ກອງປະຊຸມໃຫຍ່ຜູ້ແທນຊາວໜຸ່ມທົ່ວເມືອງລະມາມ ຄັ້ງທີ VII ໄດ້ເປີດຂຶ້ນໃນຕອນເຊົ້າຂອງວັນທີ 15 ຕຸລາ 2024 ທີ່ສະໂມສອນຫ້ອງວ່າການເມືອງລະມາມ ແຂວງເຊກອງ, ພາຍໄຕ້ເປັນປະທານຂອງສະຫາຍ ຕຸລາວັນ ວົງໄຊ ກຳມະການສູນກາງຊາວໜຸ່ມ ກຳມະການພັກແຂວງ ເລຂາຄະນະບໍລິຫານງານຊາວໜຸ່ມແຂວງ, ໃຫ້ກຽດເຂົ້າຮ່ວມມີ ສະຫາຍ ວົງເດືອນ ຈັນທະບຸດຊຽງ ກຳມະການພັກແຂວງ ເລຂາພັກເມືອງ ເຈົ້າເມືອງລະມາມ, ມີບັນດາຄະນະປະຈໍາພັກເມືອງ, ກຳມະການພັກເມືອງ, ພ້ອມດ້ວຍເລຂາໜ່ວຍຊາວໜຸ່ມຫ້ອງການອ້ອມຂ້າງເມືອງ ແລະ ຮາກຖານບ້ານເຂົ້າຮ່ວມ.

ສະຫາຍ ໂອໄລພອນ ພຸດທະບຸນມາ ວ່າການເລຂາຊາວໜຸ່ມເມືອງລະມາມ ໄດ້ກ່າວເປີດກອງປະຊຸມຄັ້ງນີ້ວ່າ: ກອງປະຊຸມຄັ້ງນີ້ ໄດ້ພ້ອມກັນສະຫຼຸບ ຕີລາຄາການຊີ້ນໍາ-ນໍາພາ ຂອງຄະນະບໍລິຫານ ງານ ຊາວໜຸ່ມ ປປລ ເມືອງລະມາມ ຄັ້ງທີ VI ແລະ ໝາກຜົນຂອງການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ VI ຜູ້ແທນຊາວໜຸ່ມທົ່ວເມືອງລະມາມ ເປັນເອກະສັນກັນຮັບຮອງເອົາບົດລາຍງານການເມືອງທັງ 2 ພາກ ແລະ ແຜນພັດທະນາຊາວໜຸ່ມ-ເຍົາວະຊົນ, ແຕ່ນີ້ຮອດປີ 2028 ເພື່ອໃຫ້ສອດຄ່ອງ ກັບການປັບປຸງບູລະນະການຈັດຕັ້ງ ແລະ ການເຄື່ອນໄຫວໃນໄລຍະໃໝ່, ຍຸກສະໄໝແຫ່ງການເຊື່ອມໂຍງ ແລະ ກ້າວເຂົ້າສູ່ປະຊາຄົມເສດຖະກິດອາຊຽນ, ມາຮອດນີ້ໄດ້ສິ້ນສຸດລົງ ດ້ວຍຜົນສໍາເລັດອັນຈົບງາມ ຕາມຈຸດປະສົງ ແລະ ຄາດໝາຍທີ່ວາງໄວ້. ຜົນສໍາເລັດຂອງກອງປະຊຸມໃຫຍ່ຄັ້ງນີ້ ເປັນການຢັ້ງຢືນເຖິງຄວາມສາມັກຄີ ເປັນເອກະພາບຢ່າງສູງ ແລະ ມີຄວາມຮັບຜິດຊອບທາງດ້ານການເມືອງ ຂອງບັນດາສະຫາຍຜູ້ແທນກອງປະຊຸມຕໍ່ຄົນຮຸ່ນໜຸ່ມ, ຕໍ່ພັກ ແລະ ອະນາຄົດຂອງຊາດທີ່ແສນຮັກຂອງພວກເຮົາ.

ກອງປະຊຸມໃຫຍ່ ຂອງພວກເຮົາໃນຄັ້ງນີ້, ຍັງໄດ້ຢືນຢັນຢ່າງໜັກແໜ້ນ ເຖິງຄວາມຕັດສິນໃຈ ເດັດ ດ່ຽວຢຶດໝັ້ນການນໍາພາຂອງພັກ, ບຸກບືນກ້າວຂຶ້ນ ປະຕິບັດແນວທາງປ່ຽນແປງໃໝ່ຢ່າງຮອບດ້ານ, ທີ່ມີຫຼັກການ ຂອງພັກຕາມຈຸດໝາຍກ້າວຂຶ້ນສູ່ສັງຄົມນິຍົມ, ໂດຍປະຕິບັດຕາມມະຕິ ກອງປະຊຸມໃຫຍ່ ຄັ້ງທີ VII ຜູ້ແທນຊາວໜຸ່ມທົ່ວເມືອງລະມາມ ໃຫ້ບັນລຸຕາມລະດັບຂາດໝາຍທີ່ວາງໄວ້, ຍົກສູງຄວາມຮັບຜິດຊອບ ເພື່ອເສີມຂະຫຍາຍ ປະຊາທິປະໄຕ ເລືອກຕັ້ງເອົາ ຄະນະບໍລິຫານງານຊາວໜຸ່ມ ປປລ ເມືອງຊຸດໃໝ່ມີ 19 ສະຫາຍ, ເລືອກຄະນະປະຈໍາ 7 ສະຫາຍ, ພ້ອມກັນນັ້ນ ກໍຍັງໄດ້ຮັບຮອງເອົາ ມະຕິກອງປະຊຸມໃຫຍ່ຄັ້ງນີ້, ເພື່ອໄປເຜີຍແຜ່ໃຫ້ສະມາຊິກຊາວໜຸ່ມໃຫ້ຮັບຮູ້ເຊື່ອມຊຶມ, ເພື່ອເປັນແຜນໃນການຊີ້ນໍາ-ນໍາພາໃນຄັ້ງນີ້ໃຫ້ມີຜົນສຳເລັດເປັນກ້າວໆ.

(ຂ່າວ: ດາວສະຫວັນ)