ໃນອາທິດຜ່ານມານີ້ ທີ່ຫ້ອງປະຊຸມບ້ານເມືອງຂາຍ ກຸ່ມເມືອງຂາຍ ນະຄອນ ຫຼວງພະບາງ ແຂວງຫຼວງພະບາງ, ທ່ານ ຄໍາໄບ ດໍາລັດ ຮອງປະທານສະພາແຫ່ງຊາດ ພ້ອມດ້ວຍຄະນະ ໄດ້ເຄື່ອນໄຫວຕິດຕາມ ກວດກາ-ການຈັດຕັ້ງປະຕິບັດວຽກງານ 3 ສ້າງ, ມີສະມາຊິກສະພາປະຊາຊົນແຂວງ ປະຈຳເຂດເລືອກຕັ້ງນະຄອນ, ພ້ອມດ້ວຍຫົວໜ້າ-ຮອງຫົວໜ້າກຸ່ມ, ຕະຫຼອດຮອດປະຊາຊົນພາຍໃນບ້ານດັ່ງກ່າວເຂົ້າຮ່ວມ.

ທ່ານ ພູວັນ ບຸດສະດີ ນາຍບ້ານເມືອງຂາຍ ໄດ້ລາຍງານສະພາບລວມຂອງບ້ານ ພາຍຫຼັງໄດ້ຮັບການສ້າງເປັນບ້ານ 3 ສ້າງມາຮອດປັດຈຸບັນ ບ້ານເມືອງຂາຍ ມີ 140 ຄອບຄົວ, ມີ 704 ຄົນ ຍີງ 326 ຄົນ, ການຈັດຕັ້ງປະຕິບັດວຽກງານ 3 ສ້າງ ນັບແຕ່ລິເລີ່ມ ມາເຖິງປັດຈຸບັນ ມີທັງໝົດ 13 ໂຄງການ ຄື: ໂຄງການສ້າງຕະຫຼາດຊຸມຊົນ ດ້ວຍທືນຂອງປະຊາຊົນ ສໍາເລັດ 90%, ໂຄງການກໍ່ສ້າງເສັ້ນທາງຮ່ອມເຂົ້າບ້ານ 9 ເສັ້ນ ດ້ວຍທືນຂອງລັດ ສຳເລັດ 100%, ໂຄງການກໍ່ສ້າງໂຮງໝໍບ້ານເມືອງຂາຍ ດ້ວຍທືນຂອງລັດ ສຳເລັດ 100%, ໂຄງການກໍ່ສ້າງສູນເຕັກນິກ ທືນຂອງລັດ ສໍາລັດ 100%, ໂຄງການຈັດສັນທີ່ດິນດ້ວຍທືນຂອງລັດ ສໍາເລັດ 100%, ໂຄງການ ສໍາຫຼວດອອກແບບຜັງບ້ານ ທືນຂອງລັດ ສໍາເລັດ 100%, ໂຄງການກໍ່ສ້າງຫ້ອງການ ປກສ ກຸ່ມ ທືນຂອງປະຊາຊົນພາຍໃນກຸ່ມເມືອງຂາຍ ສໍາເລັດ 100%, ໂຄງການກໍ່ສ້າງ-ບູລະນະຫໍປະຊຸມບ້ານ ທືນຂອງປະຊາຊົນ ສໍາເລັດ 100%, ໂຄງການສົ່ງເສີມການປູກຝັງ-ລ້ຽງສັດ ໂດຍແມ່ນທະນາຄານນະໂຍບາຍ ປ່ອຍເງິນກູ້ໃຫ້ກັບປະຊາຊົນ 1 ຕື້ 32 ລ້ານກີບ, ໂຄງການນໍ້າປະຊາຊຸມຊົນສໍາເລັດ 100%, ສ່ວນ 3 ໂຄງການທີ່ບໍ່ທັນໄດ້ຈັດຕັ້ງປະຕິບັດ ລວມມີ ໂຄງການກໍ່ສ້າງຫໍພັກນັກຮຽນ, ໂຄງການກໍ່ສ້າງໂຮງຮຽນ ມັດທະຍົມສົມບູນເມືອງຂາຍ ແລະ ໂຄງການຕິດຕັ້ງໄຟເຍືອງທາງ, ພ້ອມນີ້ ຍັງມີໂຄງການເພີ່ມຂຶ້ນໃໝ່ມີ 1 ໂຄງການ ຄື: ໂຄງການກໍ່ສ້າງທ່າເຮືອທ່ອງທ່ຽວ. ຈາກນັ້ນ, ທ່ານ ຄໍາໄບ ດໍາລັດ ໄດ້ມີຄໍາເຫັນຊີ້ນໍາເພື່ອໃຫ້ອົງການຈັດຕັ້ງທຸກຂັ້ນຂອງບ້ານເພື່ອສືບຕໍ່ແກ້ໄຂ ໂດຍເນັ້ນໃຫ້ສຸມໃສ່ວຽກງານການເມືອງ-ແນວຄິດ, ວຽກງານແນວທາງປ້ອງກັນຊາດ-ປ້ອງກັນຄວາມສະຫງົບ, ການແກ້ໄຂບັນຫາຢາເສບຕິດ ໂດຍຕິດພັນກັບ 2 ວາລະແຫ່ງຊາດ ສະກັດກັ້ນແກ້ໄຂບັນຫາປະກົດການຫຍໍ້ທໍ້, ວຽກງານພັດທະນາຊັບພະຍາກອນມະນຸດ, ວຽກງານປົກປັກຮັກສາວັດທະນະທຳ ຮີດຄອງປະເພນີຂອງຊາວບ້ານເມືອງຂາຍ ໃຫ້ຄຽງຄູ່ກັບນະຄອນ ຫຼວງພະບາງ ເມືອງມໍລະດົກໂລກ.

(ແຫຼ່ງຂ່າວ: ທອງດາ ທິພະວົງ ຫ້ອງການ ຖວທ ນະຄອນ ຫຼວງພະບາງ),