ທ່ານ ພົຕ ຄຳກິ່ງ ຜຸຍຫຼ້າມະນີວົງ ຮອງລັດຖະມົນຕີກະຊວງປ້ອງກັນຄວາມສະຫງົບ (ປກສ) ຫົວໜ້າກົມໃຫຍ່ຕຳຫຼວດ ພ້ອມຄະນະ ໄດ້ເຄື່ອນໄຫວກວດກາ, ຕິດຕາມຊຸກຍູ້ໃຫ້ກຳລັງໃຈເຈົ້າໜ້າທີ່ປ້ອງກັນຄວາມສະຫງົບຢູ່ຕາມຈຸດຕ່າງໆ ເພື່ອຮັບປະກັນຄວາມສະຫງົບ, ຄວາມເປັນລະບຽບຮຽບຮ້ອຍໃນການເປັນ ເຈົ້າພາບຈັດກອງປະຊຸມສຸດຍອດອາຊຽນ ຄັ້ງທີ 44 ແລະ 45 ແລະ ກອງປະຊຸມສຸດຍອດອື່ນໆ ທີ່ ສປປ ລາວໄດ້ຮັບກຽດເປັນເຈົ້າພາບໃນວັນທີ 9 ຕຸລາ 2024.

ການລົງເຄື່ອນໄຫວຄັ້ງນີ້, ທ່ານຮອງລັດຖະມົນຕີກະຊວງ ປກສ ໄດ້ຮັບຟັງການລາຍງານສະພາບ ລວມ, ຂໍ້ສະດວກ, ຂໍ້ຫຍຸ້ງຍາກ ແລະ ບັນຫາອື່ນໆ ໃນໄລຍະປະຕິບັດໜ້າທີ່ໃຫ້ສາມາດຮັບປະກັນໄດ້ຄວາມສະຫງົບ, ຄວາມປອດໄພ 100% ແລະ ມີຄວາມເປັນລະບຽບຮຽບຮ້ອຍໂດຍພື້ນຖານ, ການລົງເຄື່ອນໄຫວຄັ້ງນີ້ປະກອບມີ 4 ຈຸດທີ່ສໍາຄັນຄື: ຈຸດປ້ອງກັນສູນຂ່າວ, ຈຸດປ້ອງກັນຫໍປະຊຸມແຫ່ງຊາດ, ຈຸດປ້ອງກັນຢູ່ໂຮງແຮມດອນຈັນພາເລດ ແລະ ຈຸດປ້ອງກັນຢູ່ໂຮງແຮມແລນມາກລີເວີຊາຍ.

ໂອກາດນີ້, ທ່ານ ພົຕ ຄໍາກິ່ງ ຜຸຍຫຼ້າມະນີວົງ ໄດ້ສະແດງຄວາມຍ້ອງຍໍຊົມເຊີຍ ພ້ອມທັງຮຽກຮ້ອງໃຫ້ກຳລັງປ້ອງກັນຄວາມສະຫງົບທີ່ປະຈຳການເວນຍາມຢູ່ແຕ່ລະຈຸດໃຫ້ພ້ອມກັນເອົາໃຈໃສ່ປະຕິບັດໜ້າທີ່ຮັບປະກັນເຮັດໃຫ້ການເປັນເຈົ້າພາບຈັດກອງປະຊຸມສຸດຍອດອາຊຽນຂອງ ສປປ ລາວ ໃນຄັ້ງນີ້ມີຄວາມສະຫງົບປອດໄພ 100% ເພື່ອເຮັດໃຫ້ກອງປະຊຸມຄັ້ງນີ້ດໍາເນີນໄປດ້ວຍຜົນສໍາເລັດຢ່າງຈົບງາມ. ຈາກນັ້ນທ່ານຮອງລັດຖະມົນຕີກະຊວງ ປກສ ໄດ້ມອບເຄື່ອງບໍລິໂພກໃຫ້ກໍາລັງປ້ອງກັນຄວາມສະຫງົບ ເຊິ່ງສະແດງເຖິງຄວາມເປັນຫ່ວງເປັນໄຍຈາກພັກ-ລັດ ເວົ້າສະເພາະກໍຄືການນໍາກະຊວງປ້ອງກັນຄວາມສະຫງົບທີ່ເຫັນໄດ້ຄວາມໝາຍ ແລະ ຄວາມສໍາຄັນຂອງວຽກງານປ້ອງກັນຄວາມສະຫງົບ ຄວາມເປັນລະບຽບຮຽບຮ້ອຍຂອງສັງຄົມ ເວົ້າສະເພາະແມ່ນການປ້ອງກັນກອງປະຊຸມສຸດຍອດອາຊຽນ ຄັ້ງທີ 44 ແລະ 45 ແລະ ກອງປະຊຸມສຸດຍອດອື່ນໆ ທີ່ ສປປ ລາວ ໄດ້ຮັບກຽດເປັນເຈົ້າພາບໃນຄັ້ງນີ້ ໃຫ້ຮັບປະກັນໄດ້ຄວາມສະຫງົບປອດໄພຮອບດ້ານ.

ຂ່າວ-ພາບ: ຄຳໂຖ