ໂດຍ: ແສງຈັນ

ວຽກງານຫັດຖະກໍາແຜ່ນແພ ແມ່ນວຽກງານທີ່ສໍາຄັນ ແລະ ຄຽງຄູ່ກັບຄົນລາວມາແຕ່ດົນນານ ຈົນກາຍເປັນຕໍານານ ການນຸ່ງຖື ຂອງປວງຊົນລາວ, ພັກ-ລັດຖະບານ ຍາມໃດກໍໄດ້ປຸກລະດົມຂົນຂວາຍປວງຊົນເພີ່ມທະວີການຜະລິດໃນລະດັບຄອບຄົວໃຫ້ກາຍເປັນສິນຄ້າ ເພື່ອສ້າງລາຍຮັບໃຫ້ແກ່ຄອບຄົວ, ທັງສົ່ງເສີມການຜະລິດຂະໜາດນ້ອຍໃຫ້ກ້າວສູ່ຂະໜາດກາງ ແລະ ໃຫ້ກາຍເປັນອຸດສາຫະກຳການຜະລິດທີ່ໄດ້ມາດຕະຖານ ສາມາດແຂ່ງຂັນຈຳໜ່າຍທັງຕະຫຼາດພາຍໃນ ແລະ ສົ່ງອອກສູ່ສາກົນໄດ້ ພ້ອມທັງເປັນການເປີດໂອກາດໃຫ້ບັນດາຫົວໜ່ວຍທຸລະກິດທີ່ເຂົ້າຮ່ວມໄດ້ແລກປ່ຽນປະສົບການຄ້າ-ຂາຍນຳກັນ.

ທ່ານນາງ ວັດສຸລິນ ມິດທະຍາພອນ ເຈົ້າຂອງຮ້ານຂາຍຜະລິດຕະພັນຜ້າຝ້າຍ ແຂວງຫຼວງພະບາງໃຫ້ສຳພາດໃນໂອກາດເຂົ້າຮ່ວມງານວາງສະແດງຜະລິດຕະພັນລາວ ປະຈໍາປີ 2024 ທີ່ສູນການຄ້າລາວ-ໄອເຕັກວ່າ: ຜະລິດຕະພັນຜ້າຝ້າຍຂອງພວກເຮົາໄດ້ເລີ່ມຜະລິດມາແຕ່ປີ 2020 ພາຍຫຼັງຜະລິດແລ້ວໃນເບື້ອງຕົ້ນກໍຈຳໜ່າຍພາຍໃນແຂວງ, ຈາກນັ້ນທາງຂະແໜງການກ່ຽວຂ້ອງໄດ້ແນະນຳໃຫ້ເຂົ້າຮ່ວມງານວາງສະແດງສິນຄ້າພາຍໃນແຂວງ ແລະ ຕ່າງແຂວງ.ການທີ່ໄດ້ເຂົ້າຮ່ວມງານຕ່າງໆ ຈຶ່ງກາຍເປັນທີ່ຮູ້ຈັກຂອງລູກຄ້າຫຼາຍຂຶ້ນ ສັງເກດໄດ້ວ່າມີທັງລູກຄ້າຊື້ໄປໃຊ້ ແລະ ຊື້ນໍາໄປຂາຍຕໍ່, ການເຂົ້າຮ່ວມງານຄັ້ງນີ້ໄດ້ນຳເອົາສິນຄ້າຫຼາຍປະເພດມາວາງຈຳໜ່າຍ ເປັນຕົ້ນ ກະເປົາຫຼາຍກວ່າ 30 ລາຍການ, ຜ້າບ່ຽງ, ຜ້າປູໂຕະ, ເສື້ອ, ໝວກ ແລະ ຜະລິດຕະພັນອື່ນໆ. ສິນຄ້າດັ່ງກ່າວ ແມ່ນຍ້ອມດ້ວຍສີທຳມະຊາດ, ລາຄາເລີ່ມຕົ້ນແຕ່ 25.000 ກີບ ຫາ 400.000 ກີບ.

ປັດຈຸບັນມີຊ່າງຜະລິດປະຈຳຮ້ານສຳລັບຫຍິບກະເປົາ 5 ຄົນ, ສິນຄ້າທຸກຢ່າງແມ່ນເນັ້ນຄວາມອະອຽດອ່ອນ ແລະ ຄຸນນະພາບ ແລະ ເນັ້ນການອອກແບບທີ່ເປັນເອກະລັກ. ດັ່ງນັ້ນຜະລິດຕະພັນຝ້າຍຈຶ່ງໄດ້ຮັບຄວາມນິຍົມຈາກລູກຄ້າສະເໝີມາ. ເຖິງແມ່ນວ່າສະພາບການເໜັງຕີງຂອງອັດຕາເງິນເຟີ້, ຄ່າຄອງຊີບຈະແພງຂຶ້ນກໍຕາມແຕ່ທາງຮ້ານກໍມີຄວາມພະຍາຍາປະຄັບປະຄອງຄວບຄຸມລາຄາບໍ່ໃຫ້ສູງຫຼາຍ ຈຸດປະສົງເພື່ອໃຫ້ລູກຄ້າສາມາດຊື້-ຊົມໃຊ້ຜະລິດຕະພັນຂອງຮ້ານໄດ້. ມາຮອດປັດຈຸບັນມີລູກຄ້າທີ່ຊົມໃຊ້ຜະລິດຕະພັນຜ້າຝ້າຍຂອງຮ້ານພວກເຮົາເກືອບທົ່ວປະເທດ ພ້ອມກັນນັ້ນກໍມີນັກທ່ອງທ່ຽວທີ່ເຂົ້າມາທ່ຽວຢູ່ແຂວງຫຼວງພະບາງຈຳນວນໜຶ່ງຊື້ເປັນເຄື່ອງຕ້ອນຂອງຝາກ ແລະ ຊື້ໃນລາຄາຂາຍສົ່ງ ນຳໄປຂາຍຕື່ມອີກ, ນອກຈາກຂາຍໃນໜ້າຮ້ານແລ້ວຍັງຂາຍຜ່ານລະບົບອອນລາຍ ຖ້າທ່ານໃດຕ້ອງການສາມາດຕິດຕໍ່ໄດ້ທີ່ 020 2862 4011.

ທ່ານນາງ ວັດສຸລິນ ມິດທະຍາພອນ ກ່າວຕື່ມອີກວ່າ: ຍ້ອນໄດ້ຮັບຄວາມໄວ້ວາງໃຈຈາກຜູ້ຊົມໃຊ້ ສະເໝີມາ ແຜນໃນຕໍ່ໜ້າແມ່ນຈະສືບຕໍ່ເອົາໃຈໃສ່ໃນການຜະລິດ ແລະ ອອກແບບໃຫ້ທັນກັບຄວາມຕ້ອງການຂອງຕະຫຼາດ ກໍຄື ຜູ້ຊົມໃຊ້ ທັງພາຍໃນແລະ ຕ່າງປະເທດ, ຄວາມຫວັງ ກໍເພື່ອໃຫ້ຜູ້ຊົມໃຊ້ ໄດ້ກັບຄືນມາຊື້ຜະລິດຕະພັນທີ່ຮ້ານຂອງພວກເຮົາ.