ໃນ ວັນທີ 6 ຕຸລາຜ່ານມານີ້, ທ່ານ ຄໍາພັນ ເຜີຍຍະວົງ ເລຂາທິການສູນກາງພັກ ຫົວໜ້າຄະນະໂຄສະນາອົບຮົມສູນກາງພັກປະທານສະພາທິດສະດີສູນກາງພັກ, ພ້ອມດ້ວຍ ທ່ານ ສົມຈິດ ປັນຍາສັກ ຮອງເຈົ້າແຂວງອຸດົມໄຊ ພ້ອມດ້ວຍຄະນະໄດ້ລົງມອບເຂົ້າສານໜຽວ  ຈໍານວນ 1 ໂຕນ ໃຫ້ແກ່ 24 ຄອບຄົວທຸກຍາກ ບ້ານ ໄຊມຸງຄຸນເມືອງຮຸນແຂວງ ອຸດົມໄຊ, ລວມເປັນ ມູນຄ່າ 18 ລ້ານກວ່າກີບ ແລະ ບໍລິສັດ ລາວຊີລົງ ມອບເງິນສົດຈໍານວນ 20 ລ້ານກີບ, ເພື່ອປັບປຸງ, ສ້ອມແປງສະໂມສອນຂອງບ້ານ.
    ໂອກາດດັ່ງກ່າວ,  ທ່ານ ຄໍາພັນ ເຜີຍຍະວົງ ໄດ້ກ່າວເຖິງຈຸດປະສົງໃນການນຳເອົາເຄື່ອງ ມາມອບໃຫ້ ໃນຄັ້ງນີ້ ກໍເພື່ອເປັນການຊ່ວຍເຫຼືອບັນເທົາທຸກໃຫ້ພໍ່ແມ່ປະຊາຊົນ ແລະ ບັນດານ້ອງນັກຮຽນທີ່ຂາດເຂີນ, ຊຶ່ງແມ່ນຄວາມເປັນຫ່ວງເປັນໃຍຂອງການນໍາຂັ້ນສູນກາງ ແລະ ຂັ້ນທ້ອງຖິ່ນ ໃນການປັບປຸງຊີວິດການເປັນຢູ່ກໍຄືການແກ້ໄຂຄວາມທຸກຍາກຂອງປະຊາຊົນ ໃຫ້ຫຼຸດລົງເທື່ອລະກ້າວ ເພາະວ່າບ້ານໄຊມຸງຄຸນ ແມ່ນບ້ານ ທີ່ຖືກຜົນກະທົບຈາກການເຊາະເຈື່ອນຂອງດິນ ແລະ ໄດ້ຍົກຍ້າຍມາແຕ່ເມືອງປາກແບງ.ດັ່ງນັ້ນ, ຈຶ່ງມີຄວາມຫຍຸ້ງຍາກໃນຫຼາຍດ້ານໃນການພັດທະນາເສດຖະກິດຂອງຄອບຄົວ.ທ່ານ ໄດ້ຮຽກຮ້ອງ ໃຫ້ອົງການປົກຄອງບ້ານ ແລະ ພໍ່ແມ່ປະຊາຊົນບັນດາເຜົ່າ ຈົ່ງມີຄວາມອົດທົນ, ອຸ່ນອ່ຽນ, ມີຄວາມສາມັກຄີ ແລະ ມີຄວາມຕື່ນຕົວປະກອບສ່ວນເຂົ້າໃນຂະບວນການລວມຂອງບ້ານກໍຄືຂອງເມືອງເພື່ອພ້ອມກັນຈັດຕັ້ງປະບັດແນວທາງຂອງພັກ, ມະຕິຄໍາສັ່ງຂອງຂັ້ນເທິງ ແລະ ແຜນພັດທະນາເສດຖະກິດ-ສັງຄົມຂອງບ້ານໃຫ້ບັນລຸຕາມລະດັບຄາດໝາຍ.
ໂອກາດນີ້, ທ່ານ ສຸກ ສຸລີກັນຍາ ເລຂາຄະນະພັກຮາກຖານບ້ານ ນາຍບ້ານໄຊມຸງຄຸນ ໄດ້ສະແດງຄວາມຂອບໃຈທີ່ທາງສູນກາງ, ແຂວງ ແລະ ເມືອງ ໄດ້ໃຫ້ຄວາມສໍາຄັນ ແລະ ເປັນຫ່ວງເປັນໃຍ ພໍ່ແມ່ປະຊາຊົນ ບ້ານໄຊມຸງຄຸນຂອງພວກເຮົາ ແລະ ທາງບ້ານຈະນໍາເອົາເຄື່ອງຈໍານວນດັ່ງກ່າວນີ້ໄປມອບຕໍ່ໃຫ້ຄອບຄົວ ຕາມເປົ້າໝາຍ ດ້ວຍຄວາມ ໂປ່ງໃສ ແລະ ທົ່ວເຖິງ.
    (ແຫຼ່ງຂ່າວ: ແຂວງອຸດົມໄຊ)