4 ແຂວງພາກກາງ ໄດ້ຈັດຝຶກອົບຮົມການນໍາໃຊ້ລະບົບຂໍ້ມູນ (SLMI ) ແລະ ການປັບປຸງຂໍ້ມູນການເຊົ່າ ແລະ ສໍາປະທານທີ່ດິນຂອງລັດໃຫ້ຂະແໜງການເງິນ ຂຶ້ນໃນລະຫວ່າງວັນທີ 8-10 ຕຸລາ 2024 ຢູ່ທີ່ພະແນກການເງິນແຂວງຄໍາມ່ວນ ໂດຍການເປັນປະທານຂອງທ່ານ ຍົມມະລາ ວໍລະຈິດ ຮອງຫົວໜ້າກົມຄຸ້ມຄອງຊັບສິນແຫ່ງລັດ ກະຊວງການເງິນ, ທ່ານ ສີສະຫວາດ ໄຊຍະວົງ ຮອງຫົວໜ້າ ພະແນກການເງິນແຂວງຄໍາມ່ວນ, ມີຕາງໜ້າສ່ວຍສາອາກອນ ແລະ ຊັບສິນຈາກ 4 ແຂວງ ຄື: ນະຄອນຫຼວງວຽງຈັນ, ບໍລິຄໍາໄຊ, ສະຫວັນນະເຂດ ແລະ ແຂວງຄໍາມ່ວນເຂົ້າຮ່ວມ.

ໃນໄລຍະການຝຶກອົບຮົມ, ຜູ້ເຂົ້າຮ່ວມຈະໄດ້ຮຽນຮູ້ ແລະ ຮັບຟັງກ່ຽວກັບການນໍາສະເໜີພາບລວມຂອງໂຄງການ, ລະບົບຖານຂໍ້ມູນ LCIS, ສາທິດການນໍາໃຊ້ LCIS, ການເຂົ້າເຖິງຖານ, ຜູ້ໃຊ້ ແລະ ສິດ. ນອກຈາກນັ້ນ, ຜູ້ເຂົ້າຮ່ວມຍັງໄດ້ທໍາຄວາມເຂົ້າໃຈລະບົບຖານຂໍ້ມູນ LCIS, ວົງຈອນການໄຫຼວຽນຂໍ້ມູນ ແລະ ການແບ່ງຄວາມຮັບຜິດຊອບໃນລະບົບ LCIS, ກວດກາ ແລະ ເອກະພາບຂໍ້ມູນກ່ອນປ້ອນເຂົ້າຖານ LCIS, ການຕິດຕັ້ງ VPN ແລະ ເຊື່ອມຕໍ່ເຂົ້າຖານຂໍ້ມູນ, ວິທີການປ້ອນຂໍ້ມູນເຂົ້າໃນຖານ LCIS, ການນໍາໃຊ້ຂໍ້ມູນຈາກຖານ LCIS ເພື່ອເຮັດລາຍງານ, ຕິດຕາມ, ກວດກາໂຄງການລົງທຶນ ແລະ ວາງແຜນພັດທະນາ. ພ້ອມກັນນັ້ນ ຜູ້ເຂົ້າຮ່ວມຍັງຈະໄດ້ເຮັດວຽກເປັນກຸ່ມຕາມແຂວງຂອງຕົນເອງ ເພື່ອສັງລວມຂໍ້ມູນກ່ອນຝຶກການປ້ອນຂໍ້ມູນເຂົ້າໃນຖານ LCIS ຕົວຈິງ ແລະ ຈະໄດ້ມີການປະເມີນການຝຶກອົບຮົມ.

(ຂ່າວ-ພາບ: ແດງສະຫວັດ ແສນພານິດ).