ໃນທ້າຍອາທິດຜ່ານມາ, ທ່ານ ຄະທາຍຸດ ຊູພູນ ຜູ້ອໍານວຍການໃຫຍ່ ບໍລິສັດ ໄຟຟ້າ ຫົງສາ ຈໍາກັດ ພ້ອມດ້ວຍຄະນະ ໄດ້ເຂົ້າຮ່ວມງານປະເພນີບຸນຊ່ວງເຮືອ ເມືອງຫົງສາ ປະຈໍາປີ 2024 ທີ່ ທ່າຊ່ວງເຮືອ ບ້ານສີບຸນເຮືອງ ເມືອງຫົງສາ ແຂວງໄຊຍະບູລີ ໂດຍການເປັນປະທານຂອງ ທ່ານ ພອນສະຫວັນ ໄຊສົມພັນ ເຈົ້າເມືອງຫົງສາ, ມີຄະນະຜູ້ບໍລິຫານ ແລະ ພະນັກງານ ບໍລິສັດ ໄຟຟ້າຫົງສາ ຈໍາກັດ, ພະນັກງານພາຍໃນໂຄງການໂຮງໄຟຟ້າພະລັງງານຄວາມຮ້ອນຫົງສາ, ຄະນະການນໍາແຂວງ, ການນໍາເມືອງ, ເຈົ້າໜ້າທີ່ພາກລັດ, ເອກະຊົນ ແລະ ປະຊາຊົນ ເມືອງຫົງສາ ພ້ອມທັງປະຊາຊົນພາຍໃນເມືອງຕ່າງໆ ໃນແຂວງໄຊຍະບູລີ ເຂົ້າຮ່ວມງານຢ່າງຫຼວງຫຼາຍ.

ບໍລິສັດ ໄຟຟ້າ ຫົງສາ ຈໍາກັດ ເຂົ້າຮ່ວມງານປະເພນີບຸນຊ່ວງເຮືອ ເມືອງຫົງສາ ເປັນປະຈໍາທຸກປີ ແລະ ໃນປີ 2024 ບໍລິສັດໄດ້ໃຫ້ການສະໜັບສະໜູນງົບປະມານ ສີພາຍ ຈໍານວນ 13 ບ້ານ ພາຍໃນ ເມືອງຫົງສາ ຈໍານວນ 71,500,000 ກີບ ແລະ ສະໜັບສະໜູນງົບປະມານໃນການຈັດງານ 50 ລ້ານກີບ ລວມເປັນເງິນ ທັງໝົດ 121,500,000 ກີບ ພ້ອມທັງ ໃຫ້ການສະໜັບສະໜູນເຮືອກູ້ໄພ 1 ລໍາ ແລະ ເຄື່ອງມືສື່ສານ (Walkie-Talkie) ເພື່ອໃຫ້ເຈົ້າໜ້າທີ່ ທີ່ກ່ຽວຂ້ອງໃຊ້ໃນການປະສານງານໄດ້ຢ່າງສະດວກ.

(ຂ່າວ-ພາບ: ຫົງສາ)