ໃນວັນທີ່ 8 ຕຸລາ ຜ່ານມານີ້ ແຂວງໄຊສົມບູນ ໄດ້ປະກາດ-ຮັບຮອງເປັນແຂວງຢຸດຕິການຖ່າຍຊະຊາຍເປັນແຂວງທີ່ X ຂອງ ສປປ ລາວ ຂຶ້ນທີ່ສະໂມສອນເມືອງອະນຸວົງ ແຂວງໄຊສົມບູນ ໂດຍການເຂົ້າຮ່ວມຂອງທ່ານ ບຸນແຝງ ພູມມະໄລສິດ ລັດຖະມົນຕິກະຊວງສາທາລະນະສຸກ, ມີທ່ານ ພອຍຄຳ ຮຸ່ງບຸນຍວງ ເຈົ້າແຂວງໄຊສົມບູນ, ມີແຂກຖືກເຊີນຈາກບັນດາແຂວງທົ່ວປະເທດ ແລະ ພາກສ່ວນທີ່ກ່ຽວຂ້ອງພາຍໃນແຂວງເຂົ້າຮ່ວມ.

ກ່ອນເຂົ້າສູ່ພິທີຢ່າງເປັນທາງການ ໄດ້ຮັບຊົມການສະແດງສິນລະປະຈາກສູນວັດທະນະທຳເດັກແຂວງ. ຈາກນັ້ນ ໃນພິທີກໍໄດ້ຮັບຟັງການຜ່ານຂໍ້ຕົກລົງອະນຸມັດໃຫ້ແຂວງໄຊສົມບູນ ເປັນແຂວງຢຸດຕິການຖ່າຍຊະຊາຍ ພ້ອມທັງຮັບຟັງບົດລາຍງານຜົນສຳເລັດການຈັດຕັ້ງປະຕິບັດວຽກງານ ຢຸດຕິການຖ່າຍຊະຊາຍ. ຊຶ່ງແຂວງໄຊສົມບູນປະກອບມີ 5 ເມືອງ ມີ 89 ບ້ານ ມີປະຊາກອນທັງໝົດ 103,508 ຄົນ, ຍິງ 49,888 ຄົນ, ມີ 17,549 ຄົວເຮືອນ, ມີ 17,676 ຄອບຄົວ, ມີລາຍໄດ້ສະເລ່ຍ 24.9 ລ້ານກີບ/ຄົນ/ປີ. ແຂວງໄຊສົມບູນໄດ້ຈັດຕັ້ງປະຕິບັດວຽກງານຢຸດຕິການຖ່າຍຊະຊາຍໃນໄລຍະ 5 ປີທີ່ຜ່ານມາ ຊຶ່ງໄດ້ຈັດຕັ້ງປະຕິບັດໃນ 3 ຂັ້ນຕອນຄື: ການກະກຽມ, ການເກັບກຳ ແລະ ວິເຄາະວິໃຈຂໍ້ມູນ. ການກວດກາ, ຕິດຕາມຊຸກຍູ້ ແລະ ປະເມີນຜົນທັງ 3 ຂັ້ນຕອນນີ້ ເຫັນວ່າແຂວງໄຊສົມບູນສາມາດປະຕິບັດໄດ້ 100%.

ໂອກາດດຽວກັນນີ້, ກໍໄດ້ມີພິທີມອບໃບຢັ້ງຢືນ ແຂວງໄຊສົມບູນ ເປັນແຂວງຢຸດຕິການຖ່າຍຊະຊາຍ ພ້ອມທັງມອບໃບຍ້ອງຍໍໃຫ້ກົມກອງ ແລະ ບຸກຄົນດີເດັ່ນ. ຫຼັງຈາກນັ້ນ, ທ່ານ ລັດຖະມົນຕີກະຊວງສາທາລະນະສຸກ ແລະ ທ່ານ ເຈົ້າແຂວງໄຊສົມບູນ ພ້ອມດ້ວຍຜູ້ເຂົ້າຮ່ວມ ໄດ້ຮ່ວມກັນຕັດແຖບຜ້າເປີດປ້າຍ ແລະ ລັ່ນຄອງ 9 ບາດ ເພື່ອເປັນສິລິມຸງຄຸນ ໃນການປະກາດແຂວງໄຊສົມບູນ ເປັນແຂວງຢຸດຕິຖ່າຍຊະຊາຍ ຢ່າງເປັນທາງການ.

(ຂ່າວ: ແກ່ນຈັນ ທຳມະນີ)