ໂດຍ: ວັນເພັງ
ສື່ມວນຊົນ ຈາກພາກສ່ວນຕ່າງໆທັງພາຍໃນ ແລະ ຕ່າງປະເທດ ຕ່າງກໍມີຄວາມພາກພູມໃຈ ທີ່ໄດ້ຮັບໃຊ້ກອງປະຊຸມສຸດຍອດອາຊຽນຄັ້ງທີ 44 ແລະ 45 ແລະ ກອງປະຊຸມສຸດຍອດກ່ຽວຂ້ອງອື່ນໆ ທີ່ ສປປ ລາວ ໄດ້ຮັບກຽດເປັນເຈົ້າພາບ ໃນລະຫວ່າງວັນທີ 8-11 ຕຸລາ 2024 ໂດຍສະເພາະທ່ານ ຈາຣຸວາ ຣາດຊາໂລຫະ (Jaruwa Rachaloha) ນັກຂ່າວ ທັງເປັນຊ່າງພາບຊ່ອງໄທ TBS ຈາກຣາຊະອານາຈັກໄທ ໄດ້ສະແດງຄວາມຮູ້ສຶກ ຕໍ່ນັກຂ່າວໜັງສືພິມ ປະຊາຊົນ ໃນວັນທີ 9 ຕຸລາ 2024 ວ່າ: ຕົນເອງມີຄວາມຮູ້ສຶກພາກພູມໃຈ ແລະ ດີໃຈຫຼາຍ ທີ່ໄດ້ມີໂອກາດມາຮັບໃຊ້ກອງປະຊຸມດັ່ງກ່າວ ຊຶ່ງເປັນວຽກທີ່ໃຫຍ່ ແລະ ສຳຄັນຫຼາຍ ທັງເປັນວຽກງານລະດັບສາກົນ (ອາຊຽນ), ການມາຮັບໃຊ້ໃນຄັ້ງນີ້ແມ່ນເປັນຄັ້ງທີ 2, ເທື່ອນີ້ມີນັກຂ່າວທີ່ມາຈາກຊ່ອງໄທ TBS ຈໍານວນ 2 ທ່ານ ຊຶ່ງວຽກງານດັ່ງກ່າວນີ້ແມ່ນມີຄວາມສໍາຄັນຫຼາຍ. ດັ່ງນັ້ນ, ຈະເຮັດໜ້າທີ່ເປັນຜູ້ສື່ຂ່າວ, ຖ່າຍພາບວີດີໂອໃຫ້ອອກມາດີທີ່ສຸດ ເພື່ອນໍາເອົາຂໍ້ມູນຂ່າວສານຕ່າງໆນໍາໄປເຜີຍແຜ່ໃຫ້ຊາວໄທ ກໍຄືຊາວຕ່າງປະເທດໄດ້ຮັບຮູ້ຢ່າງກວ້າງຂວາງ.
ສິ່ງທີ່ໜ້າພາກພູມໃຈທີ່ສຸດການມາຮັບໃຊ້ກອງປະຊຸມໃນຄັ້ງນີ້, ຄືໄດ້ເຫັນຄວາມສວຍງາມຂອງປະເທດລາວ, ຄົນລາວມີຮອຍຍິ້ມໄມຕີຈິດ ມິດຕະພາບ ຮັກແຂກແພງຄົນເປັນກັນເອງ, ມີວັດທະນະທຳ, ມີອາຫານທີ່ເປັນເອກະລັກຄ້າຍຄືກັບປະເທດໄທ. ພ້ອມນັ້ນ, ການຮັບໃຊ້ກອງປະຊຸມໃນຄັ້ງນີ້, ເຫັນວ່າທຸກສິ່ງຢ່າງມີຄວາມສະດວກ ເປັນຕົ້ນການເກັບກຳຂ່າວ ກໍແມ່ນໄດ້ຮັບຂໍ້ມູນຂ່າວສານຢ່າງວ່ອງໄວ, ມີພື້ນທີ່ (ສູນຂ່າວ) ທີ່ຮອງຮັບສໍາລັບສື່ມວນຊົນໃນການລາຍງານຂ່າວທີ່ສະດວກສະບາຍ, ກວ້າງຂວາງ ເຮັດໃຫ້ມີຄວາມເປັນລະບຽບຮຽບຮ້ອຍເປັນຢ່າງດີ. ແນວໃດກໍຕາມ ມາ ສປປ ລາວ ເທື່ອໃດ ກໍເຫັນໄດ້ວ່າປະເທດລາວມີຄວາມສວຍງາມ, ມີຄວາມອຸດົມສົມບູນໄປດ້ວຍຊັບພະຍາກອນທຳມະຊາດ, ມີເອກກະລັກສະເພາະ, ການດຳລົງຊີວິດຂອງປະຊາຊົນມີຄວາມລຽບງ່າຍ, ມີຄວາມສະຫງົບ, ຄວາມເປັນລະບຽບຮຽບຮ້ອຍ. ໃນນັ້ນ, ຄົນລາວຍັງເປັນຄົນທີ່ມີອັດທະຍາໄສດີ.
ທ່ານ ຈາຣຸວາ ຣາດຊາໂລຫະ ຍັງກ່າວດ້ວຍຄວາມຕື່ນເຕັ້ນອີກວ່າ: ຕົນເອງບໍ່ພຽງແຕ່ມາເຄື່ອນໄຫວເກັບກໍາຂ່າວ, ຖ່າຍພາບໃນກອງປະຊຸມຄັ້ງນີ້ ເພື່ອນໍາໄປເຜີຍແຜ່ເທົ່ານັ້ນ, ຍັງຈະນໍາເອົາຂໍ້ມູນເລື່ອງລາວຄວາມປະທັບໃຈຕ່າງໆທີ່ ສປປ ລາວ ນໍາໄປເຜີຍແຜ່ ໃຫ້ຄົນໄທ ກໍຄືຊາວໂລກໄດ້ຮັບຮູ້ຄວາມເປັນລາວຫຼາຍຂຶ້ນ ແລະ ຖ້າມີໂອກາດກໍຢາກມາປະຕິບັດໜ້າທີວຽກງານດັ່ງກ່າວທີ່ ສປປ ລາວ ອີກຄັ້ງ. ພ້ອມນັ້ນ, ສື່ມວນຊົນຈາກພາກສ່ວນຕ່າງໆ ທັງພາຍໃນ ແລະ ຕ່າງປະເທດ ລ້ວນແຕ່ ມີຄວາມພາກພູມໃຈຫຼາຍທີ່ໄດ້ຮັບໃຊ້ກອງປະຊຸມສຸດຍອດອາຊຽນໃນຄັ້ງນີ້.
