ໃນວັນທີ 14 ຕຸລາຜ່ານມາ, ທ່ານ ພູທະນູເພັດ ໄຊສົມບັດ ຮອງເຈົ້າແຂວງວຽງຈັນ ໄດ້ພົບປະໂອ້ລົມ 4 ທະນາຄານໃນທົ່ວແຂວງວຽງຈັນ, ມີບັນດາຄະນະພັກຮາກຖານ, ເລຂາໜ່ວຍພັກ, ຫົວໜ້າສາຂາທະນາຄານພັດທະນາລາວ, ການຄ້າຕ່າງປະເທດລາວມະຫາຊົນ, ສົ່ງເສີມກະສິກໍາ ແລະ ທະນາຄານນະໂຍບາຍ ສາຂາ ແຂວງວຽງຈັນ ແລະ ພາກສ່ວນກ່ຽວຂ້ອງເຂົ້າຮ່ວມ.

ທ່ານ ຈັນທະລາ ທິບທໍາມະວົງ ຫົວໜ້າສາຂາ ທະນາຄານພັດທະນາລາວ ຕາງໜ້າໃຫ້ທັງ 4 ທະ ນາຄານ ໄດ້ລາຍງານໂດຍຫຍໍ້ຕໍ່ທ່ານຮອງເຈົ້າແຂວງ ໂດຍເນັ້ນໃສ່ 3 ເນື້ອໃນທີ່ສໍາຄັນຄື: ສະພາບການຈັດຕັ້ງປະຕິບັດວຽກພັກ-ພະນັກງານ, ການກະກຽມຄວາມພ້ອມດໍາເນີນກອງປະຊຸມໃຫຍ່ຂອງຕົນ ແລະ ການຈັດຕັ້ງປະຕິບັດວຽກງານວິຊາສະເພາະ ໃນການຈັດປະຕິບັດວຽກງານ 9 ເດືອນຜ່ານມາ ແລະ ທິດທາງແຜນການທ້າຍປີ 2024.

ທ່ານ ຮອງເຈົ້າແຂວງວຽງຈັນ ໄດ້ເນັ້ນໜັກໃຫ້ຄະນະນໍາຂອງບັນດາທະນາຄານດັ່ງກ່າວ ເອົາໃຈໃສ່ສືຶກສາອົບຮົມ-ນຳພາການເມືອງແນວຄິດ ໃຫ້ຖັນແຖວສະມາຊິກພັກ-ພະນັກງານໃຫ້ເປັນປົກກະຕິ ດ້ວຍຫຼາຍຮູບແບບ, ຫຼາຍວິທີ ໃຫ້ແທດເໝາະກັບສະພາບຄວາມເປັນຈິງໃນແຕ່ລະໄລຍະ ໂດຍຖືເອົາການດຳເນີນຊີວິດການເມືອງພາຍໃນພັກໃນແຕ່ລະເດືອນ ເປັນການສຳຫຼວດກວດກາຕີລາຄາຄຸນທາດການເມືອງ, ຖືເອົາການຕຳນິສົ່ງຂ່າວເຊິ່ງກັນ ແລະ ກັນ ເປັນບ່ອນແກ້ໄຂຈຸດອ່ອນຂໍ້ຄົງຄ້າງ ເພື່ອສ້າງທັດສະນະຫຼັກໝັ້ນການເມືອງ-ແນວຄິດໃຫ້ສູງຂຶ້ນ; ວຽກງານທະນາຄານສືບຕໍ່ແຜນວຽກ ໃນ 3 ເດືອນ ທ້າຍປີ ຕາມແຜນການໃຫ້ສໍາເລັດ, ເອົາໃຈໃສ່ຄຸ້ມຄອງເງິນຕາ ແລະ ອັດຕາແລກປ່ຽນ, ຊຶ່ງເປັນບັນຫາເຄັ່ງຮ້ອນ ທາງດ້ານເສດຖະກິດ-ການເງິນ ທີ່ພັກ-ລັດຖະບານ ກໍາລັງສຸມທຸກຄວາມພະຍາຍາມ ແກ້ໄຂເພື່ອຮັກສາສະຖຽນລະພາບດ້ານເສດຖະກິດມະຫາພາກ, ສືບຕໍ່ຜັນຂະຫຍາຍ ແລະ ຈັດຕັ້ງປະຕິບັດນະໂຍບາຍການຫັນສິນເຊື່ອ ຂອງລັດຖະບານ ລົງສູ່ທ້ອງຖິ່ນ (80 ຕື້ກີບ ປີ 2024 ຂອງແຂວງວຽງຈັນ) ໃຫ້ຜູ້ປະກອບການ, ພໍ່-ແມ່ປະຊາຊົນ ແລະ ຊາວກະສິກອນ, ພ້ອມທັງມີການສະຫຼຸບ, ສັງລວມ ແລະ ລາຍງານ ການຈັດຕັ້ງປະຕິບັດດັ່ງກ່າວ ເປັນແຕ່ລະໄລຍະ (ຄວາມຄືບໜ້າການປະຕິບັດ, ຂໍ້ສະດວກ, ຂໍ້ຫຍຸ້ງຍາກ ແລະ ທິດທາງ-ວິທີແກ້ໄຂ) ວຽກງານການປະສານສົມທົບ: ສືບຕໍ່ປະສານສົມທົບ ກັບ ຂະແໜງການເງິນ ໂດຍສະເພາະ ຄັງເງິນປະຈໍາແຂວງ ແລະ ເມືອງ ໃນການອໍານວຍຄາມສະດວກ ໃຫ້ແກ່ການເຮັດທຸລະກໍາຕ່າງໆ, ການຄຸ້ມຄອງບັນຊີເງິນຝາກລາຍຮັບງົບປະມານ, ລວມທັງການຈັດຕັ້ງປະຕິບັດລະບົບຄຸ້ມຄອງງົບປະມານ (FinLink); ການຈັດຕັ້ງປະຕິບັດບັນຊີລວມສູນຄັງເງິນ (TSA): ຂະແໜງການເງິນ ກໍາລັງສຸມໃສ່ຫັນການລວມສູນບັນຊີຄັງເງິນ ຢູ່ທະນາຄານແຫ່ງ ສປປ ລາວ (ທຫລ); ສະນັ້ນ, ຮຽກຮ້ອງໃຫ້ບັນດາທະນາຄານ ເອົາໃຈໃສ່ຈັດຕັ້ງປະຕິບັດ ແລະ ມີສ່ວນຮ່ວມຢ່າງຕັ້ງໜ້າ ວຽກງານດັ່ງກ່າວ ໂດຍສະເພາະ ການເຄື່ອນເງິນເຂົ້າບັນຊີຂອງທະນາຄານ ໃນແຕ່ລະໄລຍະເຂົ້າໃນບັນຊີລວມສູນຢູ່ ທຫລ.

(ແຫຼ່ງຂ່າວ: ແຂວງວຽງຈັນ)