ວັນທີ 8 ຕຸລາຜ່ານມາທີ່ ເຂດເສດຖະກິດພິເສດສາມຫຼ່ຽມຄຳ ເມືອງຕົ້ນເຜິ້ງ ແຂວງບໍ່ແກ້ວ ໄດ້ມີການທົດລອງການປູກເຂົ້າໃນເນື້ອທີ່ 11.2 ເຮັກຕາ ເຫັນໄດ້ວ່າມີຜົນສຳເລັດໃນການເກັບກູ້ເທື່ອທຳອິດ ເປັນໂຄງການໃຫຍ່ອັນໜຶ່ງຢູ່ລາວທີ່ໄດ້ຮ່ວມມືກັບກຸ່ມບໍລິສັດດອກງີ້ວຄຳ ແລະ ສະຖາບັນວິທະຍາສາດກວາງຊີເພື່ອສືບຕໍ່ປະຕິບັດຍຸດທະສາດພັດທະນາ "ໂຄງການກະສິກຳຂະໜາດໃຫຍ່" ຂອງ ເຂດເສດຖະກິດພິເສດສາມຫຼ່ຽມຄຳລາວ ແລະ ຊຸກຍູ້ການຫັນປ່ຽນ ເພື່ອພັດທະນາກະສິກຳຂອງລາວ, ກຸ່ມບໍລິສັດດອກງີ້ວຄຳ ແລະ ສະຖາບັນວິທະຍາສາດກວາງຊີ ຈຶ່ງໄດ້ຮ່ວມມືກັນຈັດຕັ້ງໂຄງການທີ່ມີຊື່ວ່າ “ທົ່ງນາທົ່ງໜຶ່ງ ລ້ຽງງົວໜຶ່ງໂຕ”

ແນວພັນ “ເຂົ້າກໍໃຫຍ່” ທີ່ນຳມາປູກໃນຄັ້ງນີ້ ບໍ່ພຽງແຕ່ມີຈຸດໄດ້ປຽບຂອງ ເຂົ້າພື້ນເມືອງເຊັ່ນ: ມີຮວງຂະໜາດໃຫຍ່, ມີເມັດຫຼາຍ, ສາມາດປູກຝັງໄດ້ແຂງແຮງ ແລະ ມີຄຸນນະພາບເຂົ້າທີ່ດີເລີດ. ມີຄວາມສູງໂດດເດັ່ນສະເລ່ຍປະມານ 1.8-2.2 ແມັດ ຊຶ່ງສູງກວ່າເຂົ້າທົ່ວໄປສອງເທົ່າ ເຟືອງຂອງເຂົ້າຍັງສາມາດໃຊ້ເປັນຫຍ້າໝັກຄຸນນະພາບສູງ ພ້ອມຍັງໄດ້ຜົນປະໂຫຍດຂອງເມັດພືດ ແລະ ເປັນອາຫານໃຫ້ແກ່ສັດລ້ຽງໄດ້ທັງສອງທາງ.

ສະຖານທີ່ທົດລອງປູກໃນຄັ້ງນີ້ແມ່ນຢູ່ທາງພາກເໜືອຂອງຣີສອດສະໜາມກ໊ອຟສາກົນພູກີ່ວລົມ ໄດ້ເລີ່ມປູກມາແຕ່ຕົ້ນເດືອນມິຖຸນາຜ່ານມາ ໂຄງການໄດ້ສຳເລັດວຽກງານການຫັນປ່ຽນດິນເຊັ່ນ: ໜອງ, ຄອງ, ນາ ແລະ ກໍ່ສ້າງເສັ້ນທາງ. ພ້ອມຍັງໄດ້ປະເຊີນກັບສິ່ງທ້າທາຍຂອງດິນທີ່ມີຄວາມສູງ ແລະ ລະດັບຄວາມຍາກລຳບາກ ທາງທີມງານໂຄງການໄດ້ປັບປ່ຽນຍຸດທະສາດການປູກຢ່າງຄ່ອງແຄ້ວ ແລະ ໄດ້ຕັດສິນໃຈໃຊ້ວິທີການປູກແບບຢອດເມັດໂດຍກົງ ໃນເນື້ອທີ່ 2.3 ເຮັກຕາໂດຍປູກດ້ວຍວິທີເພາະ ແລະ ຍ້າຍກ້າເຂົ້າຈຳນວນ 8.6 ເຮັກຕາ ມີເນື້ອທີ່ປູກຕົວຈິງທັງໝົດແມ່ນ 11.2 ເຮັກຕາ.

ທ່ານ ຊາງ ຈິງຢິງ(Shang Jingying) ຜູ້ຈັດການບໍລິສັດກະສິກຳ ກຸ່ມບໍລິສັດດອກງີ້ວຄຳ ໄດ້ກ່າວວ່າ: ໃນໄລຍະທີ່ພວກເຮົາເກັບກ່ຽວນີ້, ໄລຍະທຳອິດພວກເຮົາໄດ້ນຳໃຊ້ແຮງງານຂອງພະນັກງານໃນການເກັບກ່ຽວ ຄາດວ່າຈະສາມາດນຳໃຊ້ລົດເກັບກ່ຽວໃນສ່ວນທີ່ເຫຼືອໃຫ້ສຳເລັດໃນກາງເດືອນຕຸລານີ້. ເນື້ອທີ່ທົດລອງໃນການປູກເຂົ້າໃນຄັ້ງນີ້ ຄາດວ່າຈະໃຫ້ຜົນຜະລິດເຂົ້າໄດ້ປະມານ 600-800 ກິໂລແລະ ເຟືອງເຂົ້າ 3,000–3,500 ກິໂລ ໃນເນື້ອທີ່ທົດລອງທັງໝົດ 11.2 ເຮັກຕາ ຈະເກັບກ່ຽວເຂົ້າໄດ້ປະມານ 134 ໂຕນ ແລະ ເຟືອງເຂົ້າຫຼາຍກວ່າ 504 ໂຕນ.

ທ່ານ ປາລະມີ ສົນບຸດທະແສນ ຮອງຫົວໜ້າພະແນກກະສິກຳ ແລະ ປ່າໄມ້ ແຂວງບໍ່ແກ້ວ ໄດ້ມີຄຳເຫັນຕໍ່ກັບໂຄງການປູກເຂົ້າວ່າ: ການດຳເນີນໂຄງການປູກເຂົ້າກໍ່ໃຫຍ່ນີ້ ເຫັນວ່າປະສົບຜົນສຳເລັດ ແລະ ຍັງໄດ້ສ້າງແຮງບັນດານໃຈໃຫ້ກັບການຜະລິດທາງການກະເສດໃນປະເທດລາວເຮົາ ພ້ອມຈະຮ່ວມມືກັບກຸ່ມບໍລິສັດດອກງີ້ວຄຳ ເພື່ອຈະສົ່ງເສີມ ແລະ ສະໜັບສະໜູນຜົນສຳເລັດອັນນີ້ໄປຄຽງຄູ່ກັບແຂວງບໍ່ແກ້ວ ແລະ ປະເທດລາວເຮົາ

ເຂດເສດຖະກິດພິເສດ ສາມຫຼ່ຽມຄຳ ມີເງື່ອນໄຂທີ່ເປັນເອກະລັກສະເພາະໃນການປູກພືດ, ການປູກຜັກພືດພື້ນເມືອງເຊັ່ນ: ຜັກທ້ອງຖິ່ນ ແລະ ໝາກໄມ້ເຂດຮ້ອນກໍນັບມື້ນັບເຕີບໃຫຍ່ຂຶ້ນ. ການປູກ ແລະ ການເກັບກູ້ “ເຂົ້າກໍໃຫຍ່” ເຫັນໄດ້ວ່າປະສົບຜົນສຳເລັດ ແລະ ໄດ້ຮັບສັກກະຍະພາບອັນໃໝ່ເຂົ້າໃນການພັດທະນາກະສິກຳຂອງເຂດເສດຖະກິດພິເສດສາມຫຼ່ຽມຄຳ,ທັງເປັນຕົວຢ່າງໃໝ່ໃຫ້ແກ່ການຮ່ວມມືດ້ານວິທະຍາສາດ ແລະ ເຕັກໂນໂລຊີກະສິກຳທາງດ້ານສາກົນ.

ໃນອະນາຄົດ ເຂດດັ່ງກ່າວຈະນຳເອົາແນວພັນກະສິກຳທີ່ມີຄຸນນະພາບສູງ ແລະ ເຕັກໂນໂລຊີກະສິກຳທີ່ກ້າວໜ້າເພີ່ມຂຶ້ນ ເພື່ອຍົກສູງຄຸນນະພາບ ແລະ ປະສິດທິຜົນຂອງອຸດສາຫະກຳກະສິກຳຂອງເຂດ, ປະກອບສ່ວນພູມປັນຍາ ແລະ ຄວາມເຂັ້ມແຂງໃຫ້ແກ່ການພັດທະນາກະສິກຳຂອງລາວ ແລະ ຊ່ວຍໃຫ້ຊາວກະສິກອນລາວເພີ່ມລາຍຮັບໃຫ້ເປັນຢ່າງດີ.

(ຂ່າວ-ພາບ: ເຂດເສດຖະກິດພິເສດສາມຫຼ໋ຽມຄຳ)