ຫວ່າງແລ້ວນີ້, ທ່ານ ວິໄລ ຫຼ້າຄໍາຟອງ ກໍາມະການກົມການເມືອງສູນກາງພັກ ຮອງນາຍົກລັດຖະມົນຕີ ລັດຖະມົນຕີກະຊວງປ້ອງກັນຄວາມສະຫງົບ ພ້ອມດ້ວຄະນະ ໄດ້ລົງເຄື່ອນໄຫວຢ້ຽມຢາມ ແລະ ເຮັດວຽກຢູ່ແຂວງຫຼວງນໍ້າທາ ໂດຍການຕ້ອນຮັບຂອງທ່ານ ວຽງສະຫວັດ ສີພັນດອນ ກໍາມະການສູນກາງພັກ ເລຂາພັກແຂວງ ເຈົ້າແຂວງຫຼວງນໍ້າທາ ພ້ອມຄະນະ ຢູ່ທີ່ໂຮງແຮມອຸດົມສິນ.

ການມາເຮັດວຽກ ແລະ ຢ້ຽມຍາມຂອງທ່ານ ວິໄລ ຫຼ້າຄໍາຟອງ ພ້ອມດ້ວຄະນະ ໃນຄັ້ງນີ້ໄດ້ນໍາເອົາເງິນມາມອບໃຫ້ແຂວງຫຼວງນໍ້າທາ 1 ຕື້ກີບ ແລະ ມອບໃຫ້ ປກສ ແຂວງ 200 ລ້ານກີບ ທີ່ຖືກຜົນກະທົບຈາກໄພນໍ້າຖ້ວມ ແລະ ບັນດາບໍລິສັດກໍໄດ້ນໍາເອົາເງິນມາມອບໃຫ້ແຂວງ ໂດຍການກ່າວຮັບຂອງທ່ານ ວຽງສະຫວັດ ສີພັນດອນ.

ເງິນຈໍານວນດັ່ງກ່າວ, ຈະນໍາໃຊ້ເຂົ້າໃນວຽກງານການຟື້ນຟູຊີວິດການເປັນຢູ່ຂອງປະຊາຊົນ ແລະ ຜູ້ທີ່ຖຶກຜົນກະທົບຈາກໄພນໍ້າຖ້ວມ. ພ້ອມດຽວກັນນີ້ກໍໄດ້ລົງເບິ່ງສະຖານທີ່ໆຖຶກຜົນກະທົບຈາກໄພນໍ້າຖ້ວມຢູ່ເຂດຄ້າຍຄຸມຂັງຫຼັກ 4, ເຂື່ອນໄຟຟ້ານໍ້າທາ 3 ແລະ ຂົວຂ້າມນໍ້າທຸງ ບ້ານບວມພຽງ ເມືອງຫຼວງນໍ້າທາ ທີ່ຖືກຜົນກະທົບຈາກໄພນໍ້າຖ້ວມ.

(ຂ່າວ: ມຸນຕີ)