ກອງປະຊຸມຝຶກອົບຮົມການນໍາໃຊ້ລະບົບຖານຂໍ້ມູນ LCIS ແລະ ການປັບປຸງຖານຂໍ້ມູນການເຊົ່າແລະ ສຳປະທານທີ່ດິນຂອງລັດ ໃຫ້ຂະແໜງການເງິນ ພາຍໃຕ້ໂຄງການຊິວິດຈາກດິນ (LFL) ໄດ້ຈັດຂຶ້ນວັນທີ 14 ຕຸລາຜ່ານມາ ທີ່ຫ້ອງປະຊຸມພະແນກການເງິນ ແຂວງ ອຸດົມໄຊ, ໂດຍການເປັນປະທານຮ່ວມຂອງທ່ານ ຍົມມະລາ ວໍລະຈິດ ຮອງຫົວໜ້າກົມຄຸ້ມຄອງຊັບສິນແຫ່ງລັດ ກະຊວງການເງິນ ແລະ ທ່ານ ບຸນໃສ ພົມມະວົງ ຮອງຫົວໜ້າພະແນກການເງິນ ແຂວງ ແລະ ສຳມະນາກອນຈາກ 6 ແຂວງພາກເໜືອເຂົ້າຮ່ວມ,

ຊຸດຝຶກອົບຮົມຄັ້ງນີ້, ແນ່ໃສ່ເຮັດໃຫ້ຂະແໜງການເງິນກໍຄືຂະແໜງຄຸ້ມຄອງຊັບສິນແຫ່ງລັດ ແລະ ຂະແໜງສວ່ຍສາອາກອນ ຢູ່ຂັ້ນແຂວງ ໄດ້ຮັບຮູ້ ແລະ ນໍາໃຊ້ ລະບົບຖານຂໍ້ມູນຂຶ້ນບັນຊີໂຄງການເຊົ່າ ແລະ ສໍາປະທານດິນຂອງລັດ LCIS ເຂົ້າໃນການຄຸ້ມຄອງການເຊົ່າ ແລະ ສໍາປະທານທີ່ດິນ ຢູ່ພາຍໃນແຂວງຂອງຕົນ, ເພື່ອເຮັດໃຫ້ຂໍ້ມູນຢູ່ໃນລະບົບຖານຂໍ້ມູນ LCIS ໄດ້ຮັບການປັບປຸງຢ່າງເປັນລະບົບ ແລະ ຕໍ່ເນື່ອງ, ເພື່ອເຮັດໃຫ້ຂະແໜງການເງິນ ກໍຄືຂະແໜງຄຸ້ມຄອງຊັບສິນແຫ່ງລັດ ແລະ ສ່ວຍສາອາກອນ ຢູ່ຂັ້ນແຂວງ ມີຄວາມສາມາດນໍາໃຊ້ຂໍ້ມູນຢູ່ໃນລະບົບຖານຂໍ້ມູນ LCIS ເຂົ້າໃນການລາຍງານ ແລະ ວິເຄາະຂໍ້ມູນພື້ນຖານ ເພື່ອເປັນບ່ອນອີງໃນການຕິດຕາມກວດການໂຄງການລົງທຶນ, ວາງແຜນ ແລະ ນະໂຍບາຍ. ພ້ອມດຽວກັນນີ້ ຍັງໄດ້ຮັບຟັງການນໍາສະເໜີພາບລວມຂອງໂຄງການ, ລະບົບຖານຂໍ້ມູນ LCIS, ສາທິດການນໍາໃຊ້ LCIS, ການເຂົ້າເຖິງຖານ, ສິດ, ວົງຈອນການໄຫຼວຽນຂໍ້ມູນ ແລະ ການປ່ຽນແປງຄວາມຮັບຜິດຊອບໃນລະບົບ, ກວດກາ ແລະ ເອກະພາບຂໍ້ມູນກ່ອນປ່ຽນເຂົ້າຖານ LCIS ແລະ ອື່ນໆ.

(ຂ່າວ: ແສງອາທິດ)