ໃນວັນທີ່ 15 ຕຸລານີ້, ອົງການໄອຍະການປະຊາຊົນ ແຂວງໄຊສົມບູນ ໄດ້ຈັດພິທີປະກາດການອະນຸມັດໃຫ້ພະນັກງານ-ລັດຖະກອນ ຂອງຕົນອອກພັກການ-ຮັບອຸດໜູນບຳນານ ຂຶ້ນທີ່ຫ້ອງວ່າການແຂວງ ພາຍໃຕ້ການເປັນປະທານຂອງ ທ່ານ ພອຍຄຳ ຮຸ່ງບຸນຍວງ ເຈົ້າແຂວງໄຊສົມບູນ, ມີທ່ານ ຄໍາເພັດ ດວງມາລາ ຫົວໜ້າອົງການໄອຍະການແຂວງ, ມີບັນດາພະແນກການ, ກົມກອງ ແລະ ພາກສ່ວນທີ່ກ່ຽວຂ້ອງ ຕະຫຼອດຮອດພະນັກງານ-ລັດຖະກອນຂອງຕົນເຂົ້າຮ່ວມ.

ໃນພິທີ ໄດ້ຮັບຟັງການຜ່ານຂໍ້ຕົກລົງຂອງຫົວໜ້າອົງການໄອຍະການປະຊາຊົນສູງສຸດ ເລກທີ່ 783/ອອປຊ ລົງວັນທີ 23 ກໍລະກົດ 2024 ວ່າດ້ວຍການອະນຸມັດ ໃຫ້ພະນັກງານ-ລັດຖະກອນ ອອກພັກການ-ຮັບອຸດໜູນບຳນານ, ຕາມຂໍຕົກລົງໃຫ້ ທ່ານ ບຸນກົດ ອິນທະວົງ ຮອງຫົວໜ້າອົງການໄອຍະການແຂວງ ໄຊສົມບູນ ອອກພັກການ-ຮັບອຸດໜູນບຳນານ ນັບແຕ່ວັນທີ 1 ຕຸລາ 2024. ໃນພິທີ ຍັງໄດ້ຮັບຟັງການຜ່ານຂໍ້ຕົກລົງ ເລກທີ 1175/ອອປຊ ລົງວັນທີ 2 ຕຸລາ 2024 ວ່າດ້ວຍການຍົກຍ້າຍຮອງຫົວໜ້າອົງການໄອຍະການ ແຂວງໄຊສົມບູນ ຕົກລົງຍົກຍ້າຍ ທ່ານ ເຈີຊົ່ງ ຄຳມີ ຮອງຫົວໜ້າອົງການໄອຍະການປະຊາຊົນ ແຂວງ ໄປຮັບໜ້າທີ່ໃໝ່ ຢູ່ຫ້ອງວ່າການປົກຄອງ ແຂວງ ແລະ ຂໍ້ຕົກລົງ ເລກທີ 1318/ ຈຂ.ຊບ ລົງວັນທີ 8 ຕຸລາ 2024 ວ່າດ້ວຍການຮັບເອົາ ແລະ ແຕ່ງຕັ້ງພະນັກງານນໍາພາ-ຄຸ້ມຄອງ. ເຈົ້າແຂວງໄຊສົມບູນ ຕົກລົງຮັບເອົາ ທ່ານ ເຈີຊົ່ງ ຄໍາມີ ຮອງຫົວໜ້າອົງການໄອຍະການປະຊາຊົນແຂວງ ມາຮັບໜ້າທີ່ໃໝ່ຢູ່ພະແນກ ຍຸຕິທໍາ ແຂວງໄຊສົມບູນ ພ້ອມທັງແຕ່ງຕັ້ງ ທ່ານ ເຈີຊົ່ງ ຄໍາມີ ເປັນຮອງຫົວໜ້າພະແນກຍຸຕິທໍາ ແຂວງໄຊສົມບູນ .

ໃນໂອກາດນີ້, ທ່ານ ພອຍຄຳ ຮຸ່ງບຸນຍວງ ໄດ້ສະແດງຄວາມຄວາມຍ້ອງຍໍຊົມເຊີຍ ຕໍ່ຜູ້ທີອອກພັກການ-ຮັບອຸດໜູນບຳນານ ທີ່ໄດ້ສຸມທຸກເຫື່ອແຮງຂອງຕົນ ເຂົ້າໃນການຈັດຕັ້ງປະຕິບັດວຽກງານຮອບດ້ານ ດ້ວຍຜົນສຳເລັດອັນຈົບງາມ, ພ້ອມນີ້ ທ່ານຍັງໄດ້ເນັ້ນໜັກໃຫ້ຜູ້ທີຖືກແຕ່ງຕັ້ງໜ້າທີ່ໃໝ່ ຈົ່ງສືບຕໍ່ປະຕິບັດໜ້າທີ່ວຽກງານຂອງຕົນ ທີ່ຂັ້ນເທິງມອບໝາຍ ໃຫ້ມີຜົນສຳເລັດອັນໃໝ່ ແລະ ໃຫຍ່ຫຼວງກວ່າເກົ່າ ພ້ອມທັງສືບຕໍ່ຜັນຂະຫຍາຍມະຕິຂອງກົມການເມືອງສູນກາງພັກ ເຂົ້າໃນການຈັດຕັ້ງປະຕິບັດວຽກງານຂອງຕົນ ໃຫ້ເປັນຮູບປະທຳ ໂດຍຕິດພັນກັບການພັດທະນາເສດຖະກິດ-ສັງຄົມ ຂອງແຂວງໄຊສົມບູນ ແລະ ເອົາໃຈໃສ່ສຶກສາອົບຮົມການເມືອງ-ແນວຄິດ ໃຫ້ແກ່ພະນັກງານຂອງຕົນ ໃຫ້ມີແນວຄິດອຸ່ນອຽງທຸ່ນທ່ຽງ ຕໍ່ການນຳພາ-ຊີ້ນຳ ຂອງພັກ-ລັດ ຢ່າງໜັກແໜ້ນ

(ຂ່າວ: ຄຳໝັ້ນ ພຽງພິລາ)