືອງ-ແນວຄິດໃຫ້ສູງຂຶ້ນ.

(ແຫຼ່ງຂ່າວ: ແຂວງວຽງຈັນ)