ໃນວັນທີ 15 ຕຸລາຜ່ານມາ, ທ່ານ ຄໍາໄຫຼ ສີປະເສີດ ຮອງປະທານສູນກາງແນວລາວສ້າງຊາດ (ສນຊ) ພ້ອມດ້ວຍຄະນະ ໄດ້ເຂົ້າພົບປະທ່ານ ວັນໄຊ ພອງສະຫວັນ ເຈົ້າແຂວງຄຳມ່ວນ ທີ່ຫ້ອງວ່າການແຂວງ ເພື່ອລາຍງານການຈັດຕັ້ງປະຕິບັດວຽກງານ ກອງທຶນສາມັກຄີພັດທະນາ ຂອງແນວລາວສ້າງຊາດ.

ໃນວັນດຽວກັນນີ້, ທ່ານຮອງປະທານ ສນຊ ກໍໄດ້ສືບຕໍ່ເຄື່ອນໄຫວວຽກງານຢູ່ທີ່ຫ້ອງການແນວລາວສ້າງຊາດແຂວງຄຳມ່ວນ ຊຶ່ງໄດ້ຮັບຟັງການລາຍງານຈາກຄະນະຮັບຜິດຊອບ ກ່ຽວກັບການຈັດຕັ້ງປະຕິບັດວຽກງານກອງທຶນ ໃນໄລຍະຜ່ານມາ ຊຶ່ງໄດ້ຈັດຕັ້ງປະຕິບັດຢູ່ບ້ານໂພນເຍຍນ້ອຍ ເມືອງທ່າແຂກ ແລະ ບ້ານໜອງຜໍາ ເມືອງໜອງບົກ. ສໍາລັບກອງທຶນຢູ່ບ້ານໂພນເຍຍນ້ອຍ ເມືອງທ່າແຂກ ໄດ້ຮັບການສ້າງຕັ້ງຂຶ້ນ ໃນວັນທີ 11 ສິງຫາ 2021 ໃນວົງເງິນ 5 ຕື້ກີບ ເປັນແຜນງານໜຶ່ງ ທີ່ຕິດພັນກັບຂະບວນການສ້າງບ້ານສາມັກຄີປອງດອງ ແລະ ຕິດພັນກັບວຽກງານ 3 ສ້າງ ແນໃສ່ເຮັດໃຫ້ປະຊາຊົນໄດ້ມີໂອກາດເຂົ້າເຖິງແຫຼ່ງທຶນໄດ້ງ່າຍ ແລະ ມີດອກເບ້ຍຕໍ່າ.

ສຳລັບຢູ່ບ້ານໜອງຜໍາ ເມືອງໜອງບົກ ໄດ້ສ້າງຕັ້ງຂຶ້ນປີ 2020 ເປັນຕົ້ນມາ ໂດຍໄດ້ເຄື່ອນໄຫວ ຕາມພາລະບົດບາດ ເປັນອົງການສະຖາບັນການເງິນຂັ້ນບ້ານ ເຮັດໜ້າທີ່ໃນການສະໜອງກອງທຶນສິນເຊື່ອ, ສະໜອງ ປຸ໋ຍໃຫ້ປະຊາຊົນພາຍໃນບ້ານ ແລະ ບ້ານໃກ້ຄຽງ ເພື່ອຊຸກຍູ້ ສົ່ງເສີມການຜະລິດຂອງປະຊາຊົນ. ນັບແຕ່ປີ 2020 ເຖິງປັດຈຸບັນ ກອງທຶນໄດ້ຮັບອະນຸມັດ ແຫຼ່ງທຶນຈາກທະນາຄານພົງສະຫວັນ ທັງໝົດ ຈໍານວນ 5 ຕື້ກີບ ໄດ້ນໍາໃຊ້ໄປແລ້ວ ຈໍານວນ 1.9 ຕື້ກີບ ແລະ ຍອດຍັງເຫຼືອທີ່ສາມາດຖອນໄດ້ ຈໍານວນ 3.1 ຕື້ກີບ.

ກອງທຶນສາມັກຄີ ພັດທະນາແນວລາວສ້າງຊາດ ໄດ້ຮັບການສ້າງຕັ້ງຂຶ້ນ ຕາມແນວທາງນະໂຍບາຍຂອງພັກ-ລັດ ໂດຍການຊີ້ນຳ ຂອງສູນກາງແນວລາວສ້າງຊາດ ມີຈຸດປະສົງເພື່ອນຳເອົາແຫຼ່ງທຶນລົງສູ່ການຜະລິດດ້ານກະສິກຳ, ຫັດຖະກຳ ແລະ ທ່ອງທ່ຽວ ໃຫ້ເຂົ້າເຖິງປະຊາຊົນຂັ້ນທ້ອງຖິ່ນໄດ້ງ່າຍຂຶ້ນ, ສົ່ງເສີມການຜະລິດເປັນສິນຄ້າ ແລະ ສະໜອງເພື່ອການຈັດຊື້ອຸປະກອນການຜະລິດ ແລະ ວັດຖຸ ດ້ານການກະເສດ ເພື່ອຈັດຈຳໜ່າຍ ໃຫ້ປະຊາຊົນພາຍໃນບ້ານ ແລະ ບ້ານອ້ອມຂ້າງເຊັ່ນ: ການຈັດຊື້ ປຸ໋ຍ, ລົດໄຖນາ, ລົດກ່ຽວເຂົ້າ, ລົດບັນທຸກ ແລະ ວັດຖຸອຸປະກອນ ເຄື່ອງມືການກະເສດ. ນອກຈາກນີ້ ກອງທຶນກໍ່ຍັງປ່ອຍກູ້ໃຫ້ປະຊາຊົນ ເພື່ອສົ່ງເສີມການຜະລິດໃຫ້ກາຍເປັນສິນຄ້າເຊັ່ນ: ໂຄງການລ້ຽງໄກ່, ຈົກໜອງລ້ຽງປາ, ຊື້ກົນຈັກ, ເກັບຊື້ເຂົ້າ ແລະ ອື່ນໆ ທີ່ປະຊາຊົນມີຄວາມຕ້ອງການ ເພື່ອສ້າງລາຍໄດ້ໃຫ້ປະຊາຊົນ ຫຼຸດຜ່ອນຄວາມທຸກຍາກໄປເທື່ອລະກ້າວ.

(ຂ່າວ-ພາບ: ກອງຄໍາ)