ວັນທີ 15 ຕຸລາ ນີ້, ພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ແຂວງແຂວງຈໍາປາສັກ (ໂຄງການພັດທະນາໂຄງລ່າງພື້ນຖານ ເພື່ອສົ່ງເສີມການທ່ອງທ່ຽວ ໄລຍະ 2) ໄດ້ມອບອຸປະກອນໃນການເກັບມ້ຽນຂີ້ເຫຍື່ອ ເພື່ອຮັກສາຄວາມສະອາດ ຊຶ່ງປະກອບມີ ຖັງຂີ້ເຫຍື່ອຂະໜາດ 130 ລິດຈໍານວນ 10 ໜ່ວຍ ແລະ ຕັ່ງນັ່ງສໍາລັບຜູ້ໂດຍສານນັ່ງລໍຖ້າລົດ ແລະ ນັ່ງພັກຜ່ອນຂະໜາດ 100 x 35 ຊັງຕີແມັດ ມີ 6 ໜ່ວຍ ໃຫ້ແກ່ສະຖານີລົດເມຫຼັກ 8 ໃຕ້ ເມືອງບາຈຽງຈະເລີນສຸກ, ກ່າວມອບໂດຍ ທ່ານ ສຸລິນ ເພັດທານີ ຮອງຫົວໜ້າພະແນກ ຖວທ ແຂວງ ແລະ ຮັບໂດຍທ່ານ ສີສົມພູ ສຸດທິຈັກ ບໍລິຫານສະຖານີລົດເມຫຼັກ 8 ໃຕ້. ມີພາກສ່ວນກ່ຽວຂ້ອງເຂົ້າຮ່ວມເປັນສັກຂີພິຍານ.

ການມອບອຸປະກອນຄັ້ງນີ້ ກໍເພື່ອເຮັດໃຫ້ສະຖານີລົດເມຫຼັກ 8 ໃຕ້ ມີອຸປະກອນຮັກສາຄວາມສະອາດຢ່າງພຽງພໍ, ສາມາດຮັກສາໄດ້ຄວາມສະອາດສວຍງາມ ຮັກສາໄດ້ມາດຕະຖານເມືອງທ່ອງທ່ຽວສະອາດ ແລະ ມີຄວາມເປັນລະບຽບຮຽບຮ້ອຍ ເພື່ອຕ້ອນຮັບແຂກບ້ານແຂກເມືອງ ກໍຄືນັກທ່ອງທ່ຽວທັງພາຍໃນ ແລະ ຕ່າງປະເທດ ທີ່ມາທ່ຽວຊົມ ໃຫ້ມີຄວາມປະທັບໃຈ ມາເຫັນແລ້ວຢາກມາອີກ.

(ຂ່າວ-ພາບ: ທູນທອງໃຈ)