ກອງປະຊຸມປຶກສາຫາລືວຽກງານໂຄງການກໍ່ສ້າງສູນພັດທະນາສີມືແຮງງານ ແຂວງອຸດົມໄຊ ໄດ້ຈັດຂຶ້ນ ໃນວັນທີ່ 14 ຕຸລາຜ່ານມານີ້ ທີ່ຫ້ອງປະຊຸມພະແນກແຮງງານ ແລະ ສະຫວັດດີການສັງຄົມແຂວງອຸດົມໄຊ, ໂດຍມີທ່ານ ພົງໄຊສັກ ອິນຖາລາດ ຮອງລັດຖະມົນຕີກະຊວງແຮງງານ ແລະ ຫວັດດີການສັງຄົມ, ມີທ່ານ ສົມຈິດ ປັນຍາສັກ ຮອງເຈົ້າແຂວງ ຫົວໜ້າຄະນະຮັບຜິດຊອນຊີ້ນໍາໂຄງການກໍ່ສ້າງສູນພັດທະນາສີມືແຮງງານ ແຂວງອຸດົມໄຊ, ພ້ອມດ້ວຍພາກສ່ວນກ່ຽວຂ້ອງພາຍໃນແຂວງເຂົ້າຮ່ວມ.

ຈຸດປະສົງຂອງການປືກສາຫາລືຄັ້ງນີ້, ເພື່ອເປັນການປຶກສາຫາລືບາງວຽກງານຂອງໂຄງການກໍ່ສ້າງສູນພັດທະນາສີມືແຮງງານ ແຂວງອຸດົມໄຊ, ທີ່ເຫັນວ່າຄວນປັບປ່ຽນ ຫຼື ດັດແກ້ແບບການກໍ່ສ້າງຕ່າງໆ ເພື່ອໃຫ້ເໝາະສົມ ກັບສະພາບປັດຈຸບັນ ເພື່ອນຳສະເໜີຕໍ່ຜູ້ໃຫ້ທຶນ, ພ້ອມດຽວກັນນີ້ກໍໄດ້ຮັບຟັງການລາຍງານຄວາມຄືບໜ້າ ການຈັດຕັ້ງປະຕິບັດໂຄງການ, ຊຶ່ງໂຄງການດັ່ງກ່າວ ແມ່ນໂຄງການຊ່ວຍເຫຼືອລ້າຂອງລັດຖະບານ ສປ ຈີນ ແລະ ໂຄງການສົມທົບຕ່າງປະເທດ (ODA) ກໍ່ສ້າງສູນພັດທະນາສີມືແຮງງານ ແຂວງອຸດົມໄຊ ຈໍານວນ 4 ໂຄງການ. ນອກນີ້, ຍັງໄດ້ສົມທົບກັບຂະແໜງການທີ່ກ່ຽວຂ້ອງລົງຕິດຕາມກວດກາ ແລະ ແກ້ໄຂບັນຫາທີ່ຍັງຄົງຄ້າງ ເປັນຕົ້ນແມ່ນບັນຫາທີ່ດິນຕິດເເປະ, ການກຳນົດຈຸດທີ່ຕັ້ງຂອງກຳແພງອ້ອມສູນຄືນໃໝ່, ສົມທົບກັບບໍລິສັດກໍ່ສ້າງໃນການໄກ່ເກ່ຍປະຊາຊົນທີ່ໄດ້ຮັບຜົນກະທົບຈາການຖົມດີນ.

(ຂ່າວ: ແສງອາທິດ)