ເນື່ອງໃນໂອກາດງານບຸນປະເພນີຊ່ວງເຮືອປະຈຳປີ 2024 ທີ່ຕິດພັນກັບການເປີດປີທ່ອງທ່ຽວລາວຢູ່ເມືອງຫົງສາ ແຂວງໄຊຍະບູລີ ໄດ້ຈັດກິດຈະກຳປະກວດອາຫານພື້ນບ້ານຂຶ້ນເມື່ອບໍ່ດົນມານີ້. ຢູ່ທີ່ເດີ່ນຜາມໄຊທ່າຊ່ວງເຮືອຂອງເມືອງ. ກິດຈະກຳປະກວດອາຫານພື້ນບ້ານຄັ້ງນີ້, ມີ 13 ບ້ານເທດສະບານຄື: ບ້ານແທ່ນຄໍາ, ນາປຸ່ງ, ສີມຸງຄຸນ, ໂພນໄຊ, ຈອມແຈ້ງ, ຈໍາປາ, ສີບຸນເຮືອງ, ວຽງແກ້ວ, ໂພນຈັນ, ເມືອງຫານ, ແກ່ນຄໍາ, ນາສ້ານ ແລະ ບ້ານໂພນສູງ.

ຜ່ານການປະກວດຕາມມາດຖານຄື: ອາຫານຫຼາຍຢ່າງຄົບໝວດໝູ່, ມີຄວາມແຊບນົວ, ສະອາດ, ການຕົບແຕ່ງອາຫານຈົບງາມ ແລະ ການແຕ່ງກາຍຂອງຜູ້ບັນລະຍາຍ. ຜົນປະກົດວ່າ: ໄດ້ທີ 1 ແມ່ນບ້ານໂພນໄຊ ໄດ້ຮັບລາງວັນເງິນສົດ 2 ລ້ານກີບ; ທີ 2 ແມ່ນບ້ານຈຳປາ ໄດ້ຮັບລາງວັນເງິນສົດ 1 ລ້ານ 8 ແສນ; ອັນດັບທີ 3 ແມ່ນບ້ານສີມຸງຄຸນ ໄດ້ລາງວັນເງິນສົດ 1 ລ້ານ 5 ແສນກີບ ແລະ 10 ບ້ານແມ່ນໄດ້ຮັບລາງວັນຊົມເຊີຍ ບ້ານລະ 1 ລ້ານ 2 ແສນກີບ.

ໃນງານປະກວດນີ້, ກໍເປັນກິດຈະກຳໜຶ່ງທີ່ເປັນການປະກອບສ່ວນເຂົ້າໃນງານບຸນປະເພນີຊ່ວງເຮືອປະຈຳປີ ຕິດພັນກັບການທ່ອງທ່ຽວລາວ ພ້ອມທັງເປັນການສົ່ງເສີມການປຸງແຕ່ງອາຫານທີ່ນໍາໃຊ້ວັດຖຸດິບຂອງພື້ນບ້ານທີ່ເປັນເອກະລັກຂອງຊາວລາວກໍຄືຊາວເມືອງຫົງສາໃຫ້ສືບທອດຕະຫຼອດໄປ.

(ຂ່າວ-ພາບ: ກິດຕິສັກ ບົວໄລ)