ເມື່ອບໍ່ດົນມານີ້, ສະມາຊິກສະພາປະຊາຊົນແຂວງຫຼວງນໍ້າທາປະຈໍາເຂດເລືອກຕັ້ງເມືອງລອງໄດ້ນໍາເອົາເຄື່ອງຊ່ວຍເຫຼືອມາມອບໃຫ້ປະຊາຊົນ 4 ບ້ານ, (ກຸ່ມບ້ານທາດ) ທີ່ປະສົບກັບອຸທົກກະໄພ, ຊຶ່ງນໍາພາໂດຍ ທ່ານ ນໍລິນ ໄມທອງ ຮອງເລຂາພັກເມືອງ ປະທານກວດກາພັກອົງການກວດກາລັດເມືອງ, ສະມາຊິກສະພາປະຊາຊົນແຂວງ ປະຈໍາເຂດເລືອກຕັ້ງເມືອງລອງພ້ອມຄະນະ ແລະ ອໍານາດການປົກຄອງບ້ານເຂົ້າຮ່ວມ.

ເຄື່ອງຊ່ວຍເຫຼືອໃນຄັ້ງນີ້, ເປັນເຄື່ອງຕ້ານໄພພິບັດ ຊຶ່ງແມ່ນທ່ານເຈົ້າແຂວງຫຼວງນໍ້າທາໄດ້ນຳມາມອບໃຫ້ເມືອງລອງໃນຄັ້ງວັນທີ 26 ເດືອນກັນຍາ ທີ່ຜ່ານມາ ເຄື່ອງຊ່ວຍເຫຼືອ 4 ບ້ານດັ່ງກ່າວ ຊຶ່ງປະກອບມີນ້ຳດື່ມຈໍານວນ 20 ແພັກ, ເຄື່ອງນຸ່ງຫົ່ມ 30 ກ່ວາຖົງ, ເພື່ອເປັນການມອບຊ່ວຍເຫຼືອໃຫ້ແກ່ພໍ່ແມ່ປະຊາຊົນຈໍານວນ 4 ບ້ານຄື: ບ້ານແສນເຖົ້າ, ບ້ານນ້ຳມະ, ບ້ານແພວແຢະ ແລະ ບ້ານ ສີສິມູນ, (ກຸ່ມບ້ານທາດ) ທີ່ປະສົບກັບອຸທົກກະໄພພາຍຸຢາກິໃນຕົ້ນເດືອນກັນຍາທີ່ຜ່ານມາ. ໃຫ້ກຽດກ່າວມອບ ໂດຍທ່ານ ນໍລິນ ໄມທອງ, ກ່າວຮັບໂດຍອໍານາດການປົກຄອງບ້ານທັງ 4 ບ້ານ, ພ້ອມທັງສະແດງຄວາມຂອບອົກຂອບໃຈ ແລະ ຮູ້ບຸນຄຸນເປັນຢ່າງສູງຕໍ່ກັບການນຳພັກ-ລັດທີ່ເຫັນໄດ້ຕໍ່ຄວາມສຳຄັນ ແລະ ຈຳເປັນ ນຳເອົາວັດຖຸປັດໄຈມາມອບຊ່ວຍເຫຼືອໃນຄັ້ງນີ້, ຫວັງຢ່າງຍິ່ງວ່າໂອກາດໜ້າຄົງຈະໄດ້ຮັບການຊ່ວຍເຫຼືອຈາກຂັ້ນເທິງຕື່ມອີກ.

(ຂ່າວ: ຈັນສຸກ ຜົນປະເສີດ ນັກຂ່າວ ເມືອງລອງ)